គេកំពុងប្រើប្រាស់មនោសញ្ចេតនាអ្នកហើយបើ ៦សញ្ញាកើតឡើង

2019-02-22 07:25:29
ចំនួនមតិ 0 | ចំនួនចែករំលែក 0

មិនមែនគ្រប់គ្នាឲ្យតែចូលមកស្រឡាញ់អ្នក គេនឹងអាចពិតប្រាកដជាមួយអ្នកឡើយ ពេលខ្លះអ្នកគ្រាន់តែជារបស់ដែលគេប្រើប្រាស់ប៉ុណ្ណោះក៏ថាបាន។ បើស្នេហាដែលអ្នកមានរាល់ថ្ងៃមានរឿងដូចខាងក្រោមនេះ នោះបញ្ជាក់ថាគេកំពុងតែប្រើប្រាស់មនោសញ្ចេតនាអ្នកហើយ ៖

១. នៅក្បែរអ្នកពេលដែលគេអផ្សុក ឬត្រូវការឲ្យអ្នកជួយ

ឲ្យតែពេលគេពិបាកចិត្ត អផ្សុកគេតែងមករកអ្នកហើយ តែបើគ្មានរឿងអីវិញប្រហែលជាមិនទំនេរមករកអ្នកប៉ុន្មានទេ។ ម្យ៉ាងទៀតគេអាចមករកអ្នកពេលគេត្រូវការអីឲ្យអ្នកជួយ ឬពេលដែលអ្នកមានសារៈសំខាន់តែប៉ុណ្ណោះ។

រូបតំណាង

**២. គេមិនដែលបើកបង្ហាញទំនាក់ទំនងអ្នកទៅកាន់មនុស្សសំខាន់ៗឡើយ**

គេមិនដែលឲ្យគ្រួសារ បងប្អូន ឬមិត្តភ័ក្ដិជិតស្និទ្ធគេដឹងឡើយ។ គេតែតែលាក់បាំង គេចមុខគេចក្រោយនៅពេលដែលមានអ្នក នេះអាចនិយាយថាគេមិនដែលមានបំណងគិតពីអនាគតជាមួយអ្នកទេ គ្រាន់តែប្រើប្រាស់អ្នក បន្ទាប់មកក៏លែងទៅវិញ។

៣. មិនដែលនិយាយពីរឿងអនាគតជាមួយគ្នា

កុំថាឡើយគម្រោងបង្កើតគ្រួសារជាមួយអ្នក សូម្បីតែនិយាយក៏គេមិនដែលនិយាយផង ឬពេលខ្លះទៀតឲ្យតែនិយាយដល់រឿងហ្នឹងគេបង្វែរប្រធានបទ ឬមិននិយាយតែម្ដង។ និយាយទៅអ្នកមិនមែនជាមនុស្សដែលគេនឹកដល់ថ្ងៃរៀបការឡើយ។

រូបតំណាង

៤. គេមិនដែលណាត់ជួបអ្នក ឬឲ្យអំណោយអីឡើយ

មិនមែនការណាត់ជួប ឬអំណោយបង្ហាញថាគេស្រឡាញ់យើងពិតប្រាកដឡើយ ប៉ុន្តែរឿងទាំងនេះគឺជាផ្នែកមួយដែលបង្ហាញពីទឹកចិត្តគេចំពោះអ្នក។ បើមនុស្សស្រឡាញ់គ្នាមែន ការជួបគ្នា ការខ្វល់ខ្វាយ ការបារម្ភនឹងកើតឡើងដោយមិនបាច់ទាមទារ។

៥. គេខ្វល់តែអារម្មណ៍គេ

ភាពរីករាយរបស់គេគឺជារឿងសំខាន់បំផុត ទោះបីអ្នកមិនសប្បាយចិត្តក៏ដោយ។ គេមិនសូវជាខ្វល់ពីអ្នកប៉ុន្មានឡើយ ពេលមានរឿងម្ដងៗ គេទុកអ្នកចោលដោយមិនរវល់ ឬផ្សះផ្សាគ្នានោះទេ គឺទុករហូតដល់អ្នកទៅរកគេមុន ឬពេលគេអស់អ្នកនៅជាមួយទើបគេមករកអ្នកវិញ។

៦. គេតែងសុំពេលវេលា និងសេរីភាពពីអ្នក

គេចង់បានពេលផ្ទាល់ខ្លួនច្រើន ហើយមិនចង់ឲ្យអ្នករញ៉េរញ៉ៃ ឬសួរច្រើននោះទេ។ ទៅណាមកណាក៏គេមិនដែលប្រាប់អ្នក ហើយគេតែមានពេលសម្រាប់អ្នកផ្សេង ប៉ុន្តែសម្រាប់អ្នកវិញគឺគេគ្មានឡើយ។