ស្រ្តេសខ្លាំងមិនដឹងធ្វើយ៉ាងម៉េចបាត់ អាចដោះស្រាយដោយ ៦វិធីនេះ

2018-07-17 04:06:10
ចំនួនមតិ 0 | ចំនួនចែករំលែក 0

យុវវ័យអាយុជិតម្ភៃ ឬម្ភៃស្ដើងនេះគឺជាវ័យដែលកំពុងពេញស្រ្តេស ណារឿងរៀន ណារឿងការងារ ណារឿងគ្រួសារ មិត្តភ័ក្ដិ រឿងអស់លុយចាយជាដើម។ សម្រាប់អ្នកដែលកំពុងស្រ្តេសខ្លាំង ហើយចង់ដឹងថាត្រូវធ្វើយ៉ាងណា ខាងក្រោមនេះ កញ្ញា នឹងបង្ហាញជូននូវដំណោះស្រាយខ្លះៗ ដែលប្រិយមិត្តអាចយកអនុវត្តបានយ៉ាងមានប្រសិទ្ធភាព៖

១. ឈប់គិត និងទទួលស្គាល់ការពិតឲ្យបាន

បើយើងកំពុងស្រេ្តសហើយ នៅយករឿងស្រេ្តសមកគិតហើយគិតទៀតនោះ វាមិនបានជួយឲ្យអ្វីៗប្រសើរឡើងនោះទេ ប៉ុន្តែវានឹងធ្វើឲ្យយើងកាន់តែឈឺក្បាល។ ការស្រ្តេសខ្លាំងលើសពីធម្មតា នឹងធ្វើឲ្យយើងមានអាការគេងមិនលក់ រសាប់រសល់ និងធ្ងន់ធ្ងរបំផុតនោះគឺអាចឲ្យយើងមានជំងឺធ្លាក់ទឹកចិត្ត។ ដូច្នេះ អ្វីដែលហួសពីសមត្ថភាពយើង គួរតែបណ្ដោយៗខ្លះ។ បញ្ហាកើតឡើងសម្រាប់ឲ្យយើងដោះស្រាយ មិនមែនសម្រាប់ឲ្យយើងគិតនាំស្រ្តេសនោះទេ។

២. ញ៉ាំ

ការញ៉ាំនឹងធ្វើឲ្យយើងមានអារម្មណ៍ល្អ ជាពិសេសរបស់ផ្អែមៗ។ សូកូឡាខ្មៅត្រូវបានណែនាំថាជាអាហារល្អមួយសម្រាប់កម្ចាត់ស្រ្តេស ប៉ុន្តែបើអ្នកមិនចូលចិត្តសូកូឡាទេ គឺអាចញ៉ាំអ្វីដែលអ្នកចង់ញ៉ាំ ញ៉ាំអ្វីដែលអ្នកចូលចិត្ត ញ៉ាំហើយសប្បាយចិត្តនោះនឹងអាចឲ្យអ្នកបាត់ស្រ្តេស។

៣. ហត់នឿយ អាចសម្រាកបាន

បើមិនអាចបញ្ឈប់ការគិតបានទេ គឺគួរតែសម្រាកលំហែខួរក្បាលចេញម្ដងទៅ។ គ្មាននរណាម្នាក់ល្អឥតខ្ចោះ ឬពូកែរហូតនោះទេ ដូច្នេះបើអ្នកព្យាយាមហើយនៅតែមិនអាច នោះគួរតែដកខ្លួនសម្រាកលំហែ អង្គុយសមាធិ ជិះកង់កម្សាន្ត ឬធ្វើសកម្មភាពអ្វីមួយដែលអាចឲ្យអ្នកមានអារម្មណ៍ស្រស់ស្រាយ។

៤. ហាត់ប្រាណ

មិនថាអ្នកកំពុងមានអារម្មណ៍រងសម្ពាធ ស្ត្រេស ឬមិនសប្បាយចិត្ត កីឡាគឺជាថ្នាំពិសេសដែលអាចឲ្យអ្នកមានអារម្មណ៍ស្រស់ស្រាយ រំសាយអារម្មណ៍បាន ហើយថែមទាំងអាចឲ្យអ្នកទទួលបានសុខភាពល្អថែមទៀត។ ជ្រើសរើសកីឡាមួយដែលអ្នកចូលចិត្តមិនថាការរត់ លេងយូហ្កា វាយសី ហែលទឹក ឬរាំតាមចង្វាក់ភ្លេងជាដើម។

៥. ផ្លាស់ប្ដូរបរិយាកាសខ្លះ

បរិយាកាសជុំវិញក៏ទាក់ទងនឹងការស្រ្តេសដែរ បើយើងស្រ្តេសហើយនៅតែឃាំងខ្លួនឯងនៅកន្លែងដដែលៗ នោះវានឹងធ្វើឲ្យយើងគិតវិលវល់ដដែលៗ។ ដូច្នេះ គួរចេញទៅមើលលោកខាងក្រៅខ្លះ ស្វែងរកអ្វីថ្មីៗឲ្យជីវិតមានថាមពល។ ប៉ុន្តែបើត្រូវទៅកន្លែងឆ្ងាយៗ កុំភ្លេចរៀបចំពេលវេលាឲ្យបានល្អ ធ្វើយ៉ាងណាកុំឲ្យប៉ះពាល់ដល់ការសិក្សា និងការងារ។

៦. និយាយដោះដូរយោបល់ជាមួយមិត្តភ័ក្ដិ និងសុំការប្រឹក្សា

បើស្រ្តេសខ្លាំងពេញខួរក្បាលមិនដឹងធ្វើអ្វីបាននោះ គួរតែទៅនិយាយជាមួយមិត្តភ័ក្ដិដែលអាចទុកចិត្តបាន ឬអ្នកដែលមានបទពិសោធន៍ច្រើនជាងយើងដើម្បីសាកសុំការប្រឹក្សា រកដំណោះស្រាយ នោះអ្នកនឹងមានអារម្មណ៍ថាធូរស្រាល។ តែទោះយ៉ាងណាត្រូវប្រើការពិចារណាឲ្យបានល្អក្នុងការសម្រេចចិត្តដោះស្រាយបញ្ហា។ កុំភ្លេចថាបញ្ហាគឺជារបស់យើង ដូច្នេះយើងក៏ត្រូវដោះស្រាយខ្លួនឯង និងរើសយកវិធីណាដែលល្អបំផុតសម្រាប់យើងដូចគ្នា ៕