ចែករំលែករូបមន្តធ្វើទឹកជ្រលក់គ្រឿងសមុទ្រ ឲ្យបានឆ្ងាញ់ដោយខ្លួនឯង

2018-12-12 07:37:15
ចំនួនមតិ 0 | ចំនួនចែករំលែក 0

សម្រាប់អ្នកត្រូវការទឹកជ្រលក់មកជ្រលក់គ្រឿងសមុទ្រ ថ្ងៃនេះ កញ្ញា សូមចែករំលែករូបមន្តធ្វើទឹកជ្រលក់ខ្លះ ដែលប្រិយមិត្តអាចយកទៅសាកល្បងធ្វើខ្លួនឯងបាន ហើយអាចបន្ថែមគ្រឿងគ្រៅតាមចូលចិត្ត អ្នកណាចូលចិត្តផ្អែមអាចថែមស្ករ អ្នកណាចូលចិត្តជូរបន្តិច អាចថែមទឹកក្រូចឆ្មារ។ អីចឹងកុំឲ្យខាតពេលច្រើន តោះទៅមើលពីគ្រឿងផ្សំ និងវិធីធ្វើខាងក្រោមនេះតែម្ដង៖

គ្រឿងផ្សំ៖

១. ជីរវ៉ាន់ស៊ុយ ៤ខាំ

២. ខ្ទឹមស ៤ខាំ

៣. ម្ទេសខៀវ ម្ទេសក្រហម ៤ខាំ

៤. ស្ករត្នោត ១គីឡូ ឬតិចជាងនេះបន្តិចសម្រាប់អ្នកមិនចូលចិត្តផ្អែម

៥. អំបិល ៥ស្លាបព្រា

៦. ទឹកក្រូចឆ្មារ ៤វែក

៧. ទឹកដាំពុះ ៣វែកកន្លះ

៨. ប៊ីចេងតាមចូលចិត្ត

វីធីធ្វើ

ជាដំបូងគេ គឺត្រូវដាំទឹក។ ចន្លោះពេលដាំទឹក អាចត្រៀមឆ្នាំង ឬចានដែកតូចមួយដាក់ស្ករត្នោត ប៊ីចេង និងអំបិលចូល លុះដល់ទឹកពុះ ចាក់ទឹកចូលចំនួន ៣វែកកន្លះ ហើយកូរឲ្យរលាយស្ករ។

ពេលកូរល្មមរលាយស្ករ និងអំបិលហើយ ទើបដាក់ទឹកក្រូចឆ្មារចូលប្រមាណ ៤ទៅ៥វែក កូរឲ្យសព្វ រួចទុកមួយអន្លើ។

ត្រៀមគ្រឿងផ្សេងៗទៀតដូចជា ជីរវ៉ាន់ស៊ុយ (យកទាំងដើម ទាំងស្លឹក និងឬស) ខ្ទឹមសបកឲ្យស្អាត ម្ទេសក្រហម និងម្ទេសខៀវតាមចូលចិត្ត។ ពេលត្រៀមរួច យកគ្រឿងផ្សំទាំងអស់មកដាក់កិនក្នុងម៉ាស៊ីនក្រឡុករួមជាមួយទឹកស្ករដែរ។

វិធីក្រឡុកមានពីរដំណាក់កាល។ ដំណាក់កាលទី១ ត្រូវក្រឡុកគ្រឿងផ្សំទាំងអស់ដោយប្រើល្បឿនមធ្យម។ នៅពេលម៉ដ្ឋបន្តិច ទើបចុចឈប់សិន ហើយក្រឡុកម្ដងទៀតដោយប្រើល្បឿនលឿន។ ពេលក្រឡុករួច អាចចាក់ចូលដប ឬក្រឡទុកប្រើការបានហើយ ៕