អ្វីដែលខ្ញុំត្រូវការគឺ មនុស្សប្រុសដែលចេះលើកទឹកចិត្ត មិនបោះបង់ពេលមានទុក្ខ

2019-04-19 09:45:00
ចំនួនមតិ 0 | ចំនួនចែករំលែក 0

ខ្ញុំមិនត្រូវការមនុស្សប្រុសដែលចូលចិត្តបង្ខំឲ្យខ្ញុំធ្វើអ្វីមួយតាមតែគេនឹកឃើញ។ មនុស្សដែលចង់ផ្លាស់ប្តូរខ្ញុំ មិនអនុញ្ញាតឲ្យខ្ញុំធ្វើអ្វីដែលជាខ្លួនឯង មិនពេញចិត្តនូវអ្វីដែលជាខ្ញុំ។

ខ្ញុំត្រូវការមនុស្សម្នាក់ដែលចេះលើកទឹកចិត្ត មើលឃើញពីតម្លៃ និងចំណុចខ្លាំងដែលខ្ញុំមាន។ ម្នាក់នោះក៏អាចដឹងច្បាស់ពីគោលដៅនិងក្តីស្រមៃរបស់ខ្ញុំ ហើយតែងតែនៅចាំជួយជំរុញខ្ញុំឲ្យទៅដល់ទីនោះ ទោះបីដឹងថាវាខ្ពស់ពេក គ្មាននរណាអាចទៅរួចក៏ដោយ។

ខ្ញុំត្រូវការមនុស្សម្នាក់ដែលជឿជាក់លើសមត្ថភាពរបស់ខ្ញុំ។ គាត់ជឿថាខ្ញុំអាចធ្វើបាន អាចបំពេញមហិច្ឆតារបស់ខ្លួន។

ខ្ញុំត្រូវការមនុស្សម្នាក់ដែលមើលឃើញខ្ញុំស្អាតទាំងទឹកចិត្តខាងក្នុងនិងសម្រស់ខាងក្រៅ។ គាត់គិតថាខ្ញុំឆ្លាត ម៉ឺងម៉ាត់តែគួរឲ្យស្រលាញ់។ គាត់ដឹងថាត្រូវដោះស្រាយបែបណា ពេលខ្ញុំជួបបញ្ហា ហើយក៏មិនបោះបង់ពេលខ្ញុំមានទុក្ខលំបាក។

ខ្ញុំត្រូវការមនុស្សម្នាក់ដែលស្គាល់និងយល់ពីខ្ញុំច្បាស់ជាងនរណាទាំងអស់។ គាត់ដឹងពីចំណុចខ្សោយ ដឹងថាខ្ញុំមិនល្អឥតខ្ចោះ ប៉ុន្តែនៅតែស្រលាញ់ មិនរិះគន់មើលងាយ មានតែនៅជួយឲ្យយោបល់ល្អៗដើម្បីកែតម្រូវ។

ខ្ញុំត្រូវការមនុស្សម្នាក់ដែលធ្វើឲ្យខ្ញុំមានអារម្មណ៍ពិសេសម្យ៉ាង គ្មាននរណាអាចប្រៀបបាន ហើយនៅតែរក្សាទឹកចិត្តស្មោះស បន្តដំណើរជាមួយគ្នា មិនថាមានឧបសគ្គធំរារាំងយ៉ាងណាក៏មិនចុះចាញ់។

ខ្ញុំត្រូវការមនុស្សម្នាក់ដែលចេះគោរពនូវគំនិតយោបល់របស់ខ្ញុំ ទោះបីជាវាមានភាពផ្ទុយគ្នាខ្លាំងពីគំនិតគាត់ក៏ដោយ។ គាត់មិនលូកលាន់ ជំទាស់ដាច់អហង្ការលើការសម្រេចចិត្តរបស់ខ្ញុំ។

ខ្ញុំត្រូវការមនុស្សម្នាក់ដែលអាចការពារខ្ញុំ មិនឲ្យខ្ញុំមានអារម្មណ៍ភ័យខ្លាច តក់ស្លុត។ គាត់មិនគំហក ឬស្តីបន្ទោស ពេលដែលខ្ញុំប្រចណ្ឌព្រោះចិត្តស្រលាញ់។ មនុស្សម្នាក់ដែលមិនធុញនឹងខ្ញុំ ពេលនៅជាមួយគ្នាយូរឆ្នាំ។

ខ្ញុំត្រូវការមនុស្សម្នាក់ដែលមិនប្រែប្រួលចិត្ត នៅពេលសម្រស់ខ្ញុំផ្លាស់ប្តូរ និងមិនយកខ្ញុំទៅប្រៀបធៀបនឹងអ្នកដទៃ។

ខ្ញុំត្រូវការមនុស្សម្នាក់ដែលផ្តល់ស្នាមញញឹម សំណើច ច្រើនជាងទឹកភ្នែកនិងទុក្ខសោក។ គាត់មិនធ្វើបាបឲ្យបេះដូងមានរបួស បន្សល់ស្លាកស្នាមពិបាក ព្យាបាល។

ខ្ញុំត្រូវការមនុស្សម្នាក់ដែលអាចរស់នៅជាមួយគ្នាដោយភាពចុះសម្រុង មានសុភមង្គល និងមិនដាក់សម្ពាធឲ្យគ្នាទៅវិញទៅមក។