ហេតុផលទាំង៥ នាំឱ្យស្រ្តីមានកូនហើយ លែងសូវស្អាតដូចមុន

2018-08-29 09:51:23
ចំនួនមតិ 0 | ចំនួនចែករំលែក 0

នៅពេលមានផ្ទៃពោះ ស្ត្រីគ្រប់រូបបានលះបង់យ៉ាងច្រើន មុនបានផ្ដល់កំណើតដល់កូនៗ ជាទីស្រលាញ់ មកកាន់ពិភពលោកដ៏ស្រស់ស្អាត។ វេជ្ជបណ្ឌិតឯកទេសផ្នែកសម្ភព បានប្រាប់ថា ៥ចំណុច នៃសម្រស់ ដែលស្ត្រីបានបាត់បង់ តាំងពីពេលមានផ្ទៃពោះ។ ជាទូទៅ ចំណុចដែលបានបាត់បង់ទាំងនោះ គឺមិនងាយវិលត្រលប់មកសភាពដើមវិញ ដូចកាលមិនទាន់មានកូនឡើយ។

ក្នុងកិច្ចសម្ភាសជាមួយ Sabay វេជ្ជបណ្ឌិត ទី សុវណ្ណរដ្ឋ ឯកទេសផ្នែកសម្ភព និងរោគស្ត្រី នៃមន្ទីរសម្រាកព្យាបាល និងសម្ភពមាតា បានប្រាប់ថា ជាការពិត សម្រស់គឺជារឿងដែលស្ត្រីស្រលាញ់ និងខ្វល់ខ្វាយបំផុត។ ដោយឡែក នៅពេលមានកូន ស្ត្រីតែងជួបប្រទះ និងប្រឈម នឹងបញ្ហាបង់វាសឹងតែទាំងស្រុង រាប់ពីពេលចាប់មានផ្ទៃពោះមកម្ល៉េះ។

១. ស្បែកខ្មៅស្រអាប់

វេជ្ជបណ្ឌិត ទី សុវណ្ណរដ្ឋ ពន្យល់ថា ច្បាស់ណាស់ នេះជាចំណុចដែលស្ត្រី សឹងតែគ្រប់រូបហើយ តែងជួប ។ ទោះបីចង់មិនចង់ គឺស្ត្រីមានពេលមានទម្ងន់កូន គឺស្បែកមិនសូវជាស្អាតទេ។ មូលហេតុគឺ ដោយសារតែការប្រែប្រួល នៃកត្តាអ័រម៉ូន ក្នុងខ្លួនខុសពីធម្មតា ហើយបង្ហាញចេញមកក្រៅតាមរយៈ រោគសញ្ញាវិលមុខ ញឹកញាប់ និងការគេងមិនសូវលក់ស្រួល ។

មួយវិញទៀត ស្ត្រីភាគច្រើន ងាយប្រឈមនឹង ការចាញ់កូន។ ស្ត្រីខ្លះចាញ់កូនកម្រិតតិចតួច រីឯអ្នកខ្លះ ធ្វើទុកចាញ់ខ្លាំង រហូតដល់ដាក់ចំណីចូលមិនបាន គឺប្រឈមនឹងក្អួត បង្អោរ។ នេះហើយ សុទ្ធតែជាដើមហេតុ នៃការបាត់បង់ ពណ៌ស្បែកស្អាត ព្រោះគេងក៏មិនគ្រប់ ហូបអាហារក៏មិនឆ្ងាញ់ ដែលអ្នកម្ដាយបានឆ្លងកាត់ ទម្រាំផុតដំណាក់កាលតាំងពីពេលពពោះកូនមក។

២. ឡើងសង្វារលើស្បែក

សង្វារជាស្នាមឆ្នូតពណ៌ស ក្រហម ឬខ្មៅ ទៅតាមប្រភេទស្បែកនីមួយៗ។ ប្រសិនបើមិនបានលាបក្រែមការពារសង្វារទេ វានឹងផ្ដើមចេញ មកចាប់ពីចន្លោះ ត្រីមាសទី១មក មានន័យថា ស្ត្រីខ្លះអាចឆាប់បែកសង្វារតាំងពីពេលមានផ្ទៃពោះ បានជាង ៣ខែមក។ ស្ថានភាពសុខភាព ពីស្ត្រីម្នាក់ ទៅម្នាក់ មានបញ្ហាសង្វារ ខុសៗគ្នា។ សង្វារខ្លះវាមានតិចតួច មិនមានបញ្ហាទេ។ ប៉ុន្តែស្ត្រីខ្លះ កើតមានច្រើនកន្លែង ទំហំក៏ធំៗ ពាសពេញដងខ្លួន ហាក់ដូចស្បែកខ្លា ដាមប្រតាក លើស្បែក គួរឲ្យខ្លាច ជាពិសេសត្រង់គល់ភ្លៅ ពោះ និងកន្លែងឯកជនផ្សេងទៀត។

វេជ្ជបណ្ឌិតបញ្ជាក់ថា សង្វារបើបានចេញលើស្បែកហើយ គឺមិនងាយបាត់ទៅវិញ ងាយៗទេ។ សង្វារមិនត្រឹមតែធ្វើឲ្យខូចស្បែក ពេលមានផ្ទៃពោះទេ ប៉ុន្តែវាក៏បានធ្វើឲ្យស្ត្រីពិបាកចិត្ត ក្រោយសម្រាល ពិសេសពេលស្លៀកពាក់ខោអាវវាលៗ ចេញសាច់។ បញ្ហានេះបានជះឥទ្ធិពល ដែលជំរុញឲ្យស្ត្រីខ្លះ បានចំណាយលុយ ខ្ទង់ពាន់ដុល្លារ ទៅក្រៅប្រទេស ដើម្បីព្យាបាលឲ្យបាត់សង្វារ តែវាមិនអាចបាត់ទាំងស្រុងទេ។

៣. ឡើងគីឡូខ្លាំង

ចំពោះស្ត្រីដែលញ៉ាំបាន ញ៉ាំឆ្ងាញ់ ពេលមានផ្ទៃពោះ ស្ត្រីតែងឃ្លានខ្លាំងជាងធម្មតា ព្រោះតម្រូវការរបស់ទារកក្នុងផ្ទៃ។ យើងធម្មតា ញ៉ាំអាហារ តែ៣ ឬ៤ដងយ៉ាងច្រើន ប៉ុន្តែសម្រាប់អ្នកម្ដាយតែងញ៉ាំ ចន្លោះពី ៥ ទៅ១០ ដង ក្នុង១ថ្ងៃ។ អាស្រ័យហេតុនេះ ស្ត្រីមានផ្ទៃពោះ ប្រឈមនឹងឡើងគីឡូគំហុក ជាងស្ត្រីធម្មតា។

យើងសង្កេតឃើញថា ស្ត្រីខ្លះបានកើនទម្ងន់ចន្លោះ ពី១០ ទៅ២០ គីឡូពេលមានកូនម្ដង។ មិនមែនជារឿងងាយស្រួលទេ នៅពេលដែលគីឡូបានឡើង ហើយ រួចចង់ឲ្យវាស្រកដូចដើមវិញនោះ។ ស្ត្រីខ្លះ ក៏បានស្រកវិញខ្លះ រីឯស្ត្រីខ្លះ គឺមិនបានស្រកស្រុតគីឡូទេ មានតែឡើងថែមទៅមុខទៀត។

៤. ស្បែកពោះឡើងក្រាស់

ទោះក្រោយសម្រាលកូនហើយ មនុស្សស្រីភាគច្រើន គឺប្រឈមនឹង ការសល់ស្បែកពោះក្រាស់។ អ្នកខ្លះតែងនិយាយលេងថា ទោះសម្រាលកូនហើយ តែដូចនៅសល់ កូន១ទៀត ព្រោះពោះដូចអត់ស្រកអីបន្តិច។

សូមបញ្ជាក់ថា នៅក្នុងអត្ថបទសុខភាពភាគបន្ទាប់ Sabay នឹងជូនគន្លឹះងាយៗគួរយល់ដឹង និងដំណោះស្រាយបញ្ហាខាងលើ ដើម្បីជួយឲ្យស្ត្រីអាចមានសម្រស់ស្រស់ស្អាតឡើងវិញ ៕

ប្រភព៖ Sabay News អត្ថបទ៖ ពៅ រក្សា