ស្រលាញ់គ្នាត្រូវតែឲ្យ password Facebook គ្នា? ឬក៏មកពីទំនុកចិត្តមិនទាន់គ្រប់គ្រាន់
- 2018-12-31 04:00:00
- ចំនួនមតិ 0 | ចំនួនចែករំលែក 0
ស្រលាញ់គ្នាត្រូវតែឲ្យ password Facebook គ្នា? ឬក៏មកពីទំនុកចិត្តមិនទាន់គ្រប់គ្រាន់
ក្នុងសម័យកាលដែលមនុស្សសឹងគ្រប់រូបសុទ្ធតែមានគណនីបណ្ដាញសង្គមនោះ អ្នកដែលមានគូតែងផិតភ័យ ព្រោះមិនដឹងថាក្រៅពីខ្លួន សង្សាររបស់ពួកគេនៅមានទាក់ទងនរណាទៀតឬអត់។ តែអ្នកច្បាស់ទេថា យកបានលេខសម្ងាត់គណនីរបស់គេ អ្នកនឹងមានសុវត្ថិភាពនោះ?
សព្វថ្ងៃនេះ បណ្ដាញសង្គមប្រៀបដូចជាកាំបិតមុខ២ អ្នកអាចដឹងពីលេខសម្ងាត់បណ្ដាញសង្គមរបស់សង្សារទាំងអស់ ក៏មិនប្រាកដថាអ្នកកំពុងក្ដាប់បានបេះដូងរបស់គេដែរ។ ក្នុងរឿងមនោសញ្ចេតនា ប្រសិនបើគេស្រលាញ់អ្នកពិត អ្នកមិនចាំបាច់ត្រួតត្រាអ្វីទាំងអស់ ក៏គេនៅតែជារបស់អ្នក។ ជាក់ស្ដែង ការស្ទង់មតិជាច្រើនបានបង្ហាញឲ្យឃើញថា ការដឹងពី password របស់ដៃគូធ្វើឲ្យភាគីម្ខាងទៀតមានអារម្មណ៍តប់ប្រមល់។
សាកគិតចុះ ឧទាហរណ៍ថា អ្នកទាំង២ចែករំលែក password ឲ្យគ្នាដឹង ស្រាប់តែមួយរយៈក្រោយមក ស្រាប់តែគេប្ដូរ password អ្នកប្រាកដជាកើតចិត្តសង្ស័យ ដែលអចេតនាធ្វើឲ្យស្នេហារបស់អ្នកចាប់ផ្ដើមរង្គោះរង្គើ។ ដឹងកាន់តែច្បាស់ កាន់តែអន់ចិត្តតែប៉ុណ្ណោះ ដូចជាសាររបស់គេ និងអ្នកចាស់ជាដើម។ មានករណីជាច្រើនដែលទោះបីជាបែកគ្នាហើយ ក៏គេមិនលុបសារទាំងនោះដែរ។ នៅពេលដែលយើងឆែកឆេរហើយឃើញនោះ ប្រាកដជាអន់ចិត្តមិនតិចឡើយ។ ផ្ទុយមកវិញ ប្រសិនជាមិនដឹង ប្រាកដជាបានធូរទ្រូងច្រើនណាស់ ព្រោះទោះបីជាគេធ្លាប់ផ្អែមល្ហែមនឹងគ្នាកម្រិតណាក៏ដោយ ក៏វាគ្រាន់តែជារឿងអតីតកាលតែប៉ុណ្ណោះ។
សរុបមកវិញ ការជឿទុកចិត្តគ្នាមិនមែនស្ថិតលើ password មួយនោះទេ ព្រោះអ្វីដែលជារបស់យើង នៅតែជារបស់យើង។ ត្រូវចាំទុកថា ចំណងកាន់តែរឹត កាន់តែងាយដាច់។ មានតែក្ដីទុកចិត្តគ្នាពិតប្រាកដប៉ុណ្ណោះ ទើបអាចដើរជាមួយគ្នាបានយូរអង្វែង៕
ចុចអាន៖យកឈ្នះមនុស្សប្រុសបេះដូងដែកបានយ៉ាងងាយ ដោយគ្រាន់តែប្រើវិធីនេះ