ស្នេហាដែលបញ្ចប់ដោយភាពស្ងៀមស្ងាត់ គឺជាស្នេហាដែលឈឺចាប់បំផុត

2018-09-06 02:50:14
ចំនួនមតិ 0 | ចំនួនចែករំលែក 0

មានហេតុផលដើម្បីដឹងថាស្នេហាយើងបែកដោយសារអ្វីក៏ស្ងប់ចិត្តជាង នៅសុខៗមនុស្ស២នាក់ដែលស្រលាញ់គ្នាប្រែក្លាយជាមនុស្សមិនស្គាល់គ្នាដែរ។

រូបតំណាង

គេតែងនិយាយថាស្នេហាចាប់ផ្ដើមដោយគ្មានហេតុផលឡើយ ដូចនេះហើយពេលវាចប់ទៅក៏កុំសួររកហេតុផលអី។ មានតែទទួលយកដោយស្ងប់ស្ងាត់ បោះបង់ដោយស្ងប់ស្ងាត់ ហើយក៏បែកគ្នាដោយស្ងប់ស្ងាត់។ ខ្ញុំមិនដឹងថាអ្នកកំពុងគិតអ្វី នៅស្រលាញ់ខ្ញុំឬអត់ ហើយមនោសញ្ចេតនារបស់ពួកយើងនៅពេលនេះបងចាត់ទុកជាអ្វី? ពួកយើងស្ងាត់ស្ងៀមហើយបាត់គ្នាជារៀងរហូត។ គ្មានអ្នកណាមាត់រកអ្នកណាមួយម៉ាត់ ខ្ញុំចាំឲ្យបងបញ្ចេញសំឡេងមុន ហើយចុងបញ្ចប់បងនៅតែមិនព្រមនិយាយអ្វីទាំងអស់។ ពេលនេះខ្ញុំរសប់រសល់ខ្លាំងណាស់ មិនដឹងថាស្នេហារបស់យើងនឹងរសាត់អណ្ដែតដល់ទីណា។ គ្មានជម្លោះ គ្មានកំហឹង ហេតុអីមនោសញ្ចេតនាមួយនេះប្រែទៅជាបែបនេះ? នៅពេលដែលចំណងមួយដែលលែងមានឈ្មោះហៅថាជាចំណងអី មានន័យថាវាចប់ហើយមែនទេ?

នៅក្នុងចិត្តនឹកស្ទើរស្លាប់តែមិនអាចស្រែកចេញក្រៅបាន។ អ្នកមិនដឹងឡើយថា ភាពស្ងៀមស្ងាត់របស់អ្នកកំពុងសម្លាប់បេះដូងមនុស្សម្នាក់ដោយប្រយោលយ៉ាងម៉េចខ្លះ។ ពិតណាស់ របួសដែលសាងដោយមនុស្សដែលយើងស្រលាញ់គឺពិបាកព្យាបាលជាងអ្វីៗទាំងអស់។ គេនិយាយតៗគ្នាថា វិធីបែកគ្នាដោយឈឺតិចបំផុតគឺបែកដោយស្ងៀមស្ងាត់ តែហេតុអីចំពោះខ្ញុំ បែករបៀបនេះឈឺខ្លាំងម្ល៉េះ? ឈឺជាងពេលធ្លាប់ឈ្លោះគ្នាបែកផ្សែងតែមិនបែកទៅទៀត។

ដាច់គ្នាដោយស្ងប់ស្ងាត់ធ្វើឲ្យខ្ញុំចោទសួរខ្លួនឯង១០០០សំនួរថាតើខ្ញុំបានធ្វើខុសអី ឬគ្រាន់តែសាមញ្ញថាបងបែកចិត្តហើយ។ បែកគ្នាដោយស្ងប់ស្ងាត់គឺបង សូម្បីតែឱកាសឲ្យខ្ញុំសុំអូសទាញក៏គ្មាន។ ហើយបើខ្ញុំចាប់ផ្ដើមស្ងៀមស្ងាត់ដែរ គឺខ្ញុំព្រមទទួលហើយថាពួកយើងបែកគ្នា។ ស្ងាត់ៗបែកគ្នា ទោះមិនកងរំពង តែការឈឺចាប់នៅដក់ជ្រៅ៕