តារាស្រីច្រើនដួងដែលឡើងកូដជាថៅកែស្រីស្ដុក លែងស្រណោះសិល្បៈ

2018-08-15 03:47:17
ចំនួនមតិ 0 | ចំនួនចែករំលែក 0

ក្រោយពីបានប្រឡូកសិល្បៈ កសាងកេរ្តិ៍ឈ្មោះល្បីល្បាញរួចហើយ តារាស្រីប៉ុន្មានដួងខាងក្រោម សុខចិត្ត Bye bye លែងក្រាញននៀលនឹងអាជីពនេះបន្តទៀត ទៅធ្វើជាថៅកែស្រីវិញម្ដង។

ក្នុងជីវិតយ៉ាងស៊ីវីល័យ ជំនួញប្រាក់រាប់ម៉ឺនដុល្លារ តារាទាំងនេះ ខ្លះជាថៅកែស្រីក្រោយចប់សិល្បៈ ខ្លះបានបើកហាងពេលចូលសិល្បៈបានកណ្ដាលទី តែក្រោយមកក៏លាសិល្បៈ មកពង្រឹងការរកស៊ីឲ្យពេញដៃវិញ។

សាសា

តារាចម្រៀង សាសា បានចាកឆ្ងាយពីសិល្បៈ អស់រយៈពេលយូរឆ្នាំមកហើយ ដោយមកផ្លាស់ប្ដូរជីវិតជាថៅកែស្រី ក្នុង មុខជំនួញ៣ តែម្ដង។ ក្នុងនោះ មានភោជនីយដ្ឋាន កន្លែងហាត់ប្រាណ និងផលិតផលថែរក្សាសម្ផស្ស។ មុខជំនួញធំនេះ ម្ចាស់បទ "ផុតម៉ោង១២" ចំណាយប្រាក់ច្រើនម៉ឺនដុល្លារ។

ម៉ារី

តារានិយមបញ្ចេញសាច់សខ្ចីរូបនេះ ក៏បានក្លាយជាថៅកែស្រីវ័យក្មេង លក់ផលិតផលថែរក្សាសម្រស់ បន្ទាប់ពីកសាងស្នាដៃក្នុងវិថីសិល្បៈ រួចមក។ លើសពីនេះ ម៉ារី ថែមទាំងបង្កើត Brand ដោយដាក់ឈ្មោះខ្លួនឯងតែម្ដង លើមុខជំនួញមួយនេះ។

បេនីយ៉ាំង

មិនខុសគ្នាប៉ុន្មានទេ កញ្ញាចូលចិត្តស្លៀកពាក់សិចស៊ី បានបើកហាង និងលក់ផលិតផលថែរក្សាសម្ផស្សយ៉ាងកាក់កប។ បេនីយ៉ាំង ធ្លាប់ទម្លាយថា ហាងរបស់នាងមានទីតាំងនៅម្តុំបឹងត្របែក ចំណាយទុនអស់ជាង២០ម៉ឺនដុល្លារ ដោយគ្មានការចូលហ៊ុនពីអ្នកណាឡើយ។

អែន ជី

អតីតតារាចម្រៀងផលិតកម្មសាន់ដេ បានបើកហាងពីរជាមួយស្វាមី តាំងពីអ្នកទាំងពីរមិនទាន់រៀបការ គឺហាងលក់សម្លៀកបំពាក់ អស់ទុន២ ម៉ឺនដុល្លារ និងហាងសាច់អាំង អស់ទុនជាង២ម៉ឺនដុល្លារ ។ ចាប់តាំងពីបើកមុខជំនួញ ម្ចាស់បទ "ស្រលាញ់បង មិនខ្វល់ពីអតីតកាល" វក់វីនឹងការរកស៊ី រហូតលែងអើពើនឹងសិល្បៈ។

គង់ ចាន់ស្រីមុំ

តាំងពីចូលរោងការ ជាមួយលោក គឹម សីហា មក អ្នកម្ដាយកូនមួយ រូបនេះ លែងខ្វល់នឹងការថតភាពយន្ត ឬ MV ទៀត ដោយសម្ងំកើបប្រាក់ពីហាងលក់សម្លៀកបំពាក់ ហាងលក់គ្រឿងសម្អាង និងហាងអាហាររបស់ខ្លួន។ ថៅកែស្រីរូបនេះ កាក់កបនឹងជំនួញរាប់ម៉ឺនដុល្លាររបស់ខ្លួនខ្លាំងណាស់ ដោយបានពង្រីកសាខាហាង ជាបន្តបន្ទាប់។

ផាន់ ម៉ូនីកា

ហេតុផលដែលធ្វើឲ្យ ផាន់ ម៉ូនីកា មិនអាចវិលចូលសិល្បៈវិញបានដោយសារបច្ចុប្បន្ននេះនាង ត្រូវមើលខុសត្រូវទៅលើអាជីវកម្មជាច្រើនក្នុងដៃមានដូចជា៖ ភោជនីយដ្ឋាន ហាងលក់សម្លៀកបំពាក់ និងការនាំចេញ នាំចូលផលិតផលមួយចំនួនមកពីក្រៅប្រទេស។ ក្រៅពីជាប់រវល់ជាមួយមុខរបស់រកស៊ីម្ចាស់បទ"សង្គ្រាមស្នេហ៍ និងវណ្ណៈ" ក៏ត្រូវមើលថែទាំកូនៗទាំងពីរផងដែរ។ អតីតតារាសាន់ដេរូបនេះ បានក្លាយជាជំទាវកាលពីឆ្នាំ ២០១៦ កន្លងទៅ ក្រោយពីលោក គង់ សុខម៉េង ជាស្វាមីត្រូវបានតែងតាំងជាជំនួយការផ្ទាល់របស់សម្ដេចក្រឡាហោម ស ខេង។

ឈិត សុជាតា

ក្រោយពីមានដំណឹងកូនភ្លោះមក អតីតពិធីការីនី និងសម្ដែងរូបនេះ បានសម្រេចចាកចេញពីសិល្បៈ ដើម្បីមកពង្រឹងរបររកស៊ីរបស់ខ្លួនលើក្រុមហ៊ុនទេសចរណ៍វិញ ។ ថៅកែស្រីរូបនេះ កំពុងមានសុភមង្គលខ្លាំងណាស់នឹងការរកស៊ី ព្រមទាំងជីវិតគ្រួសារ៕

ប្រភព៖ sabaynews អត្ថបទ៖ លឹម សុនា