ជួយគេពេក យូរៗទៅបែរត្រូវគេបោកប្រើ គួរកែប្រែខ្លួនវិញដោយវិធី៥យ៉ាងនេះ
- 2018-09-19 10:13:06
- ចំនួនមតិ 0 | ចំនួនចែករំលែក 0
ជួយគេពេក យូរៗទៅបែរត្រូវគេបោកប្រើ គួរកែប្រែខ្លួនវិញដោយវិធី៥យ៉ាងនេះ
តើអ្នកជាប្រភេទមនុស្សដែលពូកែជួយយកអាសាគេខ្លាំងណាស់មែនទេ? អ្នកប្រហែលក្លាយជាមនុស្សដ៏មានប្រជាប្រិយភាពខ្លាំង ព្រោះឲ្យតែគេលំបាក ដឹងតែគេនឹកឃើញអ្នកមុនគេ។ យូរៗទៅអ្នកក៏ចាប់ផ្ដើមហត់ ព្រោះដឹងច្បាស់ថាខ្លួនកំពុងតែត្រូវគេបោកប្រើស្រស់ៗ។ ដើម្បីកែប្រែខ្លួនឯងឲ្យប្រសើរឡើងវិញ ៥ចំណុចខាងក្រោមអាចជួយអ្នកបាន៖
**១. បញ្ឈប់ភាពជាវីរជន**
មនុស្សដែលពូកែជួយយកអសារអ្នកដទៃ តែងតែមានទម្លាប់មួយនេះជាប់ខ្លួន។ អ្នកគិតថា ខ្លួនមានសមត្ថភាពអស្ចារ្យ អាចជួយធ្វើកិច្ចការអ្នកដទៃជាច្រើន ឲ្យសម្រេចក្នុងពេលដ៏ខ្លី។ អ្នកគួររៀនទទួលស្គាល់ភាពពិតប្រាកដខ្លះ កុំប្រឹងផ្គាប់ចិត្តអ្នកជុំវិញរហូតភ្លេចខ្វល់ពីភាពលំបាកខ្លួនឯងឲ្យសោះ។
២. រៀនប្រើពាក្យ “ទេ”
អារម្មណ៍របស់អ្នកតែងតែគ្មានភាពជឿជាក់ ខ្លាចគេខឹង ខ្លាចគេអន់ចិត្ត ខ្លាចគេឈប់រាប់អាន ដូច្នេះឲ្យតែគេពឹងពាក់អ្វី អ្នកមិនហ៊ានបដិសេធម្ដងណាឡើយ។ ហេតុអ្វីអ្នកនៅត្រូវការមនុស្សដែលមើលឃើញតែប្រយោជន៍ទាំងនោះ? ឈប់ស្ទាក់ស្ទើរតទៅទៀត បើមិនអាចជួយបាន ត្រូវតែឆ្លើយថា ”ទេ” ជានិច្ច។
៣. ផ្ដល់អាទិភាពឲ្យខ្លួនឯង
វាជារឿងល្អ ដែលអ្នកក្លាយជាមនុស្សគួរឲ្យស្រឡាញ់ ជាទីពឹងពាក់ សម្រាប់អ្នកដទៃ ប៉ុន្តែអ្នកមិនអាចបូជាពេលវេលាទាំងអស់ដើម្បីធ្វើរឿងមនុស្សធម៌រហូតឡើយ។ អ្នកត្រូវមានពេលវេលាផ្ទាល់ខ្លួន ដើម្បីរីករាយជាមួយកិច្ចការខ្លួនឯងឲ្យបានច្រើន។ បើនៅសល់ពេលចាំជួយយកអសារគេចុះ។
៤. បើគេមិនខ្វល់ពីអ្នក អ្នកក៏មិនបាច់ខ្វល់ពីគេវិញដូចគ្នា
ប្រសិនគេស្រឡាញ់ ចូលចិត្តអ្នកតែពេលគេត្រូវការជំនួយ ច្បាស់ណាស់ថាអ្នកគឺជាមនុស្សដែលគេបោកប្រើបានយ៉ាងស្រួល។ ឈប់ចាញ់បោកគេតទៅទៀត បើគេមិនខ្វល់ពីអារម្មណ៍អ្នក អ្នកក៏មិនចាំបាច់ខ្វល់ពីគេវិញដូចគ្នា។ អ្នកគួររៀនសង្កេតមនុស្សឲ្យបានច្រើន ដើម្បីចៀសឲ្យឆ្ងាយពីមនុស្សពូកែបោកប្រើបែបនេះ។
៥. ដឹងថាពេលណាត្រូវដោះលែង
ទោះអ្នកប្រឹងស្រឡាញ់ ប្រឹងយកចិត្ត ឬលះបង់កម្រិតណា ប្រសិនគេចង់ទៅ អ្នកគ្មានថ្ងៃឃាត់គេបានឡើយ។ ពេលខ្លះ អ្នកត្រូវបណ្ដោយតាមព្រហ្មលិខិតខ្លះ។ អ្នកកាន់តែទាញគេ គេកាន់តែចង់ទៅ ដូច្នេះប្រសិនអ្នកក្លាហាន ហ៊ានដោះលែង ប្រហែលគេអាចស្គាល់តម្លៃរបស់អ្នកបានរហ័សជាងនេះ ៕
ចុចអាន៖
ទម្លាប់ ៦យ៉ាងនេះនឹងជួយឲ្យអ្នកអភិវឌ្ឍខ្លួនឯងបានយ៉ាងអស្ចារ្យ
បើមានអារម្មណ៍ថាហត់ចិត្ត តឹងណែនក្នុងទ្រូង ត្រូវទម្លាប់ចិត្តធ្វើរឿងទាំងនេះ