កូនស្រី៖ កុំដើររាយមន្តស្នេហ៍ពេក បើស្រឡាញ់គឺស្រឡាញ់ មិនស្រឡាញ់គឺបដិសេធន៍

2018-06-28 08:21:47
ចំនួនមតិ 0 | ចំនួនចែករំលែក 0

ស្នេហាគឺជាអារម្មណ៍ធម្មជាតិមួយដែលមនុស្សម្នាក់ៗមិនអាចប្រកែកបាន។

កុំព្រោះតែភាពឯកា ធ្វើឲ្យអ្នកទទួលមនុស្សជាច្រើនមកបន្លប់ ព្រោះនោះមិនមែនជាភាពរីករាយពិតប្រាកដមួយដែលមនុស្សស្រីគួរតែទទួលបាននោះទេ។

រូបតំណាង

មនុស្សស្រីម្នាក់ នឹងមានមនុស្សប្រុសមិនក្រោម ៥នាក់នោះទេតាមស្រឡាញ់នាង ដូច្នេះពេលនោះនាងនឹងមានជម្រើសច្រើន ប៉ុន្តែស្នេហាមិនមែនជាជម្រើសនោះទេ វាជាការស្រឡាញ់មួយដែលផុសចេញពីអារម្មណ៍ខាងក្នុង។

ធ្លាប់សួរខ្លួនឯងទេនៅពេលមានមនុស្សម្នាក់ព្យាយាមចូលមកកៀកអ្នក តើគេជាមនុស្សដែលអ្នកត្រូវការ ឬមិនមែន? អ្នកមានអារម្មណ៍ល្អខ្លាំងប៉ុណ្ណាចំពោះគេ? ហើយមានអារម្មណ៍ស្រឡាញ់គេ ឬអត់?

បើអ្នកដឹងពីអ្វីដែលអ្នកចង់បាន នោះអ្នកមិនមិនរញ៉េរញ៉ៃទៀតនោះទេ។ ពេលខ្លះអ្នកអាចនឹងអារម្មណ៍ល្អចំពោះគេ តែអ្នកមិនបានស្រឡាញ់គេនោះទេ ហើយអ្វីដែលពិបាកបំផុតនោះគឺអ្នកបានធ្វើឲ្យគេយល់ថាអ្នកស្រឡាញ់ អ្នកក៏មានចិត្តលើគេដូចគ្នា។

អ្នកពេលខ្លះអាចមានអារម្មណ៍ឯកា អផ្សុក រួចអ្នកក៏យកមនុស្សម្នាក់មកកំដរ បន្ទាប់ពីមួយរយៈហើយអ្នកក៏ចាប់ផ្ដើមធុញ រួចបន្តធ្វើបែបនេះទៅលើមនុស្សម្នាក់ទៀត។

រូបតំណាង

ការស្រឡាញ់របៀបនេះគេមិនបានរាប់ចូលនោះទេ ព្រោះវាគ្រាន់តែជាការកំដរអារម្មណ៍ឯកោអ្នកមួយពេលតែប៉ុណ្ណោះ។

ប្រហែលមនុស្សស្រីមិនដឹងទេថា ធ្វើបែបនេះអាចសម្លាប់ទឹកចិត្តមនុស្សជាច្រើនយ៉ាងសាហាវបំផុត ព្រោះគេជាអ្នកខំដាក់ចិត្ត មកលើអ្នក តែអ្នកដូចយកកាំបិតមកចាក់ដើមទ្រូងអីចឹង។

អារម្មណ៍ស្រឡាញ់គឺជាអារម្មណ៍ពិសេសមួយដែលមិនមែនអាចមានលើគ្រប់មនុស្សប្រុសដែលចូលមកជិតអ្នកឡើយ។ វាជាអារម្មណ៍មួយដែលធ្វើឲ្យមនុស្សពីរនាក់ក្លាយជាមនុស្សមានក្ដីស្រមៃតែមួយ នោះគឺការបាននៅជាមួយគ្នារហូតទៅ។

មនុស្សស្រីចាំណា កុំធ្វើខ្លួនដួចអំពិលអំពែក ម្ដងភ្លឺ ម្ដងងងឹត តែត្រូវធ្វើខ្លួនឲ្យដូចគ្រាប់ពេជ្រ ទោះនៅក្នុងកន្លែងងងឹតប៉ុណ្ណាក៏នៅតែមានពន្លឺ។

ធ្វើខ្លួនឲ្យច្បាស់លាស់ នឹងធឹង និងមានតម្លៃ ច្បាស់ជាមួយខ្លួនឯង ស្រឡាញ់គឺស្រឡាញ់ មិនស្រឡាញ់គឺបដិសេធ មិនមែនឲ្យដៃ ឲ្យជើងគេ ហើយក៏ប្រាប់គេថាមិនបានស្រឡាញ់នោះទេ។

បើស្រឡាញ់ត្រូវស្រឡាញ់ឲ្យចេញពីចិត្ត ស្មោះត្រង់ តែបើអ្នកមិនស្រឡាញ់គឺទេ កុំឲ្យឱកាសគេ កុំទទួលអំណោយគេ កុំឲ្យក្ដីសង្ឃឹមគេ ដែលនាំឲ្យគេឈឺចាប់ និងខកចិត្តខ្លាំងក្នុងជីវិតស្នេហាគេ។