បើជួបមនុស្សប្រុស៧ប្រភេទនេះ ស៊ូនៅម្នាក់ឯងគ្រាន់បើជាងមានស្នេហា

2019-01-28 09:00:00
ចំនួនមតិ 0 | ចំនួនចែករំលែក 0

មនុស្សស្រីយើង មុនជ្រើសរើសបុរសណាម្នាក់ជាគូស្នេហ៍ ត្រូវចេះពិនិត្យមើលឲ្យបានគ្រប់ជ្រុងជ្រោយសិន ទើបមិនឈឺចាប់ខ្លាំង ឬស្តាយក្រោយបន្ទោសខ្លួនឯងទៅថ្ងៃមុខ។ បើអ្នកសង្កេតឃើញថា មនុស្សប្រុសម្នាក់នោះមាន៧ចំណុចដូចខាងក្រោម សុខចិត្តគ្មានស្នេហា នៅម្នាក់ឯងវិញល្អជាង។

១. មនុស្សប្រុសបង់សំណាញ់

គេចាត់ទុកមនុស្សស្រីដូចជាត្រីក្នុងទន្លេ ឲ្យតែឃើញគឺត្រូវតែបង់សំណាញ់ បានមួយណាយកមួយហ្នឹងមិនរើសមុខ។ បើញ៉ែមិនបានថ្ងៃនេះ ថ្ងៃស្អែកឬខានស្អែក គេនឹងទៅញ៉ែស្រីណាផ្សេងទៀត ក្រៅពីអ្នក។ ដូច្នេះមនុស្សស្រីត្រូវប្រកាន់តម្លៃក្នុងខ្លួន កុំធ្វើជាជម្រើសមួយក្នុងចំណោមរបស់កខ្វក់ទាំងអស់នោះ។

២. មនុស្សប្រុសឆ្លៀតឱកាស

អាចហៅម្យ៉ាងទៀតថា បុរសដៃមឹក ឲ្យតែមានឱកាសគឺឆ្លៀតបន្លំ ប៉ះរាងការរបស់អ្នកឥតកេរ្តិ៍ខ្មាស។ គេមិនបានផ្តល់កិត្តិយស ឬមើលទៅលើទឹកចិត្តខាងក្នុងដែលអ្នកមានឡើយ ផ្តោតសំខាន់តែលើសំបកក្រៅ។

៣. មនុស្សរិះគន់ពីរូបរាងរបស់អ្នក

មិនគួរណាអ្នកនៅជិតមនុស្សប្រុសដែលធ្វើឲ្យអ្នកបាត់បង់ទំនុកចិត្តបែបនេះទេ។ គេហ៊ាននិយាយបង្អាប់ថា អ្នកធាត់ មិនស្អាត ស្បែកខ្មៅ ជើងមិនស្រឡូន និយាយរួមទៅគេមិនចិត្តនឹងសម្រស់របស់អ្នកតែម្តង។ ទោះយ៉ាងណា គួរកុំខ្វល់អីល្អជាង សំខាន់ត្រូវចេះស្រឡាញ់ខ្លួនឯងឲ្យច្រើនៗ។ ថ្ងៃណាមួយគង់តែជួបស្នេហ៍ពិតមិនខានទេ។

៤. មនុស្សប្រុសបង្ខំ

មនុស្សប្រុសប្រភេទនេះ ធ្វើអ្វីមិនសូវមានហេតុផល គ្មានសីលធម៌ មិនស្តាប់និងគោរពលើការសម្រេចចិត្តរបស់អ្នកដទៃ។ បើអ្នករស់នៅជាមួយនឹងការបង្ខិតបង្ខំគ្រប់ពេលវេលា ជីវិតរកក្តីសុខមិនឃើញទេ។

៥. មនុស្សប្រុសលេសមួយរយជំពូក

គេពូកែនិយាយកុហក ប៉ិននឹកគិតយកលេសមកដោះស្រាយបញ្ហាមិនចេះចប់។ រ៉ាយរ៉ាប់១០ម៉ាត់ រកមួយម៉ាត់ជឿសឹងមិនឃើញ។ ស្នេហាដែលសម្បូរតែពាក្យក្លែងក្លាយ ខ្វះទំនុកចិត្ត យូរឬឆាប់នឹងត្រូវគ្រាំចិត្តប្រេះឆា។ យល់ល្អគួរដកខ្លួនឲ្យហើយទៅ។

៦. មនុស្សប្រុសធ្វើចរិតមេ

នៅកន្លែងធ្វើការឬរកស៊ី មានកូនចៅក្រោមបង្គាប់ ដូច្នេះភាពម៉ឺងម៉ាត់ ការបញ្ជាគឺជារឿងដែលត្រូវធ្វើចាំបាច់ ប៉ុន្តែបើមកដល់ផ្ទះ នៅធ្វើចរិតមេ ចង់គ្រប់គ្រងប្រពន្ធ ឲ្យសា្តប់តាមគ្រប់បែបយ៉ាងនោះ ទៅមិនរួចទេ។ មនុស្សស្រីណាក៏ចង់មានតម្លៃ មានជំហរផ្ទាល់ខ្លួនដែរ មិនមែនចង់បង្វិលឲ្យទៅខាងណា ក៏ទៅតាមដូចចិត្តឡើយ។

៧. មនុស្សប្រុសមាត់ដាច

គេថាមនុស្សប្រុសមិនសូវចេះនិយាយដើមដូចមនុស្សស្រី តែច្រឡំធំហើយ បើប៉ះចំប្រុសមាត់ដាចវិញ សម្តីហូរដូចទឹកក្នុងលូ។ ទៅដល់ទីណា ស្អុយឈ្មោះទីនោះ ពិសេសពេលជួបជុំស៊ីផឹកជាមួយមិត្តភ័ក្តិហ្នឹងតែម្តង។ មានបញ្ហាអីតិចតួច មិនចេះលាក់ សូម្បីតែរឿងឯកជនផ្ទាល់ខ្លួន ក៏ត្រូវបែកធ្លាយខ្ទេចខ្ទីគ្មានសល់៕

ចុចអានបន្ត៖ ប្ដីមានស្រីនៅក្រៅ តើគួរវ៉ៃស្រីកំណាន់ប្ដី ឬបោះបង់ប្ដីដែលផិតក្បត់ចោល?

ប្រភព៖ rugyim ប្រែសម្រួល៖ ដេត ឈុនអ៉ី