ចង់បានប្រុសល្អៗជាដៃគូ ស្រីៗកុំមើលគេតែសម្បកក្រៅ គួរពិនិត្យចំណុចនេះវិញ
- 2018-06-29 03:40:00
- ចំនួនមតិ 0 | ចំនួនចែករំលែក 0
ចង់បានប្រុសល្អៗជាដៃគូ ស្រីៗកុំមើលគេតែសម្បកក្រៅ គួរពិនិត្យចំណុចនេះវិញ
សម័យនេះចង់បានបុរសល្អជាដៃគូ ពិតជាពិបាកក្នុងការជ្រើសរើស ព្រោះមិនអាចយកភ្នែកមើលត្រឹមសម្រកក្រៅមនុស្សទេ តែប្រើពេលវេលាទៅសង្កេតទង្វើ និងកាយវិការយ៉ាងយូរ។ កញ្ញា សូមណែនាំពីវិធីមើលមនុស្សប្រុសល្អ ដើម្បីសម្រេចចិត្តជ្រើសរើសជាគូគាប់ តាម ៦ វិធីខាងក្រោមនេះ៖
១.ស្រលាញ់ភាពស្អាតបាត
ចំណុចសម្គាល់ទី១ គឺគាតជាមនុស្សស្រលាញ់ភាពស្អាតបាតទាំងសម្លៀកបំពាក់ សក់ក្បាល ក្រចកដៃជើង មានរបៀបរៀបរយជានិច្ច។ មនុស្សបែបនេះឃើញភាពកង្វក់កន្លែងណា នឹងចូលខ្លួនទៅជួយសម្អាតកន្លែងនោះ ទោះមិនមែនជាតួនាទីខ្លួនក៏ដោយ។
**២.មានសមត្ថភាពបែងចែកពេលវេលា**
មនុស្សប្រុសក្នុងវ័យ ២៦-៣៣ ឆ្នាំ គឺពេញរវល់រឿងរកប្រាក់ និងរឿងសប្បាយរីករាយ ប៉ុន្តែបើជ្រុលទៅចំណុចណាមួយពេក នោះមិនល្អឡើយសម្រាប់ទំនាក់ទំនងស្នេហា។ តែបើបុរសនោះចេះបែងចែកពេលវេលាធ្វើការ ស្នេហា មិត្តភាព និងរឿងផ្ទាល់ខ្លួនបាន ជីវិតគូរបស់មនុស្សស្រីនឹងមានភាពស្រស់បំព្រង។
៣.មិនញ៉ែស្រីដទៃ
សម្រាប់អ្នកដទៃ អ្នកមិនបានស្អាតដាច់គេទេ តែក្នុងកែវភ្នែកគាត់ អ្នកជាមនុស្សស្រីល្អបំផុត ហើយបើទោះជាមានស្រីផ្សេងមកព្យាយាមយកចិត្តថ្លើម ក៏គាត់មិនដែលយកភ្នែកទៅមើលដែរ។ ឫកពាបែបនេះបញ្ជាក់ថា បុរសម្នាក់នោះស្រលាញ់អ្នកស្មោះត្រង់។
៤.គោរពពាក្យសម្ដីខ្លួន
ស្ត្រីដែលបានបុរសចេះគោរពពាក្យសន្យាខ្លួន ពិតជាសំណាងខ្លាំងណាស់។ ព្រោះពាក្យដែលធ្លាប់និយាយទាំងប៉ុន្មានពេលស្រលាញ់គ្នាដំបូងៗ គាត់នឹងរក្សា និងធ្វើតាមមិនឲ្យអ្នកស្ដាយក្រោយឡើយ។
៥.គាត់គោរពមនុស្សស្រីទាំងអស់
មិនមែនតែអ្នកឡើយដែលទទួលបានការគោរពពីគាត់ មនុស្សស្រីដទៃទៀតក៏ដូចគ្នា។ គាត់តែងតែផ្ដល់អាទិភាព ការពារកិត្តិយស និងកោតស្ញប់ស្ញែងដល់នារីគ្រប់រូប ព្រោះគាត់ជាសុភាពបុរសពិតៗ។
៦.រឹងមាំ តែមិនរឹងរូស
គាត់មានភាពរឹងមាំផ្លូវកាយ និងចិត្ត ប៉ុន្តែមិនមែនរឹងរូសជម្នះតែចិត្តឯងឡើយ។ គាត់ជាមនុស្សមានហេតុផល តែងតែជាទីពឹងផ្អែករបស់អ្នកជុំវិញខ្លួនបាន មានការអធ្យាស្រ័យខ្ពស់ ចេះស្ដាប់ហេតុផលអ្នកដទៃ៕
ចុចអាន៖សម្រង់សម្ដីស្នេហាដ៏ផ្អែមល្ហែមប៉ុន្មានឃ្លានេះ ពិតជាសក្ដិសមនឹងគូស្នេហ៍