អតីតសមាជិកក្រុម KARA ខ្វាចមុខមិត្តប្រុសឡើងរយះមុខដូចយកកាំបិតឆូត

2018-09-18 03:00:01
ចំនួនមតិ 0 | ចំនួនចែករំលែក 0

ខណៈកំពុងប្រតាយប្រតប់គ្នា តារាចម្រៀង និងសម្ដែងល្បីឈ្មោះកូរ៉េ Goo Hara បានធ្វើអំពើហិង្សាលើមិត្តប្រុស ដែលបណ្ដាលឲ្យលោកប្ដឹងនាង។

ប៉ុន្មានថ្ងៃចុងក្រោយនេះ បណ្ដាញព័ត៌មានកូរ៉េកំពុងក្ដៅគគុកករណី តារាចម្រៀង និងសម្ដែងជួរមុខកូរ៉េ Goo Hara ឈ្លោះគ្នានិងមិត្តប្រុសរហូតដល់ថ្នាក់ប្រើអំពើហិង្សាដាក់គ្នា។ តាមនោះដែរ ដោយទ្រាំនឹងទង្វើនេះលែងបាន មិត្តប្រុសរបស់អតីតសមាជិកក្រុមចម្រៀង KARA បានដាក់ពាក្យបណ្ដឹងទៅប៉ូលិសឲ្យជួយអន្តាគមន៍ករណីរបស់ខ្លួន ថែមទាំងបញ្ចេញភស្តុតាងដែលមិត្តស្រីបង្កលើខ្លួន។

គួរបញ្ជាក់ផងដែរថា មិត្តប្រុសរបស់ស្រីស្អាតវ័យ២៧ឆ្នាំ កើតឆ្នាំ១៩៩១ ឈ្មោះថា Choi Jong Bum ជាអ្នកជំនាញផ្នែកម៉ូដសក់មួយរូប។ អ្នកទាំង២បានស្គាល់គ្នាក្រោយចូលរួមក្នុងកម្មវិធីទូរទស្សន៍មួយ។ ក្រោយស្រលាញ់គ្នាបាន៣ខែ ពួកគេបានរស់នៅជាមួយគ្នានៅភូមិគ្រឹះមួយនៅទីក្រុងសេអ៊ូល។

ទស្សនិកជនបានភ្ញាក់ផ្អើលជាខ្លាំងពេលឃើញភស្តុតាងដែលប្រុសស្អាតរូបនេះបង្ហាញ ត្បិតទោះបីជាឆ្លើយថាត្រូវមិត្តស្រីខ្វាចដោយក្រចកដៃមែនពិត តែស្នាមដែលបន្សល់លើមុខរបស់លោកគឺមិនខុសពីយកកាំបិតឆូតឡើយ។ អតីតម្ចាស់បទ “Lupin” ក៏ត្រូវមហាជនរិះគន់មិនធម្មតាដែរក្រោយពេលរឿងនេះត្រូវបែកធ្លាយ។ តំណាងរបស់ Goo Hara បានប្រាប់បណ្ដាញព័ត៌មានថាពួកគេមិនទាន់អាចទាក់ទងនឹងនាងដើម្បីស៊ើបសួរបានឡើយ៕