អាយុច្រើនហើយ ជីវិតនៅតែរសាត់អណ្ដែត សួរខ្លួនឯង ធ្លាប់បានធ្វើរឿងទាំងនេះឬនៅ?
- 2019-03-19 05:00:00
- ចំនួនមតិ 0 | ចំនួនចែករំលែក 0
អាយុច្រើនហើយ ជីវិតនៅតែរសាត់អណ្ដែត សួរខ្លួនឯង ធ្លាប់បានធ្វើរឿងទាំងនេះឬនៅ?
ពេលខ្លះយើងក៏បារម្ភពីអ្នកដទៃ ចាប់អារម្មណ៍អ្នកដទៃយ៉ាងល្អ រហូតភ្លេចទៅថាមនុស្សសំខាន់បំផុតដែលយើងត្រូវមើលថែគឺជានរណា នោះគឺ “ខ្លួនឯង”។ អ្នកខ្លះអាយុច្រើនឆ្នាំទៅហើយ តែក៏មានអារម្មណ៍មិនសូវរីកចម្រើននឹងគេ ហើយយល់ថាខ្លួនរសាត់អណ្ដែតមែនទែន។ ដូច្នេះសាកល្បងសួរខ្លួនឯងទៅមើល ថាធ្លាប់ធ្វើរឿងទាំងនេះចំពោះខ្លួនឯងឬនៅ? បើនៅគួរចាប់ផ្ដើមធ្វើពីឥលូវនេះ ដើម្បីជីវិតរីកចម្រើន!
១. បង្កើតគោលដៅសម្រាប់មួយថ្ងៃៗ
គោលដៅក្នុងជីវិតរបស់យើងមិនមែនមានតែគោលដៅរយៈពេលវែង ឬគោលដៅតែមួយឬពីរនោះទេដែលត្រូវធ្វើឲ្យបានសម្រេច ប៉ុន្តែយើងក៏អាចតាំងគោលដៅសម្រាប់មួយថ្ងៃៗដែរ។ រៀបចំផែនការឲ្យបានល្អ ហើយចាប់ផ្ដើមធ្វើតាមអ្វីដែលខ្លួនគ្រោងទុករៀងរាល់ថ្ងៃ។ ទោះបីវាមានរឿងធំខ្លះ រឿងតូចខ្លះ ប៉ុន្តែក៏គួរអនុវត្តវា។ ដូច្នេះចាប់ផ្ដើមសម្រេចគោលដៅប្រចាំថ្ងៃឲ្យបាន ទើបអ្នកនឹងអាចទៅដល់គោលដៅធំរបស់ខ្លួន។
២. ទទួលខុសត្រូវលើជីវិតខ្លួនឯង
អ្នកខ្លះកើតមកស្រណុកស្រួល មានផ្ទះមានឋានៈល្អ អ្នកខ្លះក៏កើតមកក្រលំបាក ត្រូវតស៊ូតាំងតែពីក្មេង។ ប៉ុន្តែមកដល់វ័យមួយ អ្នកក៏មិនអាចផ្ញើវាសនាលើអ្នកដទៃ ឬបន្ទោសអ្នកណាទៀតទេ ព្រោះអ្នកគឺជាម្ចាស់នៃជីវិតរបស់ខ្លួន។ ការទទួលខុសត្រូវលើជីវិតខ្លួនឯង គឺជារឿងសំខាន់ដែលអ្នកត្រូវធ្វើ។ កុំចាំឲ្យអ្នកណាមកទទួលខុសត្រូវលើជីវិតអ្នក មានតែអ្នកប៉ុណ្ណោះដែលអាចកំណត់ថាជីវិតអ្នកនឹងត្រូវបន្តទៀតបែបណា។ ទាំងក្ដីសុខ និងក្ដីទុក្ខ គឺអ្នកត្រូវបង្កើត និងប្រឈមជាមួយវាដោយខ្លួនឯង។
៣. គិតវិជ្ជមាន គិតថាអាចទៅរួច
សាកល្បងសង្កេតមើលខ្លួនឯងថា កន្លងមកចូលចិត្តមើលពិភពលោកក្នុងផ្លូវអវិជ្ជមាន ឬខ្លាចមនុស្សនៅជុំវិញខ្លួនគ្រប់ពេលឬក៏អត់។ បើអ្នកធ្លាប់ជួបរឿងមិនល្អ វាក៏គ្មានអ្វីប្លែកដែរដែលអ្នកសម្លឹងមើលលោកក្នុងផ្លូវអាក្រក់ ប៉ុន្តែវាក៏ល្មមដល់ពេលដែរ ដែលត្រូវដោះលែងខ្លួនឯង ហ៊ានដើរទៅមុខទៀត ហ៊ានទទួលយកឱកាសថ្មីៗ ដោយព្យាយាមគិតវិជ្ជមានឲ្យបានច្រើន។
៤. សាកប្រកួតប្រជែងជាមួយខ្លួនឯង
កុំរវល់តែច្រណែនអ្នកដទៃ កុំរវល់តែប្រជែងជាមួយអ្នកណាអី សាកល្បងសម្លឹងមើលអតីតកាលរបស់ខ្លួនឯងវិញថាយើងពីមុនបែបណា ហើយត្រូវធ្វើអ្វីដើម្បីឲ្យខ្លួនឯងបច្ចុប្បន្ននេះល្អជាងខ្លួនឯងពីមុន។ កុំអាលចង់ប្រជែងជាមួយអ្នកដទៃ ប៉ុន្តែត្រូវប្រជែងជាមួយខ្លួនឯងឲ្យប្រសើរឡើងពីមួយថ្ងៃទៅមួយថ្ងៃសិន ៕
ចុចអាន៖៩ ហេតុផលដែលស្រ្តីត្រូវតែមានចំណេះដឹង និងរៀនសូត្រឲ្យបានខ្ពស់