៨ឆ្នាំ ក្រោយភ្លើងឆេះរលាកធ្ងន់ សមាជិកក្រុម S.H.E ស្អាតឥតទាស់ពេលបច្ចុប្បន្ន

2018-10-11 02:49:46
ចំនួនមតិ 0 | ចំនួនចែករំលែក 0

ទោះបីជានៅលើដៃ និងជើងនៅមានស្លាកស្នាមយ៉ាងច្រើនក៏ដោយ តែសម្រស់របស់កំពូលតារាចម្រៀងស្រីតៃវ៉ាន់ Selina នៅតែស្អាតដូចកាលមិនទាន់ជួបគ្រោះថ្នាក់ដដែល។

ឆ្នាំ២០១០ អ្នកគាំទ្ររបស់ក្រុមចម្រៀងល្បីឈ្មោះតៃវ៉ាន់ S.H.E បានតក់ស្លុតជាខ្លាំងនៅពេលដឹងដំណឹង សមាជិក Selina ត្រូវរលាកពេញខ្លួន និងមុខជាទម្ងន់នៅពេលកំពុងថតឈុតឆេះផ្ទះមួយនៅក្នុងរឿង។ ទោះបីជាត្រូវបានបញ្ចូនទៅមន្ទីរពេទ្យភ្លាមៗ តែខ្លួនរបស់នាងទាំងមូលត្រូវរងស្លាកស្នាមដែលគ្មានថ្ងៃបាត់បាន។ និយាយពីរយៈពេលនេះ ស្រីស្អាតវ័យ៣៦ឆ្នាំបានឲ្យដឹងថា សម្រាប់អ្នកធម្មតាបើរបួសប៉ុណ្ណេះគឺស្ទើរតែមិនចង់រស់ទៅហើយ ទម្រាំនាងជាសិល្បការិនីម្នាក់ទៀត កាន់តែលែងចង់ចេញក្រៅទៀត។ តែដោយសារការស្រលាញ់របស់គ្រួសារ ក៏ដូចជាអ្នកគាំទ្របានជួយឲ្យសមាជិកក្រុម S.H.E រូបនេះតស៊ូបន្តទៀត។

ឆ្នាំ២០១៧ អ្នកគាំទ្របានសប្បាយចិត្តជាខ្លាំងនៅពេលក្រុមចម្រៀងនេះរួបរួមគ្នាឡើងវិញ។ ស្របពេលនោះដែរ សម្រស់របស់ Selina ក៏ស្អាតដូចដើមវិញ ទោះបីជាដៃ និងជើងនៅមានស្នាមក៏ដោយ។ មិនត្រឹមតែប៉ុណ្ណោះ នៅក្នុងកម្រងរូបភាពនៅក្នុងកម្មវិធីថ្មីបានបង្ហាញឲ្យឃើញថា ស្រីស្អាតកើតឆ្នាំ១៩៨១មានសម្រស់ស្ទើរតែស្អាតជាងមុនពេលជួបគ្រោះថ្នាក់ទៅទៀត៕