កុំធ្វើ​ខ្លួន​ទន់ជ្រាយ​ដើម្បី​ទាក់ចិត្ត​មនុស្ស​ប្រុស ព្រោះ​អ្នក​ដែល​គេ​ជ្រើស​នៅ​តែ​ជា​មនុស្ស​ស្រិ​រឹងមាំ

  • 2018-07-25 02:30:00
  • ចំនួនមតិ 0 | ចំនួនចែករំលែក 0

មនុស្ស​ស្រី​មួយ​ចំនួន​​មាន​ភាព​ទន់ភ្លន់ ស្រស់​ស្អាត​ដូច​ផ្កា​ដែល​ជា​ចំណុច​មួយ​ទាក់ទាញដល់​មនុស្ស​ប្រុស​។ ដោយឡែក​ការសិក្សាខ្លះ​បានបង្ហាញថា​បុរសនៅទីបញ្ចប់នឹងធុញទ្រាន់នឹង​មនុស្ស​ស្រី​បែបនេះ។

រូបតំណាង

នៅក្នុងសង្គម​សព្វថ្ងៃ​នេះ​​មនុស្ស​ស្រី​មានសមត្ថភាព​ធ្វើកិច្ចការ​ជាច្រើន មិន​មែន​សម្ងំ​ចាំ​តែ​ឲ្យ​មនុស្ស​ប្រុស​ចិញ្ចឹម​នោះ​ទេ។ នេះ​ជាមូលហេតុ​មួយ​​ដែល​បុរស​សព្វថ្ងៃ​តែងតែ​មានអារម្មណ៍​ល្អ​នៅពេល​គេនៅ​ជាមួយ​មនុស្ស​ស្រី​ដែល​សកម្ម​ ហើយ​ចាប់​ផ្ដើម​អស់​អារម្មណ៍​ជាមួយ​មនុស្ស​ស្រីអកម្ម​ដែលអង្គុយ​នៅ​មួយ​កន្លែងរង់ចាំ​គេ​ធ្វើអ្វីៗគ្រប់យ៉ាងសម្រាប់​នាង។ បើ​ទោះបីជា​ដំបូង​វាអាចទៅរួចសម្រាប់​បុរសក្នុងការស្រលាញ់​ក្មេងស្រីដែល​មាន​ការ​​អៀន​ច្រើន​​ឬ​មិន​សូវ​រឹងមាំ ប៉ុន្តែមិនយូរមិនឆាប់​គេនឹង​មានអារម្មណ៍​ក្រៀមក្រំ​ដោយសាររឿងនេះ ហើយ​គេក៏​ចាប់​ផ្ដើម​ដឹង​ខ្លួន​ថា​មិនអាចស្រឡាញ់​មនុស្សម្នាក់ដែលតែងតែ​​ស្រប​តាម​អ្នក​ដទៃ ដោយ​មិន​អាច​សម្រេច​ចិត្ត​អ្វី​ដោយ​ខ្លួន​ឯង​នោះ​ទេ។ ​ បែប​នេះ​ហើយ​មនុស្ស​ស្រី​មិន​គួរ​យក​ភាព​ទន់ជ្រាយ ឬ​ក៏​សម្រស់​ស្រស់​ដូច​ផ្កា​នោះ​មក​ចាប់​មនុស្ស​ប្រុស​ម្នាក់​ធ្វើ​ជា​បង្អែក​នោះ​ទេ។ ត្រូវ​​ធ្វើ​ជា​បង្អែក​ខ្លួន​ឯង​ឲ្យ​បាន​សិន មុន​នឹង​ចង់​បាន​អ្នក​ណា​ម្នាក់​មក​ធ្វើ​ជា​បង្អែក​អ្នក​ ព្រោះ​ពេល​នោះ​យ៉ាង​ហោច​ណាស់​អ្នក​មិន​ស្លាប់​ពេល​បាត់​បង់​គេ។

រូបតំណាង

រាល់​ថ្ងៃ​អ្នក​ត្រូវ​ដាស់​តឿន​ខ្លួន​ឯង​ថា ត្រូវ​តែ​ក្លាយ​ជា​មនុស្ស​ស្រី​ម្នាក់​ដែល​រឹង​មាំ។ វា​មិន​មែន​សម្រាប់​តែ​ខ្លួន​ឯង​ទេ តែ​ភាព​រឹងមាំ​នេះ​គេ​សម្រាប់​គ្រួសារ និង​អនាគត​កូនៗ​អ្នក។

ធ្លាប់​សួរ​ខ្លួន​ឯង​ទេ ថា​តើ​ក្នុង​លោក​នេះ​មាន​មនុស្ស​ប្រុស​ល្អ​ប៉ុន្មាន​អ្នក​ដែល​ចង់​ទទួល​យក​មនុស្ស​ស្រី​ម្នាក់​ដែល​ទន់ជ្រាយ​ខ្លាំង រហូត​គ្មាន​អ្វី​ជា​របស់​ខ្លួន​នោះ? ចុះ​​ហេតុ​អី​មិន​ព្រម​គិត​ថា​ធ្វើ​ជា​មនុស្ស​ស្រី​ម្នាក់​ដែល​អាច​ឲ្យ​អនាគត​ស្វាមី​អ្នក​ពឹងផ្អែក​បាន​ទៅ?

ធ្វើ​ជា​មនុស្ស​ស្រី​ដែល​មនុស្ស​ប្រុស​ត្រូវ​ការ មិន​មែន​ជា​មនុស្ស​ស្រី​ដែល​ខ្វះ​មនុស្ស​ប្រុស​រស់​មិន​បាន​នោះ។ ធ្លាប់​គិត​អត់​ថា​បើ​អ្នក​ជា​មនុស្ស​ស្រី​ម្នាក់​ដែល​ខ្លាំង រឹងមាំ ឯករាជ្យ តើ​មនុស្ស​ប្រុស​ដែល​ចង់​បាន​អ្នក​នោះ​មាន​មោទនភាព​ប៉ុណ្ណា? តើ​អ្នក​ផ្សេង​មើល​មក​សរសើរ​ប៉ុណ្ណា? ហេតុអី​មិន​គិត​បែប​នេះ?

ឬ​អ្នក​តែងតែ​គិត​ថា​ជីវិត​មនុស្ស​ស្រី​ត្រូវ​តែ​ផ្ញើ​លើ​មនុស្ស​ប្រុស? តែង​ខ្លួន​ឲ្យ​ស្អាត ដើម្បី​រក​បុរស​មាន​ស្ដុកស្ដម្ភ​ម្នាក់​ដើម្បី​ដេកស៊ី​ទ្រព្យ​គេ? នេះ​ពិត​ជា​អន់​ពេក​ហើយ ព្រោះ​ជីវិត​អ្នក​ដូច​ជា​បញ្ញើក្អែក​អីចឹង មិន​ចេះ​រស់​ខ្លួន​ឯង។

កុំ​ធ្វើ​ខ្លួន​ទន់​ជ្រាយ ដើម្បី​តែ​ឲ្យ​គេ​អាណិត កុំ​តែង​ខ្លួន​ដើម្បី​តែ​ចង់​បាន​មនុស្ស​ប្រុស​មាន​ទ្រព្យ​នោះ ព្រោះ​នៅ​ពេល​តម្លៃ​អ្នក​ទាប ការ​ស្រឡាញ់​របស់​គេ​ក៏​ផ្ដល់​ឲ្យ​អ្នក​ទាប​ដូច​គ្នា។

រូបតំណាង

រៀន​ធ្វើ​មនុស្ស​ស្រី​ដែល​សកម្មទៅ ព្រោះ​​ចុង​ក្រោយ​មនុស្ស​ប្រុស​នឹង​រើស​យក​មនុស្ស​ស្រី​ដែល​រឹងមាំ​រួម​ផ្លូវ​ជីវិត​ជាមួយ​គេ មិន​មែន​មនុស្ស​ស្រី​ដែល​ទន់ជ្រាយ មាន​តែ​សម្រស់​នោះ​ទេ៕

ចុចអាន៖មិនមែនជា​ការ​សឹង​សឹក​ តែ​នេះជាអ្វី​ដែល​មនុស្ស​ស្រី​ត្រូវ​ធ្វើ​​ពេល​គេ​បោះបង់អ្នក

មនុស្ស​ស្រី​ចង់​បាន​ភាព​ខ្ពង់ខ្ពស់ ចាំបាច់​ត្រូវប្រាប់​ខ្លួន​ឯង​ឲ្យ​មាន​ ៦យ៉ាង​​នេះ

អត្ថបទ៖ ផេង ផលធិតា

អត្ថបទពេញនិយម