មនុស្សស្រីទាន់សម័យត្រូវចេះស្រលាញ់ខ្លួនឯង និងរកលុយ ជាជាងកើតទុក្ខរឿងស្នេហា

2019-01-27 08:30:00
ចំនួនមតិ 0 | ចំនួនចែករំលែក 0

បើគិតទៅ ទោះបីជាអ្នកដាក់ចិត្តដាក់កាយស្រលាញ់គេយ៉ាងណាក៏មិនប្រាកដថាអ្នកអាចនឹងទទួលលទ្ធផលសមគួរដែរ។ តែបើអ្នកព្យាយាមធ្វើការ នោះញើសឈាមរបស់អ្នកនឹងត្រូវបានតបស្នងយ៉ាងស័ក្ដិសម។

ហើយបើទោះបីជានៅក្នុងកាលៈទេសៈណាក៏ដោយ នៅពេលមនុស្សស្រីជោគជ័យនឹងធ្វើមនុស្សស្រីដទៃសរសើរ និងមនុស្សស្ញប់ស្ញែង។ ឯករាជ្យរឿងលុយកាក់នឹងធ្វើឲ្យនារីជឿជាក់លើខ្លួនឯង ហើយការជឿជាក់ក៏ដូចជាអាវុធរបស់ពួកគេដែលមិនមែនស្រីណាក៏មាននោះដែរ។

អង្គុយយំក្នុងឡាន ឬក្នុងបន្ទប់ដ៏ប្រណិតមួយក៏គ្រាន់បើជាងយំនៅចិញ្ចើមផ្លូវ និងនៅក្នុងបន្ទប់ដ៏ងងឹតដែរ។ មនុស្សស្រីមានលុយ ពេលស្រក់ទឹកភ្នែក ក៏ស្រក់នៅកន្លែងឡូយជាងដែរ។

មនុស្សប្រុសក្រោយពេលបែកគ្នា បើអ្នកក្លាយជាអាក្រក់ ហើយសូម្បីតែការងារក៏គ្មាននោះ គេនឹងមានចិត្តអាណិតអាសូរ។ តែបើអ្នកបែកគ្នាហើយកាន់តែស្អាតលើសដើម ព្រមទាំងជោគជ័យរឿងការងារទៀតនោះ គេនឹងស្ដាយក្រោយ។

ដូចនេះហើយ នារីវាងវៃនឹងរៀនវិធីស្រលាញ់ខ្លួនឯង និងរកលុយឲ្យបានច្រើន។ សង្គមនៅមានភាពលម្អៀងលើមនុស្សស្រី ដូចនេះមានតែយើងទេដែលអាចកំណត់ថាតម្លៃខ្លួនឯងនឹងស្ថិតនៅចំណុចណា។

តារាសម្ដែងស្រី Fan Bingbing ធ្លាប់និយាយថា៖ "ខ្ញុំមិនត្រូវការយកប្ដីជាមហាសេដ្ឋីនោះទេ ព្រោះខ្លួនខ្ញុំផ្ទាល់គឺជាសេដ្ឋីនីរួចហើយ"។ ជាមនុស្សសម័យទំនើប ត្រូវធ្វើឲ្យខ្លួនជោគជ័យលើវិថីអាជីពឲ្យទាល់តែបាន៕