មនុស្សស្រីរូបណាក៏មានសេរីភាពពេញលេញ រហូតដល់មុនពេលយកប្ដី

2019-02-08 02:30:00
ចំនួនមតិ 0 | ចំនួនចែករំលែក 0

សុភមង្គលណាក៏ត្រូវលះបង់ សេរីភាពមួយណាក៏គង់មានពេលបញ្ចប់។ នារីរូបណាក៏ធ្លាប់មានជីវិតរីករាយ ធូរស្រាលមុនពេលឈានជើងចូលជីវិតមង្គលការដែរ។

សួរថាមានមនុស្សស្រីណាម្នាក់ដែលមិនត្រូវចាកចេញពីរង្វង់ដៃឪពុកម្ដាយ ហើយទៅសាងគ្រួសារខ្លួនឯងនោះ។ ក្ដីស្រមៃដ៏តូចតាចរបស់ស្ត្រីមានគ្រួសារខ្លះគឺ គ្រាន់តែចង់មានមួយថ្ងៃសម្រាប់ខ្លួនឯង មិនគិតរឿងផ្ទះសម្បែង មិនគិតរឿងធ្វើម្ដាយ ក៏ដូចជាប្រពន្ធគេ រស់នៅដូចកាលនៅលីវ។ តែក្ដីស្រមៃនេះហាក់នៅឆ្ងាយខ្លាំងណាស់ ត្បិតនៅពេលដែលបោះជើងចូលជីវិតគូហើយ គឺគ្មានថ្ងៃណាមួយដែលទំនេរនោះឡើយ។

ថ្ងៃធម្មតារបស់មនុស្សស្រីនៅលីវគឺ ក្រោកឡើងគឺចាប់ផ្ដើមដោយការតុបតែងខ្លួនឯង មើលខ្លួនក្នុងកញ្ចក់ ដល់ពេលពេញចិត្តហើយ ទើបដើរចេញពីផ្ទះ។ រីឯថ្ងៃថ្មីរបស់មនុស្សស្រីមានប្ដី គឺចាប់ផ្ដើមដោយសំឡេងគងរំពង ព្រោះកូនយំ ប្ដីស្រែករកខោអាវទៅធ្វើការ ផ្ទះបាយលាន់ក្ដុងក្ដាំង ព្រោះត្រូវធ្វើម្ហូបឲ្យប្ដី និងកូន។ ដល់ពេលជូនកូនទៅរៀន មុខដូចខ្មោច ព្រោះសូម្បីតែក្រែមមិនបានលាបផង កុំថាឡើយពេលធ្វើខ្លួនដូចកាលនៅក្រមុំ។

ពេលយប់របស់អ្នកនៅលីវគឺ ជួបជុំគ្នាញ៉ាំអី មើលកុន ដើរទិញឥវ៉ាន់ជាមួយក្រុមមិត្តភ័ក្ដិ មកផ្ទះវិញ ក៏បិទម៉ាសធ្វើខ្លួន ធ្វើមិនដឹង។ ឯផ្ទះជិតខាង បងស្រីដែលមានប្ដី ក្បាលល្ងាចឡើងមិនទាន់ ឡើងធ្វើម្ហូប ដាក់ដាំបាយ បណ្ដើរ បោកខោអាវបណ្ដើរ រួចចេញទៅទទួលកូន។ បាយហើយ ប្ដីមើលទូរទស្សន៍ កូនរៀន ឯម៉ែវិញនៅឈ្ញោកលាងចានគ្មានអ្នកណាខ្វល់ជាមួយ។ ដល់យប់អធ្រាត្រពេលកូនចូលដេកហើយ ទើបបានសម្រាកខ្នងខ្លួនឯង។ ស្រីអត់ប្ដី ចុងសប្ដាហ៍ដេកទាល់តែថ្ងៃចាំងចូលដល់បន្ទប់ មិនទាន់ងើបផង។ ស្រីមានប្ដី ចង់ចុងសប្ដាហ៍ ឬចូលឆ្នាំទៀត ក៏ងើបពីងងឹតដូចគ្នា។ ៣៦៥ ថ្ងៃ គ្មានថ្ងៃណាខុសគ្នា។ ចង់ស្អាត ឬអាក្រក់ មាន ឬក្រ នៅលីវគឺតែងធូរស្រាល ជាងអ្នកមានគ្រួសារ។ មិនមែនចង់និយាយថា មានគ្រួសារហើយវេទនាអីនោះទេ គ្រាន់តែមានគ្រួសារហើយ ហាក់ដូចជាឆ្លងទៅទំព័រជីវិតថ្មីមួយទៀត។

ពេលនៅលីវ ប្រៀបដូចពងមាស ពងប្រាក់របស់ម៉ែឪ។ ក្លាយជាកូនប្រសារគេហើយ សូម្បីតែញ៉ាំបាយ ក៏មើលទឹកមុខគេដែរ។ ប៉ះបានប្ដីល្អមិនថាទេ ប៉ះប្ដីទុរយស្ស ចាត់ទុកថាឆាចោលតែម្ដង។ តម្លៃនៃសុភមង្គលពេលខ្លះ មានអារម្មណ៍ថាថ្លៃខ្លាំងណាស់ ហើយពេលខ្លះត្រូវអត់ធន់ខ្លាំងដើម្បីទទួលបានវា៕

ចុចអាន៖ស្រលាញ់អ្នកគឺជារឿងតែមួយគត់ ដែលក្លាហានបំផុតសម្រាប់ខ្ញុំធ្លាប់ធ្វើ

ប្រភព៖ Guu អត្ថបទ៖Caramel