ប្រពន្ធឆ្លាតតែងតែធ្វើបែបនេះ ពេលប្ដីមានស្រីក្រៅហើយសុំលែងគ្នា

2019-02-22 07:29:43
ចំនួនមតិ 0 | ចំនួនចែករំលែក 0

ប្តីប្រពន្ធមួយគូរៀបការហើយរស់នៅជាមួយគ្នាច្រើនឆ្នាំហើយ តែប្តីបែរជាមានស្រីក្រៅហើយសុំប្រពន្ធលែងគ្នា។ ស្រាប់តែប្រពន្ធធ្វើរឿងមួយនេះហើយប្តីក៏ប្តូរចិត្តវិញភ្លាម។

អរគុណ! ដែលជួយមើលថែប្ដីខ្ញុំជំនួសខ្ញុំអស់មួយរយៈធំ!

ថ្ងៃមួយខ្ញុំកំពុងតែអង្គុយមើលទូរទស្សន៍ ស្រាប់តែពេលនោះប្ដីខ្ញុំដើរមកប្រាប់ខ្ញុំថា «យើងលែងគ្នាទៅ» គាត់និយាយមុខមាំ មិនបានលេងសើចទេ។ មូលហេតុដែលខ្ញុំគិតឃើញមុនគេគឺប្រហែលមកពី ក្រុមហ៊ុនខាត់បង់លុយច្រើនជិតដួលរលំ ឬគាត់ប្រហែលជាជំងឺសាហាវអ្វីម៉្យាងដែលគាត់មិនចង់ឲ្យខ្ញុំពិបាកចិត្តជាមួយគាត់។ ប៉ុន្តែខ្ញុំរឹងមាំណាស់ ខ្ញុំកំពុងតែនឹងជិតផ្ដល់កំណើតកូនដំបូងឲ្យគាត់ទៀតផង។

ប៉ុន្តែប្រយោគទី២របស់គាត់ស្ទើរតែអាចសម្លាប់ខ្ញុំបាន « ខ្ញុំបានស្រលាញ់ស្រីផ្សេងហើយ ឲ្យខ្ញុំសុំទោស»។

«នៅពេលណា» ខ្ញុំប្រឹងអត់ធ្មត់ ហើយសួរគាត់។

គាត់ឆ្លើយ «កន្លះឆ្នាំហើយ យើងស្គាល់គ្នាពេលធ្វើដំណើរកម្សាន្ត។ នាងជាមគ្គុទ្ទេសក៍ ទេសចរណ៍ ជារឿងធម្មតាទេ ព្រោះគ្រប់គ្នាសុទ្ធតែស្រលាញ់ងប់ងុលនឹងនាង» ប្រហែលជាគាត់គិតថាពាក្យដែលគាត់សរសើរនាង នឹងធ្វើឲ្យខ្ញុំខូចចិត្ត ហើយគាត់មើលមកខ្ញុំដោយទឹកមុខមានកំហុស។

ខ្ញុំសួរទៀត «ស្រលាញ់នាងខ្លាំងទេ?»

«ស្រលាញ់នាងខ្លាំងណាស់» គាត់ឆ្លើយ

ខ្ញុំមិនបានសួរច្រើនទេ ព្រោះសួរច្រើននឹងធ្វើឲ្យខ្ញុំឈឺចាប់កាន់តែខ្លាំង។ ខ្ញុំគួរតែទុកមុខឲ្យខ្លួនឯងវិញទើបល្អ។

អនុស្សាវរីយ៍ខ្ញុំជាមួយប្ដីខ្ញុំមានរាល់ថ្ងៃ។ ពួកយើងសប្បាយរីករាយណាស់។ ប៉ុន្តែគាត់បានប្ដូរចិត្តរូចទៅហើយ ហេតុអ្វីខ្ញុំត្រូវស្លាប់ ម៉េចមិនឲ្យគាត់ទៅ? ខ្ញុំក្រោកឈរហើយដកដង្ហើមធំ «ខ្ញុំយល់ពីអ្វីដែលបងនិយាយហើយ ពិតជាគួរឲ្យសរសើរណាស់ដែលស្រីម្នាក់ទៀតបានយកចំណងគួរឲ្យខ្លាចរបស់បងចេញពីខ្ញុំបាន» គាត់មើលមកខ្ញុំយ៉ាងភ្ញាក់ផ្អើល ហើយគាត់ក៏ដឹងថាខ្ញុំមិនមែនជាមនុស្សស្រីចិត្តទូលាយបែបនេះដែរ។

«ពិតណាស់ខ្ញុំមានសុភមង្គលខ្លាំងដែលនៅក្បែរបង ប៉ុន្តែបងមិនដែលមានខ្ញុំនៅក្នុងចិត្តទេ»។

គាត់មានអារម្មណ៍ថាខុសខ្លាំងចំពោះខ្ញុំ គាត់ក៏សម្រេចចិត្តចាកចេញដោយទុកអ្វីៗទាំងអស់នៅក្នុងផ្ទះឲ្យខ្ញុំនិងកូន។

មុនពេលលែងគ្នាគាត់បានហៅខ្ញុំទៅញ៉ាំបាយជាមួយគាត់។ គាត់ប្រាប់ខ្ញុំថាគាត់ចង់បានការជូនពរពីខ្ញុំ ហើយគាត់ក៏បាននិយាយពីក្មេងស្រីម្នាក់នោះ។ គាត់ប្រាប់ថាជីវិតគាត់ស្រស់ថ្លាណាស់ពេលនៅក្បែរនាង ដោយសារនាងមានភាពរស់រវើក ស្រស់ស្អាត និងទាក់ទាញណាស់។ វាខុសគ្នាដាច់រវាងស្នេហារបស់ខ្ញុំនិងគាត់ បើប្រៀបជាមួយស្នេហាថ្មីរបស់គាត់។

គាត់ប្រាប់ថា«នាងស្រួលណាស់ គ្រាន់តែរឿងតិចតួចសោះក៏ធ្វើឲ្យនាងសប្បាយចិត្តបានដែរ គ្រាន់ជូននាងដើរទិញឥវ៉ាន់ ប៉ាវនាងញ៉ាំអីនៅកន្លែងថ្លៃៗ ឲ្យលុយនាងចាយ១ថ្ងៃ ២០ដុល្លារទៅបានហើយ ។ នៅជាមួយនាងខ្ញុំមានអារម្មណ៍ធូរស្រាលណាស់ ជក់បារីនៅក្នុងផ្ទះក៏បាន ដើរលេងទល់ភ្លឺជាមួយមិត្តភក្តិក៏បាន » គាត់និយាយហើយភ្នែករបស់គាត់ពោរពេញដោយសុភមង្គល។

ហើយខ្ញុំវិញមិនសូវប្រើទឹកមុខរីករាយជាមួយគាត់ទេ។ ខ្ញុំតែងតែ សួរគាត់រាល់ការចំណាយទាំងអស់សូម្បីតែទិញស្រោមជើងមួយគូក៏ដោយ។ ខ្ញុំមិនចង់ឲ្យគាត់ជក់បារី មិនឲ្យគាត់ផឹកស្រា ហើយហាមគាត់ច្រើនរឿងទៀត។

គាត់និយាយទៀតថា «ពេលនៅជាមួយនាងបេះដូងខ្ញុំលោតញាប់ណាស់ ហើយរាងកាយពុះកញ្ជ្រោលតែម្ដង» ខ្ញុំគិតថាគាត់ប្រហែលជាស្រវឹងតិចៗហើយ។

ខ្ញុំកាត់គាត់៖

«ចឹងចាប់ពីពេលនេះទៅអូននឹងមិនឲ្យបងឃើញទឹកមុខគួរឲ្យធុញរបស់អូនទៀតទេ ហើយក៏មិនមែនជាអ្នកបម្រើដែលបងត្រូវឲ្យប្រាក់ខែរាល់ខែទៀតដែរ

អូនមិនចាំបាច់ខាតពេលអ៊ុតសម្លៀកបំពាក់ និងចងក្រវាត់កឲ្យបង

មិនចាំបាច់យកលុយទៅទិញសម្លៀកបំពាក់ឲ្យបង

មិនចាំបាច់យកខួរក្បាលទៅគិតថាត្រូវយកត្រីទៅធ្វើម្ហូបអីដើម្បីផ្គាប់ក្រពះបង មិនចាំបាច់ចម្អិនអាហារ ហើយខ្ញុំអាចចេញទៅញ៉ាំអីនៅខាងក្រៅបាន

មិនចាំបាច់ខ្វល់ខ្លាចថាបងជក់បារីធ្វើខូចសួត និងផឹកស្រាបំផ្លាញថ្លើមទៀតទេ

មិនចាំបាច់បោកខោអាវស្រោមជើងស្អុយរបស់បងទៀតទេ

មិនចាំបាច់ត្រូវខ្វល់ជាមួយមនុស្សចាស់ក្នុងគ្រួសារបង មិនចាំបាច់ឲ្យថ្លៃចាយវាយទៅម្ដាយឪពុករបស់បងរាល់ខែ

មិនចាំបាច់ចំណាយពេល១ថ្ងៃកន្លះរាល់ឆ្នាំ ជិះឡានឡើងហត់ ជួរឥវ៉ាន់ថង់ធំៗ កាត់ព្រៃកាត់ភ្នំរាប់សិបគីឡូដី គ្រាន់តែទៅញ៉ាំបាយពេលល្ងាចជាមួយប៉ាម៉ាក់បងទៀតទេ អូខេ បានលែងគ្នាក៏ល្អដែរ!»

ពេលនោះទឹកភ្នែកខ្ញុំស្រកចុះ តែខំប្រឹងធ្វើជាមិនអី។ គាត់សួរខ្ញុំថា «អូនមិនអីទេមែនទេ?»

ខ្ញុំនិយាយទៀតថា «ខ្ញុំមិនមែនជាស្រីស្រួលផ្គាប់ចិត្តទេ ខ្ញុំមិនស្អាត ប៉ុន្តែខ្ញុំមានក្តីសុខពេលឃើញបងសប្យាយចិត្ត ហើយស្រលាញ់បងខ្លាំងណាស់ ប៉ុន្តែជីវិតដែលរៀបការហើយពិតជាស្មុគស្មាញ ខ្ញុំត្រូវចែករំលែកក្តីស្រលាញ់ឲ្យម្ដាយឪពុកក្មេក ធ្វើជាកូនប្រសាល្អ ណាមួយត្រូវមើលថែកូនក្នុងពោះ ធ្វើការងារផ្ទះ គ្មានពេលគ្រប់គ្រាន់ធ្វើខ្លួន ឲ្យស្អាតនិងរីករាយផ្គាប់ចិត្តប្តីទេ។ ប៉ុន្តែអូនពិតជានឹកការកាន់ដៃដ៏សែនកក់ក្តៅរបស់បង ចង់ឲ្យបងឱបអូន ហើយសួរថាថ្ងៃនេះអូនហត់ទេ កូនយើងធ្វើទុកទេ? ប៉ុន្តែរាល់ថ្ងៃមានតែការឈ្លោះប្រកែកគ្នា ហើយរឹតតែឈឺចាប់បំផុតនៅពេលដឹងថាស្រីម្នាក់ណាក៏មិនដឹងកំពុងតែបំផ្លាញសុភមង្គលរបស់អូន ហើយនឹងដណ្ដើមបងយកទៅទៀត សួរថាតើអូនមានអារម្មណ៍យ៉ាងណា? តែបងប្រហែលជាគិតថាអូនជាមនុស្សស្រីមិនចេះឈឺចាប់ទេ ព្រោះរាល់ថ្ងៃអូនជាស្រីដែលចេះតែធ្វើការងារផ្ទះដូចអ្នកបម្រើម្នាក់ប៉ុណ្ណោះក្នុងភ្នែកបង»

ចុងបញ្ចប់គាត់ក៏បដិសេធមិនព្រមលែងគ្នាជាមួយខ្ញុំវិញ។

ខ្ញុំសួរថា ហេតុអី?

គាត់ប្រាប់ថា «ផ្ទះគឺមិនងាយទិញបានទេ បើគ្មានលុយ ហើយពិតណាស់គ្មាននរណាម្នាក់ស្គាល់បងច្បាស់ជាងអូនទេ ហើយគ្មានអ្នកណាអាចជំនួសអូនបានដែរក្នុងភ្នែករបស់កូនយើង។ បងខំប្រឹងធ្វើការយ៉ាងលំបាកយូរហើយព្រោះតែចង់ផ្លាស់ប្ដូរជីវភាពគ្រួសារយើង ប៉ុន្តែបងស្ទើរតែបំផ្លាញខ្លួនឯងទាំងមិនដឹងខ្លួន។ ប្រពន្ធសម្លាញ់ឲ្យបងសុំទោស មនុស្សស្រីដែលស្រលាញ់បងពិតប្រាកដ ហើយតែងនៅក្បែរបងគឺជាអូន ហើយមនុស្សដែលបងមិនអាចខ្វះបានគឺជាអូនតែម្នាក់គត់»

ស្នេហាមិនមែនជាការដេកជាមួយគ្នា១យប់ទេ។ តែស្នេហាគឺជាការដេកកើយខ្នើយមួយជាមួយគ្នាពេញមួយជីវិត។ អរគុណស្រីម្នាក់នោះហើយ ដែលជួយមើលថែប្ដីខ្ញុំជំនួសខ្ញុំកន្លងមក។ ក៏អរគុណនាងដែរ ដែលធ្វើឲ្យប្ដីខ្ញុំដឹងថាអ្នកណាដែលគាត់ស្រលាញ់បំផុត។

អត្ថបទ៖ ឃួន សុលីកា