Fan Bingbing ត្រូវលុបឈ្មោះចេញពីភាពយន្តរបស់កំពូលតារាហូលីវូដ Bruce Willis
- 2018-08-13 06:40:25
- ចំនួនមតិ 0 | ចំនួនចែករំលែក 0
Fan Bingbing ត្រូវលុបឈ្មោះចេញពីភាពយន្តរបស់កំពូលតារាហូលីវូដ Bruce Willis
Poster ផ្សព្វផ្សាយរបស់ភាពយន្ត “Unbreakable Spirit” ត្រូវបានផ្សព្វផ្សាយយ៉ាងទូលំទូលាយមុនថ្ងៃចាក់បញ្ចាំង តែគេមិនបានប្រទះឃើញឈ្មោះរបស់តារាស្រីល្បីឈ្មោះចិន Fan Bingbing ឡើយ។
មុននេះបន្តិច Poster ផ្សព្វផ្សាយផ្លូវការនៃខ្សែភាពយន្តហូលីវូដ “Unbreakable Spirti” ត្រូវបានបញ្ចេញដើម្បីទាក់ទាញទស្សនិកជន មុនថ្ងៃរឿងនេះត្រូវដាក់បញ្ចាំងនៅចិនដីគោកនាថ្ងៃទី២៦ ខែតុលាខាងមុខ។ តាមការផ្សព្វផ្សាយមុននោះ ខ្សែភាពយន្តនេះមានការចូលរួមរបស់តារាអាស៊ីជួរមុខជាច្រើនដូចជា Liu Ye, Nicholas Tse, Song Seung Hun និង Fan Bingbing ជាដើម។ យ៉ាងណាក្ដី ក្នុង poster ដែលត្រូវបានបញ្ចេញនៅថ្ងៃទី៧ ខែសីហានោះ ឈ្មោះរបស់តារាសម្ដែងលំដាប់ A ចិន Fan Bingbing មិនត្រូវបានគេបញ្ចូលនោះឡើយ។
ដោយសារតែ ភាពយន្តនេះត្រូវបានគេថតយូរហើយ ដូចនេះករណីដែលស្រីស្អាតវ័យ៣៦ឆ្នាំត្រូវគេប្ដូរតួគឺមិនអាចឡើយ។ ករណីមួយទៀតដែលត្រូវបានគេសន្និដ្ឋាននោះគឺ តារារូបនេះពិតជាបានសម្ដែងក្នុងរឿងនេះមែន តែក្រោយមកក៏ត្រូវបានលុបឈុតឆាករបស់នាងវិញ ត្បិតរឿងអាស្រូវគេចពន្ធរាប់លានដុល្លាររបស់នាងពេលបច្ចុប្បន្ន។
ជាមួយគ្នានេះដែរ បណ្ដាញព័ត៌មានចិនដីគោកក៏បានចុះផ្សាយដែរថា បុគ្គលិករបស់តួរឿង “ព្រះនាងយេយេ” ក៏ត្រូវបានប៉ូលិសគាស់ហៅដើម្បីស៊ើបសួរព័ត៌មានផងដែរ៕