បើរាល់ថ្ងៃមានចំណុចនេះ គឺអ្នកកំពុងស្រឡាញ់គេខ្លាំងជាងខ្លួនឯងហើយ

2018-09-30 06:15:01
ចំនួនមតិ 0 | ចំនួនចែករំលែក 0

ស្នេហាដ៏ល្អមួយគឺជាការស្រឡាញ់ទៅវិញទៅមកដោយមិនឲ្យអ្នកណាលើសជាងអ្នកណា ព្រោះបើអ្នកណាម្នាក់ស្រឡាញ់លើសជាងម្ខាងទៀតម្នាក់នោះនឹងងាយរងការឈឺចាប់។ បើរាល់ថ្ងៃអ្នកមានចំណុចនេះនោះអ្នកគឺកំពុងស្រឡាញ់គេខ្លាំងជាងខ្លួនឯងហើយ ដូច្នេះគួរតែគិតមើលឡើងវិញថាគួរបន្តបែបនេះទៀតទេ ៖

១. អ្នកអាចបោះបង់គ្រប់យ៉ាងដើម្បីគេ

ពេលខ្លះទោះអ្នកកំពុងធ្វើអ្វីក៏ដោយឲ្យតែឮគេមានរឿង គេមិនសប្បាយគឺអ្នកអាចទុកការងារ មិត្តភ័ក្ដិ ឬ គ្រួសារមួយឡែកដើម្បីទៅជួបគេ ទៅជួយគេហើយ។ នេះជាសញ្ញាមួយដែលបញ្ជាក់ថាគេសំខាន់ជាងអ្វីដែលអ្នកកំពុងមានទៅទៀត។

រូបតំណាង

**២. ផ្ញើសេចក្ដីសុខខ្លួនឯងនៅនឹងគេ**

គេមានឥទ្ធិពលខ្លាំងមកលើជីវិតអ្នក ព្រោះពេលណាគេល្អដាក់អ្នកក៏សប្បាយចិត្ត ហើយពេលណាគេទុកអ្នកចោល មិនខ្វល់ពីអ្នកនោះអ្នកក៏ពិបាកចិត្ត ដេកកើតទុក្ខតែឯង។ ទាំងនេះគឺអ្នកបានយកសេចក្តីសុខរបស់ខ្លួនទៅផ្ញើនឹងគេហើយ ព្រោះខ្លួនឯងមិនអាចធ្វើឲ្យខ្លួនឯងរីករាយបាន។

៣. សុំត្រឹមឃើញគេញញឹមទោះខ្លួនឯងពិបាកក៏ដោយ

មានពេលខ្លះអ្នកអាចធ្វើរឿងជាច្រើនដើម្បីគេដោយមិនដែលទាមទារអីមកវិញឡើយគឺសុំត្រឹមតែគេសប្បាយចិត្ត គេញញឹមទៅបានហើយ។ អ្នកអាចលែងខ្វល់ពីតម្រូវការខ្លួនឯងហើយទៅបំពេញតម្រូវការគេទាំងពេលខ្លះគេមិនទាមទារក៏អ្នកឲ្យគេដែរ។

៤. សម្របខ្លួនតាមគេជានិច្ច

គេមិនចូលចិត្តអីអ្នកក៏សម្របតាមគេសុខចិត្តទៅតាមគេ ហើយលះបង់ការចូលចិត្តរបស់អ្នក។ ជាក់ស្ដែងដូចពេលទៅមើលកុន អ្នកចូលចិត្តមើលរឿងបែប Action ហើយគេចូលចិត្តបែបកំប្លែង អ្នកក៏សុខចិត្តកំដរគេមើលទាំងខ្លួនមិនចូលចិត្ត។

៥. ផ្ដល់ឱកាសម្ដងជាពីរដង

ទោះគេខុសប៉ុណ្ណាក៏អ្នកនៅតែអធ្យាស្រ័យ លើកលែងឲ្យគេដែរ។ អ្នកនៅតែគិតថាគេអាចកែប្រែអ្វីដែលធ្លាប់ឆ្គាំឆ្គងមកលើអ្នកទាំងដែលអ្នកជួបរឿងខកចិត្តនោះជាច្រើនដងទៅហើយ។

៦. ប្រាប់គេគ្រប់រឿង

មិនថារឿងតិចតួចក៏អ្នកប្រាប់គេដែរ អ្នកតែងពិភាក្សានិងចង់ឲ្យគេគិតគូរវាជាមួយអ្នក។ លើសពីនេះទៅណាមកណាអ្នកតែងផ្ដល់ដំណឹងឲ្យគេជានិច្ចទោះគេមិនបានសួរក៏ដោយ ព្រោះអ្នកខ្លាចគេបារម្ភ ខ្លាចគេខឹងនឹងអ្នក ទាំងពេលខ្លះគេមិនចង់ដឹងក៏មានដែរ។