មនុស្សចរិតលើស ៦យ៉ាងដែលគ្មានអ្នកណាចង់រាប់អាន ឬចង់បានជាសង្សារ

2018-08-23 00:40:00
ចំនួនមតិ 0 | ចំនួនចែករំលែក 0

ធ្លាប់សង្កេតមើលខ្លួនឯងទេថាជាមនុស្សទាក់ទាញប៉ុណ្ណា? បើសិនអ្នកជាមនុស្សដែលមានតែអ្នកចង់ចូលជិត ចង់និយាយជាមួយនោះគឺជារឿងដ៏ល្អ ហើយអ្នកគួរតែស្វែងរកចំណុចល្អខ្លួនឯងឲ្យឃើញដើម្បីរក្សាវាទុក និងចែករំលែកដល់មនុស្សជាទីស្រលាញ់របស់អ្នក។ ប៉ុន្តែបើសង្កេតមើលទៅ ឃើញថាខ្លួនឯងគ្មានចំណុចទាក់ទាញសោះ មិនសូវមានមិត្តភ័ក្ដិ មិនសូវមានអ្នកចង់និយាយរក ឬសង្សារក៏គ្មាន អ្នកគួរតែរកចំណុចខ្វះខាតរបស់ខ្លួនដើម្បីកែលម្អហើយ។ ខាងក្រោមនេះ កញ្ញាសូមចែករំលែកអំពីសកម្មភាព ៦យ៉ាងដែលនឹងធ្វើឲ្យយើងក្លាយជាមនុស្សម្នាក់ដែលមិនសូវមានអ្នកចង់ចូលជិត៖

១. ចិត្តក្ដៅ ប៉ះរលាក

រឿងអារម្មណ៍នេះមួយគឺជាអ្វីដែលយើងត្រូវប្រុងប្រយ័ត្ន កុំឲ្យជួបរឿងអ្វីបន្តិចក៏ផ្ទុះកំហឹងឆេវឆាវ ចង់បានអ្វី ចង់បានភ្លាមៗ តាមតែចិត្តខ្លួនឯងបែបនោះ មិនមែនជាអ្វីល្អឡើយ។ ផ្ទុយទៅវិញបើយើងជាមនុស្សចិត្តត្រជាក់ និយាយស្ដីមានហេតុផល និងអាចគ្រប់គ្រងអារម្មណ៍ខ្លួនឯងបាន យើងនឹងក្លាយជាមនុស្សគួរឲ្យរាប់អាន និងចូលជិត។

២. និយាយស្ដីឈ្លើយ មិនសូវគិត

ការនិយាយស្ដី ឬពាក្យសម្ដីគឺជាចំណុចដ៏សំខាន់មួយក្នុងមិត្តភាព។ អ្នកណាៗក៏ត្រូវការស្ដាប់ឮពាក្យសម្ដីពីរោះៗ ឬពាក្យដែលធ្វើឲ្យគេសប្បាយចិត្តដែរ ប៉ុន្តែបើយើងជាមនុស្សដែលនិយាយស្ដីត្រង់ភ្លឹង ឬនិយាយពាក្យអាក្រក់ៗមិនយល់ពីអារម្មណ៍អ្នកនៅជុំវិញខ្លួន នោះនឹងធ្វើឲ្យអ្នកដទៃអស់អារម្មណ៍ល្អៗជាមួយយើង។ មិនមែនចង់ឲ្យនិយាយផ្អែមគ្រប់ពេលនោះទេ ប៉ុន្តែអ្នកគួរយកចិត្តទុកដាក់បន្តិចចំពោះពាក្យសម្ដីរបស់ខ្លួន ព្រោះថាបើយើងចេះនិយាយល្អ នឹងអាចឲ្យសត្រូវក្លាយជាមិត្ត ប៉ុន្តែបើនិយាយមិនចេះគិតនឹងអាចឲ្យមិត្តក្លាយជាសត្រូវ។

៣. ចូលចិត្តរិះគន់ មើលងាយអ្នកដទៃ

គ្មានអ្នកណាចូលចិត្តមនុស្សដែលចាំតែរិះគន់ និងមើលងាយអ្នកដទៃឡើយ។ បើទោះបីយើងមានអារម្មណ៍ថាអ្នកដទៃតូចទាបជាងយើងយ៉ាងណា ប៉ុន្តែយើងក៏គ្មានសិទ្ធិរិះគន់មាក់ងាយជីវិតអ្នកដទៃដែរ។ សាកគិតទៅ បើសិនខ្លួនឯងត្រូវគេមើលងាយ ដោយមិនបានធ្វើអ្វីប៉ះពាល់គេផង តើនឹងមានអារម្មណ៍បែបណា? មនុស្សម្នាក់ៗមិនថាមានមិនថាក្រ រូបរាងល្អ ឬអាក្រក់ គឺសុទ្ធតែមានតម្លៃស្មើៗគ្នា ដរាបណាពួកគេមិនបានប្រព្រឹត្តអំពើខុសឆ្គង។

៤. អំនួតហួសហេតុ

ការមានទំនុកចិត្តលើខ្លួនឯងគឺជារឿងល្អ ប៉ុន្តែក៏គួរមានព្រំដែនសមរម្យ ដោយយើងគួរតែចេះទទួលយកការគិតរបស់អ្នកដទៃខ្លះ និងចេះទទួលស្គាល់ចំណុចខ្សោយរបស់ខ្លួនឯងខ្លះ មិនអាចគិតថាខ្លួនឯងត្រូវរហូតនោះឡើយ។

៥. ចូលចិត្តនិយាយអាក្រក់ក្រោយខ្នងគេ

ធ្វើជាមនុស្សស្រីដែលពូកែនិយាយដើម ពូកែនិយាយអាក្រក់ៗពីក្រោយខ្នងគេ ក៏មិនជារឿងល្អដែរ ព្រោះគ្មានអ្នកណាចង់ឲ្យខ្លួនឯងក្លាយជាប្រធានបទក្នុងការសន្ទនារបស់គេឯងឡើយ។ បើអ្នកពូកែនាំរឿងពីមួយកន្លែងទៅមួយកន្លែងបែបនេះ មនុស្សគ្រប់គ្នានឹងលែងទុកចិត្តអ្នក ដោយសារខ្លាចអ្នកយករឿងគេទៅនិយាយដែរ។

៦. ពូកែច្រណែន និងអន់ចិត្ត

បើសិនអ្នកតូចចិត្តដោយសារភាគីម្ខាងទៀតធ្វើខុសមែន ឬត្រឹមតែម្ដងពីរដងនោះ មិនមែនជាបញ្ហានោះទេ ប៉ុន្តែបើវាញឹកញាប់ពេក សូម្បីតែរឿងតិចតួចក៏មិនលើកលែងបាននោះ វាប្រាកដជាលំបាកទាំងសម្រាប់ខ្លួនឯង និងអ្នកនៅជុំវិញខ្លួន។ វាអាចចំណាយពេលវេលាបន្តិច ប៉ុន្តែបើអ្នកជាមនុស្សពូកែតូចចិត្តនិងគិតច្រើនមែន នោះគួរតែរៀនកែលម្អទម្លាប់បែបហ្នឹងចេញខ្លះហើយ ៕