បវរកញ្ញាថៃ ត្រូវគេបោកប្រាស់អស់កន្លះលានដុល្លារព្រោះចង់បង្កើតគណបក្សផ្ទាល់ខ្លួន

2018-10-25 02:30:46
ចំនួនមតិ 0 | ចំនួនចែករំលែក 0

បវរកញ្ញាថៃ Kanthicha Chimsiri ទើបតែរាយការណ៍ប្រាប់ប៉ូលិសថា ខ្លួនត្រូវគេបោកអស់កន្លះលានដុល្លារក្រោយពេលសម្រេចចិត្តចូលហ៊ុនជាមួយបុរសម្នាក់ដើម្បីបង្កើតគណបក្សនយោបាយផ្ទាល់ខ្លួន។

កាលពីថ្ងៃទី២២ ខែតុលាមុននេះ បណ្ដាញព័ត៌មាន Bangkok Post បានចុះផ្សាយពីករណីបវរកញ្ញាថៃ ឆ្នាំ២០១៦ Kanthicha Chimsiri ត្រូវបានគេបោកលុយអស់១៦លានបាត (៥០ម៉ឺនដុល្លារ) ក្រោយពេលប្រគល់លុយឲ្យបុរសម្នាក់ដើម្បីបង្កើតគណបក្សនយោបាយផ្ទាល់ខ្លួនមួយ។

មានវត្តមាននៅប៉ុស្តិ៍ប៉ូលិស ស្រីស្អាតរូបនេះបានឲ្យដឹងថា ខ្លួន និងបុរសម្នាក់ដែលស្ថិតក្នុងពិភពសិល្បៈបានគ្រោងសហការជាមួយគ្នា ដូចនេះហើយ នាងក៏បានវេរលុយទៅឲ្យបុគ្គលនេះដោយមិនដឹងថាគេមានគម្រោងបោកនាងឡើយ។ Kanthicha បានបង្ហាញភស្តុតាងដូចជា បណ្ណវេរលុយ សារទាក់ទងគ្នា ព្រមទាំងរូបថតបុគ្គលដែលបោកនាងផងដែរ។ ស្រីស្អាតដដែលប្រាប់ថា ខ្លួនបានព្យាយាមទាក់ទងទៅច្រើនដងតែមិនបានសម្រេចឡើយ។ “គេបានសន្យាជាមួយខ្ញុំរឿងជាច្រើន តែគេមិនបានធ្វើអ្វីសោះ។ តាមនេះដែរ ខ្ញុំសូមផ្ដាំទៅអ្នកទាំងអស់គ្នា កុំឆាប់ជឿសម្ដីគេពេក។ កុំឲ្យដូចខ្ញុំបាត់លុយអស់១៦លានបាត”។

Kanthicha Chimsiri ឆ្នាំនេះមានអាយុ៣៦ឆ្នាំ ហើយធ្លាប់តំណាងប្រទេសថៃទៅប្រលងក្នុងកម្មវិធី Mrs Universe កាលពីឆ្នាំ២០១៦។ ក្រៅអាជីពជាតារា ស្ត្រីរូបនេះក៏ជាអ្នកជំនួញម្នាក់ផងដែរ ដោយនាងល្បីឈ្មោះខាងមានឡានទំនើបជាច្រើនគ្រឿង៕