Mew Nittha ស្នេហាមិនសូវផ្អែមល្ហែមបើកចំហ តែស្ងាត់ៗចូលដល់ចាស់ទុំ
- 2018-08-23 04:38:54
- ចំនួនមតិ 0 | ចំនួនចែករំលែក 0
Mew Nittha ស្នេហាមិនសូវផ្អែមល្ហែមបើកចំហ តែស្ងាត់ៗចូលដល់ចាស់ទុំ
តាំងពីចាប់ផ្ដើមបើកចំហអំពីទំនាក់ទំនងស្នេហាជាមួយអ្នកជំនួញសង្ហា Siant Thoraputh កាលពីប៉ុន្មានខែមុនមក គេសង្កេតឃើញតារាសម្ដែងថៃ Mew Nittha ហាក់មានភាពស្រស់ស្រាយច្រើន បើទោះបីមិនសូវមានរូបភាពគូផ្អែមល្ហែមបង្ហាញឲ្យឃើញដូចគូស្នេហ៍តារាដទៃៗក៏ដោយ។
ក្នុងឱកាសចូលរួមក្នុងកម្មវិធីរបស់ប្រ៊េនគ្រឿងសម្អាងមួយប៉ុន្មានថ្ងៃមុននេះ តួឯកស្រីរឿង “One Day” ក៏បានឆ្លើយតបក្រុមអ្នកសារព័ត៌មានអំពីស្ថានភាពស្នេហារបស់ខ្លួន ដោយបង្ហើបថាកាន់តែរលូនទៅមុខ ហើយបើមានពេលវេលាពួកគេក៏តែងណាត់ជួបគ្នា រួមទាំងមានឱកាសបានជួបចាស់ទុំទាំងសងខាងហើយទៀតផង។
នៅពេលត្រូវបានសួរថាម្ដាយរបស់ខ្លួនហាមឃាត់ចំពោះស្នេហាលើកនេះឬក៏អត់ តារាសម្ដែងរូបនេះបានឆ្លើយថា “អត់ទេ ម្ដាយខ្ញុំមិនដែលហាមឃាត់អីស្រាប់ទៅហើយ គឺគាត់ឲ្យយើងសម្រេចចិត្តខ្លួនឯង និងជ្រើសរើសខ្លួនឯងច្រើនជាង ប៉ុន្តែខ្ញុំក៏ធ្លាប់បានពិភាក្សារឿងនេះជាមួយគាត់ខ្លះដែរ ហើយគាត់ក៏ឲ្យយោបល់ថាមើលចិត្តគ្នាសិនទៅ។ ការពិតទៅគាត់ (Saint) ធ្លាប់ ជួបនិយាយគ្នាជាមួយម៉ាក់ខ្ញុំខ្លះហើយ ព្រោះធម្មតានៅពេលខ្ញុំកំពុងមើលចិត្តគ្នាជាមួយនរណាគឺតែងឲ្យម៉ាក់ប៉ាបានស្គាល់ និងសាកល្បងនិយាយជាមួយដែរ ដើម្បីឲ្យពួកយើងបានស្ថិតក្រោមខ្សែភ្នែករបស់ចាស់ទុំរហូត។ ចំណែកខាងគ្រួសាររបស់គាត់ ខ្ញុំក៏មានឱកាសបានជួបខ្លះហើយដែរ គឺទៅញ៉ាំបាយជាមួយគ្នាធម្មតា”។
ចំពោះការងារសិល្បៈបច្ចុប្បន្ន Mew កំពុងព្យាយាមសម្រកគីឡូខ្លាំងដើម្បីត្រៀមថតភាពយន្តភាគថ្មីដែលដឹកនាំដោយតារាជើងចាស់ Ann Thongprasom ៕