មនុស្សស្រីគ្មានសង្សារព្រោះធ្លាប់បែកបាក់ស្នេហាពីមុន គឺជានារីដ៏ទាក់ទាញបំផុត

2018-07-18 09:16:23
ចំនួនមតិ 0 | ចំនួនចែករំលែក 0

តិចនាក់ណាស់ដែលបានជួបស្នេហាសមបំណងតែម្ដងក្នុងមួយជីវិត ព្រោះភាគច្រើនតែងតែជួបរឿងបែកបាក់គ្នាហើយទើបអាចរកឃើញស្នេហាពិតមួយបាន។ មានមនុស្សស្រីមួយចំនួនបានផ្ដាច់ខ្លួនចេញពីស្នេហាទាំងស្រុងតែម្ដង នៅពេលនាងជួបស្នេហាបែកបាក់កន្លងមក។ នេះអាចថាមកពីនាងមិនចង់ចំណាយពេលឥតប្រយោជន៍ជាមួយមនុស្សខុសទៀត ឬអាចមកពីនាងអស់អារម្មណ៍ជាមួយមនុស្សប្រុសតែម្ដង។ ការពិតមនុស្សស្រីដែលមិនពាក់ព័ន្ធជាមួយរឿងមនោសញ្ចេតនា ដោយសារនាងធ្លាប់ជួបរឿងបែកបាក់គ្នានោះ គឺជាមនុស្សស្រីដែលទាក់ទាញបំផុតសម្រាប់មនុស្សប្រុសដែលចង់បានជាគូជីវិត ៖

១. នាងមានបទពិសោធន៍ស្នេហា

ការពិតមនុស្សស្រីដែលមានបទពិសោធន៍ស្នេហាត្រូវបានគេមើលឃើញថាមានចំណុចខ្លាំងជាងនារីដែលមិនធ្លាប់មានសោះ ព្រោះយ៉ាងហោចណាស់នាងអាចយល់ពីទំនាក់ទំនងមួយរវាងមនុស្ស ២នាក់។ នាងអាចយល់ថាពេលមនុស្ស ២នាក់ចាប់ផ្ដើមស្រឡាញ់គ្នា នឹងអាចមានបញ្ហាអ្វីកើតឡើង ហើយនាងត្រូវត្រៀមខ្លួន ត្រៀមចិត្តរបៀបណា ដើម្បីកុំឲ្យជួបរឿងដដែលៗទៀត។

២. មានភាពរឹងមាំ

បន្ទាប់ពីនាងបែកបាក់គ្នា ហើយមកដល់ពេលនេះនាងមិនអី មានន័យថានាងទទួលបានមេរៀនពីស្នេហាច្រើនដែលជួយឲ្យនាងរឹងមាំជាងនារីមិនធ្លាប់មានសោះ។ នាងអាចទទួលយកនូវការបែកបាក់គ្នាពីមុន ដូច្នេះនាងមិនសូវជាទន់ជ្រាយជាមួយរឿងមនោសញ្ចេតនាទៀតឡើយ បែបនេះហើយទើបពេលខ្លះនាងមើលទៅមិនសូវជាខ្វល់ ឬស្មុគស្មាញច្រើនជាមួយមនុស្សប្រុសឡើយ។

៣. មានភាពច្បាស់លាស់

មនុស្សស្រីដែលធ្លាប់បែកបាក់ស្នេហា គឺមិនចូលចិត្តលេងសើចទៀតទេ ដូច្នេះទើបនាងសម្រេចចិត្តឃុំខ្លួនឯងចោល ដោយមិនរវល់ជាមួយអ្នកណាទាំងអស់ រហូតដល់ពេលមួយដែលនាងអាចរកមនុស្សប្រុសម្នាក់ដែលច្បាស់លាស់បាន។ ភាពច្បាស់លាស់នេះ ធ្វើឲ្យនាងមើលទៅស្ងប់ស្ងាត់ និងមានចំណុចខ្លាំងមួយដែលអាចទាក់ចិត្តមនុស្សប្រុសម្នាក់ដោយមិនដឹងខ្លួន។

រូបតំណាង

៤. មានការគ្រប់គ្រងអារម្មណ៍បានល្អ

ដោយសារតែនាងធ្លាប់ជួបរឿងឈឺចាប់ពីមុនមក គឺធ្វើឲ្យនាងអាចគ្រប់គ្រងខ្លួនឯងបានល្អជាងមុន។ នាងដឹងពីអ្វីដែលត្រូវធ្វើ និងមិនត្រូវធ្វើក្នុងស្នេហា ហើយការបញ្ចេញអារម្មណ៍ជាមួយមនុស្សប្រុសក៏ដូចគ្នា គឺនាងដឹងច្រើន។ ទាំងនេះហើយគឺអាចឲ្យនាងមានការគ្រប់គ្រងអារម្មណ៍បានល្អ ដោយមិនធ្វើតាមអារម្មណ៍ទាំងមិនដឹងអីនោះទេ។

៥. យល់ពីមនុស្សប្រុសបានច្រើន

ហេតុផលមួយដែលនាងអាចទាក់ទាញចិត្តមនុស្សប្រុសនោះគឺនាងយល់ពីគេបានច្រើនជាអ្នកដែលមិនធ្លាប់មានស្នេហា។ មួយរយៈដែលនាងទាក់ទងគ្នាជាមួយអ្នកមុន នាងអាចយល់បានថាមនុស្សប្រុសមានធម្មជាតិបែបណា ហើយនាងក៏អាចមើលពីមនុស្សប្រុសបានល្អជាងមុនដែរ។ បានមនុស្សស្រីបែបនេះ មនុស្សប្រុសនឹងមានអារម្មណ៍ថានាងចាស់ទុំ យល់គ្នាច្រើន មិនដូចក្មេងស្រីដែលទើបមានស្នេហាទេ។