ចូលរួមបោះឆ្នោតឱ្យកីឡាការិនីខ្មែរតំណាងកីឡាប៉េតង់ពិភពលោកក្លាយជាអត្តពលិកឆ្នើមប្រចាំឆ្នាំ២០១៨

2019-01-11 03:01:55
ចំនួនមតិ 0 | ចំនួនចែករំលែក 0

កម្មវិធីជ្រើសរើសពានរង្វាន់អត្តពលិកឆ្នើមប្រចាំឆ្នាំ២០១៨ទូទាំងពិភពលោកបានចាប់ផ្ដើមដាក់ឱ្យបោះឆ្នោតហើយ។ សម្រាប់កីឡា២៥ប្រភេទមានអត្តពលិកតែម្នាក់ៗគត់តំណាងមកពីជុំវិញពិភពលោក ក្នុងនោះកីឡាប៉េតង់ ត្រូវតំណាងដោយអត្តពលិកខ្មែរ អ្នកស្រី កែ ឡេងដែលជាកីឡាការិនីប៉េតង់ឆ្នើមបំផុតលំដាប់ពិភពលោក បន្ទាប់ពីឈ្នះមេដាយមាសពិភពលោក៣លើកជាប់គ្នាគឺឆ្នាំ២០១៣ ២០១៥ និង២០១៧។

នេះជាមោទនភាពបំផុតសម្រាប់កម្ពុជាដែលសហព័ន្ធកីឡាប៉េតង់ និងប៊ូលអន្តរជាតិជ្រើសរើសយកអត្តពលិកកម្ពុជាដើម្បីប្រកួតប្រជែងជាមួយកីឡាផ្សេងៗទៀត ហើយនេះជាលើកទី១ដែលកម្ពុជាមានអត្តពលិកឆ្នើមចូលរួមប្រកួតប្រជែង។

ដូច្នេះសូមកូនខ្មែរចូលរួមបោះឆ្នោតឱ្យអ្នកស្រី កែ ឡេង ដើម្បីអាចមានឱកាសបន្តទៅជម្រុះដណ្ដើមពានរង្វាន់អត្តពលិកពិភពលោកឆ្នើមប្រចាំឆ្នាំ២០១៨ ដោយចុចត្រង់នេះ!

លក្ខខ័ណ្ឌនៃការបោះឆ្នោត គឺ៖

១. ម្នាក់ៗមានសិទ្ធិបោះបានតែម្ដងប៉ុណ្ណោះក្នុងរយៈពេល២៤ម៉ោង (ក្រោយពីនោះអាចបោះបានម្ដងទៀត)

២. សម្រាប់អ្នកដែលសរសេរនាម-គោត្តនាម អ៊ីម៉េល និងយល់ព្រមទទួលយកប័ណ្ណព័ត៌មានរបស់កម្មវិធីក្នុងពេលបោះឆ្នោត នឹងទទួលបានសិទ្ធិបោះបាន២ដង ជាអាទិភាព (ព័ត៌មានលម្អិតនឹងមានបង្ហាញជូននៅក្នុងអ៊ីម៉េលដែលអ្នកបានទទួល)

៣. អត្តពលិកឆ្នើមដែលជាប់ដោយការបោះឆ្នោត១០នាក់ដំបូងដែលអាចឈរឈ្មោះបោះឆ្នោតបន្ត នឹងត្រូវប្រកាសនៅថ្ងៃទី១៥ មករា ២០១៩ ម៉ោង៩យប់ CET (ម៉ោងនៅអឺរ៉ុប) ត្រូវនឹងថ្ងៃទី១៦ មករា ២០១៩ ម៉ោង៣ទៀបភ្លឺ (ម៉ោងនៅកម្ពុជា)

៤. ការបោះឆ្នោតនឹងបញ្ចប់នៅថ្ងៃទី៣១ មករា ២០១៩ ម៉ោង៨យប់ CET ត្រូវនឹងថ្ងៃទី១ កុម្ភៈ ២០១៩ ម៉ោង២ទៀបភ្លឺ (ម៉ោងនៅកម្ពុជា)

អត្ថបទ៖ សរ សុគន្ធី