មកស្គាល់តំបន់ទេសចរណ៍ថ្មីប្លែកបែបធម្មជាតិ ចំណាយតិច នៅមិនឆ្ងាយពីភ្នំពេញ

2018-08-16 10:14:53
ចំនួនមតិ 0 | ចំនួនចែករំលែក 0

តំបន់ទេសចរណ៍មួយកន្លែងទើបតែបង្កើតថ្មី មានឈ្មោះថាអង្គរបូរី ហូមស្ទេយ៍មានទីតាំងស្ថិតនៅក្នុងភូមិស្ទោល ឃុំស្ទោល ស្រុកអង្គរបូរី ខេត្តតាកែវ។ នេះគឺជាគម្រោងអេកូទេសចរណ៍បែបដំណាំធម្មជាតិទី១ ក្នុងចំណោមគម្រោងទាំង៥៦ទៀត ដែលបង្កើតឡើងដោយ Unique Trip Cambodia ក្នុងគោលបំណងដើម្បីជួយដល់ជីវភាពរបស់បងប្អូនប្រជាពលរដ្ឋក្នុងសហគមន៍។

សម្រាប់តម្លៃបន្ទប់ ម្ហូបអាហារ និងសេវាកម្មផ្សេងៗ មានគោលការណ៍ច្បាស់លាស់ មិនកាត់ថ្លៃផ្តេសផ្តាស ដូចជាបន្ទប់គ្រែមួយគេងបានពីរនាក់ មានតម្លៃកំណត់មិនឲ្យលើសពី១៥ដុល្លារក្នុងមួយយប់ និងមានកញ្ចុះនៅជាប់ជើងភ្នំសម្រាប់អង្គុយលេង មើលទេសភាពធម្មជាតិ និងផ្កាឈូករ័ត្នដ៏ស្រស់បំព្រងថែមទៀតផង។

លោក សៀន សារិទ្ធ នាយកគ្រប់គ្រងគម្រោងអេកូទេសចរណ៍ នៅអង្គរបូរី ហូមស្ទេយ៍បានរៀបរាប់ប្រាប់មក វេបសាយ កញ្ញា ថា "ដោយសារតែអង្គរបូរី មានភ្នំដាដែលធ្លាប់ជាទឹកដីនគរគោកធ្លក ជាទឹកដីដើមរបស់ប្រទេសកម្ពុជា ទើបមាននិស្សិតជាច្រើនតែងធ្វើការចុះកម្មសិក្សានៅទីនេះ ដូច្នេះហើយបានជាមានលោកបង្កើតគម្រោងនេះឡើង ដើម្បីផ្តល់សេវាកម្ម កន្លែងស្នាក់សមរម្យមួយ និងបានជួយដល់សហគមន៍ផងដែរ។”

មានភ្ញៀវទេសចរណ៍ជាច្រើនបានទៅលេងជារៀងរាល់ថ្ងៃ ដើម្បីធ្វើការថតរូបលេង និងស្រូបយកខ្យល់អាកាសបរិសុទ្ធ និងទទួលទានអាហារយ៉ាងឈ្ងុយឆ្ងាញ់។ ជាពិសេសអង្គរបូរី ហូមស្ទេយ៍ មានសេវាកម្មថតរូបបែបអាជីព ជូនដោយឥតគិតថ្លៃ ដោយប្រើកាមេរ៉ាដែលមានគុណភាពខ្ពស់សម្រាប់អ្នកទេសចរណ៍ បានទៅលេងនៅទីនោះ។

នាយកគ្រប់គ្រង សៀន សារិទ្ធ បានបន្តទៀតថា "ឥលូវនេះសម្រាប់កន្លែងស្នាក់នៅមិនទាន់រួចរាល់នៅឡើយទេ ប៉ុន្តែនឹងបើកដំណើរការ នៅខេតុលា ឆាប់ៗខាងមុខនេះ ព្រោះវាជាខែសម្បូរបង្កងមានរសជាតិឆ្ងាញ់និងមានគុណភាពល្អជាងគេនៅក្នុងប្រទេសកម្ពុជា។"

គូរបញ្ជាក់ដែរថា នៅក្នុងប្រវត្តិសាស្ត្រទឹកដីអង្គរបុរី គឺទីក្រុងចាស់នគរហ្វូណន និងជាកន្លែងកំណើត ព្រះនាងលីវយីនិងព្រះបាទហ៊ុន ទាន តាំងពីដើមរៀងមក។

អត្ថបទ៖ ដេត ឈុនអ៉ី