មនុស្ស​ស្រី​​ពូកែ និង​ជោគជ័យ​​ក្នុង​ជីវិត ​មិន​អាច​ខ្វះ​​ចំណុច​ខ្លាំង ៥​យ៉ាង​នេះ​ឡើយ

  • 2018-08-11 08:45:00
  • ចំនួនមតិ 15 | ចំនួនចែករំលែក 243

មនុស្ស​ប្រុស​ជា​ច្រើន​នាក់​ប្រាកដ​ជា​សម្លឹង​មក​ថា​មនុស្ស​ស្រី​គឺ​ជា​ភេទ​ទន់​ខ្សោយ ឆាប់​ចុះចាញ់ មិន​មាន​ជំហរ​ផ្ទាល់​ខ្លួន មិន​សូវ​ហ៊ាន​អារកាត់ -ល-។ ប៉ុន្តែ​បច្ចុប្បន្ន​អ្វី​ៗ​បាន​ផ្លាស់​ប្ដូរ​ហើយ ហើយ​​ឥទ្ធិពល​មនុស្ស​ស្រី​ក្នុង​សង្គម​ក៏​មាន​ស្មើ​គ្នា​នឹង​បុរស​ដែរ មិន​ថា​ក្នុង​ការងារ ឬ​គ្រួសារ ស្រ្តី​សុទ្ធ​តែ​មាន​តួនាទី​សំខាន់។ នៅ​ថ្ងៃ​នេះ​ដែរ​កញ្ញា​នឹង​បង្ហាញ​នូវ​បុគ្គលិកលក្ខណៈ​ចំនួន ៥​ដែល​មនុស្ស​ស្រី​ពូកែ​និង​ជោគជ័យ​ក្នុង​ជីវិត​ច្រើន​មាន​ដូច​គ្នា។

១. អភិវឌ្ឍ​សមត្ថភាព​ខ្លួន​ជានិច្ច

មិន​មែន​គ្រប់គ្នា​កើត​មក​ព្រម​ជាមួយ​ភាព​ជោគជ័យ​នោះ​ទេ។ ការ​សម្រេច​បាន​ជោគជ័យ​គឺ​អាស្រ័យ​លើ​ពេលវេលា និង​ភាព​មោះមុត​តស៊ូ​របស់​មនុស្ស។ មនុស្ស​ស្រី​ដែល​ជោគជ័យ​ត្រូវ​មាន​ព្រម​គ្នា​ទាំង​កម្លាំង​ចិត្ត​និង​កម្លាំង​កាយ ក្នុង​ការ​រៀន​សូត្រ​អភិវឌ្ឍ​សមត្ថភាព​របស់​ខ្លួន​ឲ្យ​កាន់​តែ​មាន​ប្រសិទ្ធភាព ដើម្បី​ឲ្យ​ជឿជាក់​ថា​ចំណេះដឹង​របស់​នាង​ជា​របស់​សំខាន់​ដែល​គ្មាន​អ្វី​ជំនួស​បាន។ ​

២. គ្រប់គ្រង​ហិរញ្ញវត្ថុ​បាន​ល្អ

មនុស្ស​ស្រី​ជោគជ័យ​ភាគ​ច្រើន មាន​សមត្ថភាព​ក្នុង​ការ​គ្រប់គ្រង​ចាត់ការ​ចំណូល​ចំណាយ​បាន​យ៉ាង​ល្អ។ រឿង​​លុយ​កាក់​គឺ​ជា​រឿង​ដែល​មនុស្ស​ស្រី​ភាគ​ច្រើន​ឲ្យ​តម្លៃ​យ៉ាង​សំខាន់ ព្រោះ​វា​ធ្វើ​ឲ្យ​ពួក​គេ​អាច​គ្រប់គ្រង​ផ្នែក​ផ្សេង​ៗ​ក្នុង​ជីវិត​បាន តាម​រយៈ​ការ​សន្សំ​ប្រាក់ ការ​បណ្ដាក់​ទុន និង​ការ​គ្រប់គ្រង​ខ្ទង់​ចំណូល​ចំណាយ​ឲ្យ​មាន​របៀបរៀបរយ។

៣. ចាត់​ទុក​គ្រួសារ​​នៅ​លេខ​រៀង​ទី​មួយ

គ្រួសារ​មាន​តួនាទី​សំខាន់​ណាស់​ចំពោះ​ភាព​ជោគជ័យ​របស់​មនុស្ស​ស្រី។ មនុស្ស​ស្រី​ជោគជ័យ​តែង​មាន​គ្រួសារ​ជា​កម្លាំង​ជំរុញ​ចិត្ត បើ​ទោះ​បី​ត្រូវ​ធ្វើ​ការ​ធ្ងន់ ឬ​មាន​ទំនួល​ខុស​ត្រូវ​ខ្ពស់ ប៉ុន្តែ​ពួក​នាង​នឹង​បែង​ចែក​ពេល​វេលា​សម្រាប់​គ្រួសារ​ជានិច្ច។ សម្រាប់​មនុស្ស​ស្រី ភាព​ជោគជ័យ​​ដែល​កើត​ឡើង​លើ​ខ្លួន​នាង ក៏​ជា​ភាព​ជោគជ័យ​របស់​គ្រួសារ​ដូច​គ្នា ដូច្នេះ​ហើយ​ទើប​មនុស្ស​ស្រី​ជោគជ័យ​ភាគ​ច្រើន​តែង​ស្វែង​រក​តុល្យភាព​រវាង​ជីវិត​គ្រួសារ និង​ជីវិត​ការងារ។

៤. ជំនឿ​ចិត្ត និង​មិន​ចុះចាញ់

ការ​មាន​ភាព​ជឿជាក់ និង​ការ​ខិតខំ​តស៊ូ​គឺ​ជា​គុណសម្បត្តិ​ដ៏​សំខាន់​របស់​មនុស្ស​ស្រី​ជោគជ័យ។ សព្វ​ថ្ងៃ​នេះ មនុស្ស​ស្រី​ច្រើន​ត្រូវ​បាន​គេ​វាយ​តម្លៃ​ទាប​ជាង​បុរស​ ជា​ពិសេស​ក្នុង​ផ្នែក​ការងារ។ ប៉ុន្តែ​មិន​ថា​អ្នក​ដទៃ​គិត​យ៉ាង​ណា មនុស្ស​ស្រី​ដែល​ពូកែ​​ក៏​នៅ​តែ​មើល​ឃើញ​គុណ​តម្លៃ​​នៃ​សមត្ថភាព​ដែល​ខ្លួន​មាន និង​មិន​ព្រម​ឲ្យ​នរណា​មក​បន្ទាប​តម្លៃ​របស់​នាង​បាន​ឡើយ។ ភាព​ជឿជាក់​អាច​ជំរុញ​ឲ្យ​នាង​តស៊ូ​រហូត​បាន​សម្រេច ទៅ​តាម​គោលដៅ​ដែល​នាង​បាន​កំណត់​ទុក​យ៉ាង​ច្បាស់លាស់។

៥. មិន​ខ្លាច​នឹង​ដើរ​ចេញ​ពី​ទម្លាប់​ស្រួល​ៗ

មនុស្ស​ស្រី​រឹង​មាំ​គឺ​អាច​ប្រឈម​មុខ​នឹង​ស្ថានការណ៍​​ដែល​មាន​ភាព​ប្រថុយប្រថាន​បាន។ បើ​ទី​ណា​មានឱកាស​ឲ្យ​នាង​អាច​សាក​ល្បង​អ្វី​ថ្មីៗ​បាន នាង​នឹង​សម្រេច​ចិត្ត​មិន​ស្ទាក់ស្ទើរ ហើយ​សកម្មភាព​ទាំង​អស់​នេះ​តែង​នាំ​នាង​ទៅ​កាន់​ភាព​ជោគជ័យ ព្រោះ​វា​ស្ដែង​ឲ្យ​ឃើញ​ពី​សមត្ថភាព​របស់​នាង​ក្នុង​ការ​សម្រប​ខ្លួន​បាន​គ្រប់​ស្ថានការណ៍ ៕

ប្រភព៖ gangbeauty ប្រែ​សម្រួល៖ ស្វាយ វ៉ាន់ថន