ពេលមានផ្ទៃពោះអ្នកម្ដាយគិតថាធ្វើរឿង ៨ យ៉ាងនេះល្អ តែការពិតប៉ះពាល់ដល់ទារកខ្លាំងណាស់

2019-03-22 06:43:09
ចំនួនមតិ 0 | ចំនួនចែករំលែក 0

មិនថាអ្នកមានទម្លាប់បែបណាទេ ប៉ុន្តែនៅពេលពពោះអ្នកត្រូវតែប្រយ័ត្ន និងជៀសវាងទម្លាប់អាក្រក់ទាំងឡាយ ទើបកូនរបស់អ្នកកើតមកមានសុខភាពល្អ។ នៅពេលដែលមិនទាន់ពពោះស្ត្រីអាចញ៉ាំអ្វីក៏បានតាមចំណង់ចំណូលចិត្តខ្លួនឯងដូចជា ញ៉ាំម្ហូបឆៅ ផឹកគ្រឿងស្រវឹង ជក់បារី … ប៉ុន្តែនៅពេលចាប់ផ្ដើមមានមនុស្សម្នាក់ទៀតដែលកំពុងតែមករស់នៅក្នុងពោះរបស់អ្នក អ្នកត្រូវជៀសវាងទម្លាប់ទាំងនេះ វាមិនមែនត្រឹមតែមិនល្អចំពោះសុខភាពគេទេ វាក៏អាចបណ្ដាលឲ្យទារកស្លាប់បានដែរ។ ខាងក្រោមនេះជាទម្លាប់ដែលអ្នកម៉ាក់គ្រប់រូបត្រូវតែជៀសវាងពេលពពោះ៖

ប្រើក្រែមម៉ាស្សាពោះពេលកំពុងពពោះ

អ្នកម្ដាយគ្រប់រូបគិតថា ការអង្អែលពោះប្រៀបបានដូចជាការថើបកូនរបស់ពួកគេ អ៊ីចឹងហើយទើបពួកគាត់ឧស្សាហ៍ធ្វើបែបនេះ។ អ្នកម្ដាយខ្លះទៀតបារម្ភខ្លាចមានសង្វារនៅលើពោះទើបប្រើប្រាស់ក្រែមដើម្បីម៉ាស្សាយ៉ាងយូរ ដើម្បីឲ្យក្រែមជ្រាបចូលជ្រៅដល់ស្បែកឲ្យកាន់តែមានប្រសិទ្ធភាព ដោយមិនដឹងថាវាប៉ះពាល់ដល់ស្បែកពោះអាចបណ្ដាលឲ្យស្បូនចុះខ្សោយដោយសារតែការកន្ត្រាក់។ ទោះបីជាបែបហ្នឹងក៏ដោយ វាមិនមានន័យថាម្ដាយមិនអាចគ្រប់រូបមិនអាចសម្អាតពោះបានទេ អ្នកអាចជូតពោះបានតិចតួច ថ្នមៗ តែកុំជូតយូរពេក ហើយមិនត្រូវជូតច្រើនដងពេកនោះទេក្នុងមួយថ្ងៃ។ បើសិនជាអ្នកធ្លាប់រលូតកូនពីមុនមក អ្នកមិនគួរជូតពោះរបស់អ្នកនោះទេ។

ដើរច្រើនពេក

មនុស្សគ្រប់គ្នានៅតែជឿថាការដើរច្រើននឹងជួយដល់ការសម្រាលកូនបានងាយស្រួល ប៉ុន្តែការពិត ការដើរច្រើនពេកអាចដាក់សម្ពាធដល់ត្រគាក និងពោះដែលបណ្ដាលឲ្យកូនកើតមិនគ្រប់ខែ ហើយលើសពីនេះអាចឲ្យកូនរបស់អ្នករលូតបាន ដោយសារតែស្បូនរបស់អ្នកបើក។ ដូច្នេះហើយអ្នកម៉ាក់គួរចាប់ផ្ដើមហាត់ប្រាណតិចៗ ដើរយឺតៗបាន។ ប្រសិនបើអ្នកបានដឹង អ្នកអាចបង្កើនអាំងតង់ស៊ីតេបន្តិចម្ដងៗ ប៉ុន្តែត្រូវចាំថាអ្នកមិនត្រូវចូលរួមហាត់កីឡាដែលប្រើថាមពលខ្លាំងពេកនោះទេ ព្រោះវាអាចធ្វើឲ្យប៉ះពាល់ដល់សុខភាពរបស់អ្នកបាន។

ញ៉ាំល្ហុងខ្ចី ម្នាស់ និងម្រះច្រើនពេក

តាមពិតទៅអាហារទាំងនេះសម្បូរទៅដោយសារធាតុចិញ្ចឹមច្រើនណាស់ ហើយថែមទាំងល្អចំពោះរាងកាយថែមទៀតផង ប៉ុន្តែបើអ្នកកំពុងតែពពោះ វាអាចធ្វើឲ្យប៉ះពាល់វិញ។ ការសិក្សាជាច្រើនបានបង្ហាញថា ល្ហុងខ្ចី ម្រះ និងម្នាស់អាចធ្វើឲ្យអ្នកម្ដាយរលូតកូនបាន។ នៅក្នុងល្ហុង (ជាពិសេសល្ហុងខ្ចី) ម្នាស់ និងម្រះ មានអ័រម៉ូនភេទស្រីជាច្រើនដែលអាចផ្លាស់ប្ដូររាងកាយរបស់អ្នកម្តាយបានយ៉ាងងាយអំឡុងពេលមានផ្ទៃពោះ។ អ៊ីចឹងហើយត្រូវចាំថាអ្នកត្រូវតែកាត់បន្ថយការញ៉ាំអាហារទាំងនេះ។

ញ៉ាំអាហារត្រជាក់

តាំងពីដើមឡើយ នៅពេលមានផ្ទៃពោះសីតុណ្ហភាពក្នុងរាងកាយរបស់អ្នកម្ដាយមានការកើនឡើងខុសធម្មតា បើសិនជាមានថ្ងៃក្ដៅខ្លាំង វានឹងធ្វើឲ្យអ្នកមានអារម្មណ៍ថាមិនស្រួល។ នៅក្នុងស្ថានភាពបែបហ្នឹង អ្នកប្រាកដជាញ៉ាំទឹកត្រជាក់មួយកែវ ឬញ៉ាំការ៉េម។ នេះជាទម្លាប់ដែលអ្នកម្ដាយជាច្រើនតែងតែធ្វើ។ ទោះបីជាយ៉ាងណាក៏ដោយ ការធ្វើបែបនេះគឺមិនល្អសម្រាប់ទារកនៅក្នុងផ្ទៃរបស់អ្នកទេ។ នៅពេលមានសីតុណ្ហភាពក្ដៅខ្លាំង ភ្លាមៗនោះអាហារត្រជាក់នឹងធ្វើឲ្យសរសៃឈាមនៅក្នុងពោះនិងកស្បូនចុះខ្សោយដែលធ្វើឲ្យប៉ះពាល់ដល់ទារកបាន។ អ៊ីចឹងហើយអ្នកជំនាញប្រាប់ថា ពេលមានផ្ទៃពោះអ្នកគួរតែញ៉ាំការ៉េម និងទឹកកកឲ្យមានកម្រិត។

ប្រើប្រាស់គ្រឿងអេឡិចត្រូនិកនិង Wifi

នៅក្នុងសម័យបច្ចេកវិទ្យានេះ វាជារឿងធម្មតាក្នុងការប្រើប្រាស់ឧបករណ៍អេឡិចត្រូនិកជាមួយ Wifi មិនអាចខ្វះបាន។ នៅពេលពពោះ រាងកាយរបស់អ្នកម្ដាយនឹងមានជាតិទឹកច្រើន ដែលវាងាយស្រួលក្នុងការស្រូបយកវិទ្យុសកម្ម។ ក្នុងដំណាក់កាលពពោះលើកដំបូង គ្រោះថ្នាក់ដែលបណ្ដាលមកពីសារធាតុវិទ្យុសកម្មគឺប៉ះពាល់ខ្លាំងជាងពេលផ្សេងក្នុងកំឡុងពេលមានផ្ទៃពោះទាំងអស់។ វិទ្យុសកម្ម ធ្វើឲ្យមានការប្រែប្រួល DNA ដោយបន្ថយសមត្ថភាពខួរក្បាល។ ដោយសារតែខួរក្បាលទារកនៅទន់ ឆ្អឹងក៏នៅស្ដើងមិនទាន់លូតលាស់ពេញលក្ខណៈដូចមនុស្សពេញវ័យអ៊ីចឹងហើយទើបងាយមានគ្រោះថ្នាក់។ ដូច្នេះដើម្បីជៀសវាងបញ្ហាទាំងនេះ អ្នកមិនត្រូវនៅជិតឧបករណ៍ទាំងនោះពេកទេ មិនត្រូវសម្លឹងចំពេក និងត្រូវដាក់វានៅឲ្យឆ្ងាយពីពោះ ហើយត្រូវប្រើតែពេលចាំបាច់ទៅបានហើយ។

ញ៉ាំអាហារហឹរ

រសជាតិហឹរអាចជួយឲ្យអាហារកាន់តែឆ្ងាញ់ ប៉ុន្តែញ៉ាំអាហារហឹរពេលមានផ្ទៃពោះនឹងធ្វើឲ្យប៉ះពាល់ដល់ប្រព័ន្ធប្រសាទរបស់ទារក។ នៅក្នុងអាហារហឹរមានជាតិស្ពឹក ដែលធ្វើឲ្យប្រព័ន្ធប្រសាទរបស់ទារកមិនអាចលូតលាស់បានល្អ ហើយថែមទាំងធ្វើឲ្យមានការខូចទ្រង់ទ្រាយក្នុងប្រព័ន្ធប្រសាទនោះទៀតផង។

ញ៉ាំអាហារឆៅ

បើសិនជាអ្នកញ៉ាំអាហារដែលមិនបានចម្អិនឲ្យបានល្អត្រឹមត្រូវដូចជាសាច់គោ ត្រីឆៅ Sushi … អាចធ្វើឲ្យប៉ះពាល់ដល់សុខភាពទារកក្នុងផ្ទៃ។ នៅក្នុងម្ហូបដែលមិនបានចម្អិនមានបាក់តេរី Listeria Camphylobactor និង Salmonella ដែលអាចបណ្ដាលឲ្យរលូតកូន កើតមិនគ្រប់ខែ និងពិបាកសម្រាល។ ត្រូវតែញ៉ាំតែអាហារដែលចម្អិនបានល្អ លើសពីនេះគួរតែជៀសវៀងទឹកដោះគោស្រស់ ព្រោះវាមានផ្ទុក Listeria នៅក្នុងទឹកដោះគោដែលបង្កើនហានិភ័យដល់ការរលូតកូនបាន។

ងូតទឹកក្ដៅ

បើសិនជាម្ដាយមានអាការៈក្ដៅខ្លួន ជាពិសេសក្នុងកំឡុងពេល ៣ ខែដំបូង។ វាមានហានិភ័យដល់ការខូចសរសៃប្រសាទទារក។ អ្នកម្ដាយត្រូវបានគេហាមមិនឲ្យងូតទឹកក្ដៅពេកទេ ព្រោះការធ្វើបែបនេះនឹងបង្កើនសីតុណ្ហភាពដល់រាងកាយ ហើយប៉ះពាល់ដល់ទារកខ្លាំងណាស់៕

ចុចអាន៖ តិចនិក ៧ យ៉ាងជួយឲ្យអ្នកម៉ាក់កំពុងពពោះស្រស់ស្អាតបានយ៉ាងមានទំនុកចិត្ត

ប្រភព៖ bestie ប្រែសម្រួល៖ ឃួន សុលីកា