ជាមនុស្សស្រី កុំទុកដល់ខ្លួនចាស់ហើយ ទើបចាប់ផ្ដើមសោកស្ដាយយុវភាពរបស់ខ្លួន
- 2018-10-11 02:08:00
- ចំនួនមតិ 0 | ចំនួនចែករំលែក 0
ជាមនុស្សស្រី កុំទុកដល់ខ្លួនចាស់ហើយ ទើបចាប់ផ្ដើមសោកស្ដាយយុវភាពរបស់ខ្លួន
កើតមកមួយជាតិ គឺមានពេលខ្លីខ្លាំងណាស់ សូមរស់នៅដោយមានសុភមង្គលចាប់ពីពេលនេះតទៅ កុំចាំដល់ពេលចាស់ទៅទើបស្ដាយក្រោយកាលនៅក្មេង។
មនុស្សស្រីពេលនៅក្មេងតែងមិនសូវពេញចិត្តនឹងរូបសម្បត្តិរបស់ខ្លួន។ ពេលឃើញស្រីដទៃស្បែកស រាងស្គម តែងនិយាយដាក់ខ្លួនឯងថា៖ “បើស្បែកយើងសជាងនេះបន្តិច រាងស្អាតជាងនេះបន្តិច ច្រមុះស្រួចជាងនេះបន្តិច នេះបន្តិច នោះបន្តិចមិនដឹងជាល្អយ៉ាងណា”។ ដោយសារមូលហេតុនេះ មាននារីមិនតិចឡើងបានពឹងពាក់ដល់កន្ត្រៃ និងកាំបិតដើម្បីកែប្រែទម្រង់មុខខ្លួនឯង។
បងស្រីខ្ញុំឆ្នាំនេះអាយុសែជាងហើយ។ នៅក្នុងវ័យនេះ យុវភាពរបស់គាត់បានកន្លងផុតទៅយូរហើយ ដោយគ្មានវិធីណាដែលអាចអូសទាញបានទាំងអស់។ កូនរបស់គាត់ក៏ធំ ហើយចូលសាកលអស់ហើយ។ គ្រួសារគាត់ក៏មានជីវិតរស់នៅសមរម្យ គ្មានអ្វីត្រូវព្រួយបារម្ភ។ តែមួយរយៈនេះខ្ញុំចាប់អារម្មណ៍ថាគាត់តែងឆ្លុះមើលខ្លួនឯងនៅក្នុងកញ្ចក់ ហើយនិយាយដាក់ខ្លួនឯងថា៖ “កាលពីក្មេងបងក៏ស្អាតដែរអូនណេះ? បើពេលនេះបងអត់ជ្រួញ ពោះមិនយារធ្លាក់មិនដឹងជាល្អយ៉ាងណាទេ”។
សែសិបឆ្នាំមិនមែនចាស់ពេក តែសញ្ញានៃភាពចាស់បានបង្ហាញលើមុខនារីម្នាក់នេះហើយ។ កើតកូន២ដង ពោះបងខ្ញុំពេលនេះសល់តែស្នាមសង្វារ ហើយយារដោយខ្លាញ់ព្រោះធាត់។ មនុស្សស្រីរូបណាចុងក្រោយក៏ប្រែទៅជាយ៉ាងនេះ មិនអាចអូសទាញយុវភាពរបស់ខ្លួនបាន។
បងស្រីខ្ញុំថា៖ “ការពិតទៅពីមុនបងតូចចិត្តពីរូបរាងខ្លួនឯងខ្លាំងណាស់។ បងតែងអន់ចិត្តព្រោះខ្លួនឯងមិនស ច្រមុះខើច។ ឃើញគេស្អាតៗ បងតែងស្រមៃថាបើមានលុយច្រើន បងប្រាកដជាទៅកែមុខមិនខាន…”។ បងស្រីខ្ញុំក៏ដូចនារីៗដទៃ មានប្ដីហើយកើតកូន តែបងខ្ញុំបានប្រើយុវភាពរបស់ខ្លួនសម្រាប់តែតូចចិត្តរឿងដែលមិនបានការគឺខ្លួនមិនសូវស្អាត។ ដល់ហើយពេលចាស់ទៅ គាត់នៅតែស្ដាយទៀតដោយសារតែកាលពីក្មេងរវល់តែពិបាកចិត្តហើយភ្លេចរស់នៅដោយមានក្ដីខុស។
រយៈពេលដ៏ស្រស់ស្អាតជាងគេរបស់មនុស្សស្រីគឺអាយុម្ដៃជាងនេះហើយ បើក្នុងពេលនេះ យើងរវល់តែនឹកគិតរឿងមិនសប្បាយចិត្ត នោះមួយជីវិតនេះនឹងស្ដាយក្រោយជារៀងរហូត។ កាលពីក្មេងពិបាកចិត្តរឿងខ្លួនមិនស្អាត ដល់ចាស់ទៅពិបាកចិត្តព្រោះកាលពីក្មេងពិបាកចិត្តច្រើនពេក៕