៥ចំណុចនេះ មនុស្សស្រីអាចមានឥទ្ធិពលទៅលើមនុស្សប្រុសច្រើនជាងសម្រស់ទៅទៀត

2018-07-19 10:22:17
ចំនួនមតិ 0 | ចំនួនចែករំលែក 0

គ្រប់គ្នាសុទ្ធតែប្រាថ្នាចង់ឲ្យខ្លួនឯងស្អាត ហើយក៏ចង់បានមនុស្សស្អាតដូចគ្នា តែធម្មជាតិមិនអាចមកដូចយើងគ្រប់គ្នាចង់បានទេ។ យ៉ាងណាក៏ដោយមនុស្សយើងអ្វីដែលសំខាន់មិនមែនតែសម្រស់ទេ នៅមានចំណុចច្រើនលើសនេះទៀត។ សម្រាប់មនុស្សស្រីវិញ សម្រស់គ្រាន់ជាអ្វីមួយផ្នែកតែប៉ុណ្ណោះ តែអ្វីដែលមានឥទ្ធិពលខ្លាំង ក្នុងការឆាបយកបេះដូងមនុស្សប្រុសនោះគឺ ៖

១. ការប្រើប្រាស់កែវភ្នែក

កែវភ្នែកមនុស្សស្រីគឺអាចទម្លុះបេះដូងមនុស្សប្រុសបាន ដូច្នេះអ្នកត្រូវចេះប្រើវាឲ្យបានល្អបំផុត។ អ្នកមិនគួរគេចកែវភ្នែកពេលជួបមនុស្សប្រុសនោះទេ គួរបង្កើនភាពជឿជាក់ហើយសម្លឹងគេឲ្យចំភ្នែក មិនមែនគេចៗទេ។ ម្យ៉ាងទៀតនៅពេលមនុស្សប្រុសសម្លឹងប៉ះខ្សែភ្នែកអ្នកចំ នោះគឺតែងមានអារម្មណ៍ទាក់ទាញមួយកើតឡើងមិនខាន។

រូបតំណាង

**២. ការផ្ដោតអារម្មណ៍**

សម្រស់គឺជាផ្នែកមួយដែលមនុស្សប្រុសសម្លឹងមើលមុនគេ តែមិនមែនមានន័យថាអាចទាក់យកបេះដូងមនុស្សប្រុសបាននោះទេ។ ការផ្ដោតអារម្មណ៍របស់មនុស្សស្រីទៅលើគេ គឺជារឿងមួយដែលសំខាន់ ព្រោះនៅពេលដែលអ្នកយកចិត្តទុកដាក់ សួរនាំ និងបារម្ភពីគេកាន់តែច្រើន ពេលនោះមុខអ្នកនឹងផុសឡើងក្នុងខួរក្បាលគេបន្តិចម្ដង។

៣. អារម្មណ៍ល្អ និងស្រស់ស្រាយ

មនុស្សស្រីដែលស្រស់ស្រាយ និងរីករាយគឺជានារីដែលមនុស្សប្រុសត្រូវការ និងចង់នៅក្បែរ។ ត្រូវចាំណាមនុស្សប្រុសចង់ក្បែរអ្នកមិនមែនឲ្យអ្នករករឿង ឬមួម៉ៅដាក់គេទេ តែគឺពេលក្បែរអ្នកគេចង់ទទួលបានអារម្មណ៍ល្អ និងរីករាយ។ បែបនេះហើយទើបមនុស្សស្រីដែលស្រស់ស្រាយ មិនតឹងតែងពេក ជាចំណូលចិត្តរបស់មនុស្សប្រុស តែមិនមែនមានន័យថាធ្វើចរិតក្មេងនោះទេ។

៤. ធ្វើជាខ្លួនឯង

ធម្មជាតិបែបណា គឺបែបនោះទៅ កុំព្យាយាមកែប្រែខ្លួនឯងអី។ នៅពេលដែលអ្នកប្រឹងសម្ដែង អ្នកនឹងមើលទៅឆ្គង ហើយអាចនិយាយបានថាគ្មានចំណុចពិសេសអីទាំងអស់ ព្រោះអ្នកមិនមែនជាអ្នក។ មនុស្សប្រុសចូលចិត្តមនុស្សស្រីដែលមិនលាក់ចរិត ហើយធ្វើអ្វីដែលខ្លួនចូលចិត្ត ព្រោះមើលទៅគួរឲ្យស្រឡាញ់។

៥. ទង្វើទៅកាន់មនុស្សជុំវិញខ្លួន

មនុស្សល្អ ឬមិនល្អមិនចាំបាច់មើលអីច្រើនពេកទេ មើលតែមនុស្សជុំវិញខ្លួនទៅបានហើយ។ មានគេស្រឡាញ់ ចូលចិត្តច្រើន ឬអត់? ឬអាចមើលទង្វើអ្នកទៅលើអ្នកដទៃ តើអ្នកល្អចំពោះមនុស្សគ្រប់គ្នាទេ? ឬក៏ល្អតែចំពោះមនុស្សម្នាក់ ដើម្បីគ្រាន់តែឲ្យគេចាប់អារម្មណ៍? ទាំងនេះសុទ្ធតែជាចំណុចដែលមានឥទ្ធិពលខ្លាំងទៅលើមនុស្សប្រុសហើយ។