អ្នកមាននិស្ស័យ ទោះនៅទ្វីបខុសគ្នាក៏គង់ជួប តែអ្នកគ្មានវាសនា ជួបហើយក៏គង់បែក

2019-03-04 07:00:00
ចំនួនមតិ 0 | ចំនួនចែករំលែក 0

តាមការពិត មនុស្សយើងបានជួបគ្នាគឺដោយនិស្ស័យ ស្រលាញ់គ្នាគឺដោយព្រេងវាសនា។ មាននិស្ស័យហើយ ទៅដល់ជើងមេឃក៏គង់ជួបគ្នា មានវាសនាហើយ រត់ដល់ណាក៏នៅតែស្រលាញ់គ្នា។

រូបតំណាង

បើយើងធ្វើចិត្តឲ្យទូលាយ ហើយគិតថា ស្នេហាគឺបណ្ដាលមកពីនិស្ស័យ ពេលផ្ដើម ពេលបញ្ចប់ក៏ដោយនិស្ស័យនោះ នឹងធ្វើឲ្យយើងមានភាពងាយស្រួលក្នុងការធ្វើចិត្តពេលបែកគ្នា។ មានករណីខ្លះ និស្ស័យបានឲ្យហេតុជាមុនថា គូព្រេងរបស់អ្នកគង់តែបែក ដូចនេះហើយ ទោះនៅក្បែរ ៥ ឬ១០ឆ្នាំ ក៏គង់តែបែក។

ហេតុនេះហើយ ស្រលាញ់នរណាម្នាក់ មិនមែនចាំបាច់ទាល់តែក្លាយជាម្ចាស់របស់គេនោះឡើយ។ តែពេលដែលកំពុងនៅក្បែរគ្នានោះ ត្រូវស្រលាញ់ឲ្យអស់ពីចិត្ត ប្រើមនោសញ្ចេតនាពិតប្រាកដមកដាក់គ្នា។ ដើម្បីថ្ងៃក្រោយ មានអ្វីកើតឡើងក៏មិនស្ដាយក្រោយ។

ប្រសិនបើដឹងថា និយាយកុហកនឹងធ្វើឲ្យរបួសចិត្តនោះ សូមរក្សាភាពស្ងៀមស្ងាត់វិញទៅ។ បើរក្សាភាពស្ងៀមស្ងាត់ធ្វើឲ្យអ្នកឈឺ សូមជ្រើសយកវិធីដើរចេញ។ សូមចងចាំថា នៅក្នុងកាលៈទេសៈណាក៏ដោយ យើងសុទ្ធតែមានជម្រើសទាំងអស់ កុំរស់នៅក្នុងភាពឈឺចាប់។

រូបតំណាង

មានរឿងមនោសញ្ចេតនាជាច្រើន ដឹងច្បាស់ថាមិនអាចបន្តទៅមុខទៀត តែមិនដាច់ចិត្តហាមាត់បញ្ចប់។ មនោសញ្ចេតនាខ្លះដឹងច្បាស់ថា នឹងឈឺខ្លាំង តែនៅប្រថុយហក់ចូល។ ឯខ្លះទៀត ច្បាស់ថានឹងគ្មានអនាគត តែមិនតែមិនព្រមបកក្រោយ។

នៅចុងបញ្ចប់ មនុស្សដែលយើងសម្រេចយកធ្វើប្ដី ឬប្រពន្ធនោះ មិនប្រាកដថាជាមនុស្សដែលយើងស្រលាញ់បំផុតនោះទេ តែព្រេងវាសនាបានកំណត់ថាដូចនោះទៅហើយ ទោះប្រឹងគេចយ៉ាងណាក៏មិនបានសម្រេច៕