បើមិនចង់មានបញ្ហាដាច់ខាតកុំស្លៀកពាក់បែបនេះ ពេលជិះនៅលើយន្តហោះ

2018-06-28 02:32:42
ចំនួនមតិ 0 | ចំនួនចែករំលែក 0

ការរើសសម្លៀកបំពាក់ឲ្យបានសមសួនពេលធ្វើដំណើរនៅលើយន្តហោះ អាចធ្វើឲ្យអ្នកមានអារម្មណ៍ស្រួលក្នុងខ្លួន ដែលនេះគឺជាអ្វីគួរតែយកចិត្តទុកដាក់បំផុត។ ទោះបីជាអ្នកមានម៉ូដដែលចូលចិត្តស្លៀកក៏ដោយ សំខាន់ត្រូវដឹងថាសម្លៀកបំពាក់បែបណា ត្រូវជៀសវាងពេលជិះនៅលើយន្តហោះ។

១. សម្លៀកបំពាក់ រញ៉េរញ៉ៃ ស្មុគស្មាញច្រើន

អ្នកត្រូវចំណាយពេលអង្គុយយូរ ហើយបើអង្គុយជិតមនុស្សមាឌធំទៀត រឹតតែចង្អៀត និងមានពេលខ្លះជើងយន្តហោះត្រូវពន្យាពេលជាដើម។ បើអ្នកស្លៀកពាក់សាំញ៉ាំ រញ៉េរញ៉ៃច្រើន ដូចជាខោអាវអៀម សំពត់ខ្លីមានរូត ឬលេវកិប អ្នកច្បាស់ជាមានអារម្មណ៍ស្អុះស្អាប់ មួម៉ៅ ហើយពិបាកសូម្បីតែពេលចូលបន្ទប់ទឹកម្តងៗ។

រូបតំណាង

**២. សម្លៀកបំពាក់អ្នកស្រលាញ់បំផុត**

អ្នកប្រហែលជាទៅទិញ សម្លៀកបំពាក់ថ្មីមានតម្លៃថ្លៃ ហើយពេញចិត្តបំផុត ថែមទាំងគុំទុកស្លៀកពេលជិះយន្តហោះឲ្យបានហំហាននឹងគេ។ យ៉ាងណា អ្នកត្រូវដឹងថា នៅលើយន្តហោះអាហារ និងភេសជ្ជៈផ្សេងៗ ងាយនឹងកំពប់ប្រឡាក់ខោអាវអ្នកខ្លាំងណាស់ ជាពិសេសប្រសិនបើអ្នកអង្គុយជិតក្មេងរពឹស ដូច្នេះបើមិនចង់ខូចអារម្មណ៍ កុំព្យាយាមស្លៀកសម្លៀកបំពាក់ណាថ្មីហើយមានតម្លៃខ្ពស់ខ្លាំងពេក។

រូបតំណាង

៣. សម្លៀកបំពាក់ដូចទៅលេងសមុទ្រ

បើទោះជាអ្នក មានគោលដៅហោះហើរទៅលេងសមុទ្រ ឬទៅប្រទេសដែលមានសីតុណ្ហភាពក្តៅក៏ដោយ មិនត្រូវស្លៀកពាក់វាលៗរលុងៗពេកទេ ព្រោះនៅលើយន្តហោះអាចត្រជាក់ខ្លាំង ដែលធ្វើឲ្យអ្នកទ្រាំមិនបាន។ អ្វីដែលគួរត្រៀមមានដូចជា អាវធំ ឬអាវក្រៅ ស្រោមជើង និងកន្សែងបង់កជាដើម។

រូបតំណាង

៤. សម្លៀកបំពាក់មានសាច់ក្រណាត់ស្កៀបរមាស់

គួរប្រុងប្រយ័ត្នចំពោះខោអាវណា ដែលមានសាច់ស្កៀបរមាស់ ព្រោះវានឹងបង្កការរំខានយ៉ាងខ្លាំង ដែលអ្នកនឹកស្មានពុំដល់។ វាអាចធ្វើឲ្យស្បែក អ្នករោលទម្រាំដល់គោលដៅចុះចត និងឆាប់ធំក្លិនអាក្រក់ពេលបែកញើស។

រូបតំណាង

៥. ពាក់ស្បែកជើងពិបាកដើរ

គួរជ្រើសរើសស្បែកជើងដែលងាយស្រួលដើរ មិនធ្វើឲ្យឈឺ ឬហើមជើង ព្រោះពេលធ្វើដំណើរ អ្នកមិនចាំបាច់លេងស្ទីលខ្លាំងពេកនោះទេ ពិសេសស្បែកជើងកែង ប៉ុន្តែអ្នកអាចពាក់ស្បែកជើងប៉ាត់តា ព្រោះវាមានភាពងាយស្រួលក្នុងការដើរជាង។

រូបតំណាង

៦. បាញ់ទឹកអប់ក្រអូបខ្លាំងពេក

អ្នកខ្លាចមានក្លិនមិនល្អ ពេលអង្គុយជិតអ្នកដទៃ ប៉ុន្តែយ៉ាងណាមិនត្រូវបាញ់ទឹកអប់ ឬលាបឡេដែលមានក្លិនក្រអូបខ្លាំងពេកទេ ព្រោះវាអាចសាយពេញយន្តហោះ ពុលគេពុលឯង ហើយអ្នកខ្លះទៀតក៏មានបញ្ហាអាលែកស្ស៊ីជាមួយក្លិន។ ដូចនេះហើយបើចង់បាញ់បន្ថែម អ្នកគួរធ្វើបន្ទាប់ពីការចុះចតរួច។

រូបតំណាង

៧. សម្លៀកបំពាក់រលុងរខិករខាកពេក

ទោះបីជាអ្នកចង់ស្លៀកខោអាវណា ដែលធូររលុងស្រួលខ្លួនក៏ដោយ ដាច់ខាតកុំឲ្យរខិករខាកពេក ព្រោះអ្នកអាចមើលទៅដូចជាជនសង្ស័យ។ ករណីនេះដែរក៏ធ្លាប់បានកើតឡើង និងចុះផ្សាយនៅក្នុង CBS News ថាជើងយន្តហោះមួយត្រូវពន្យាពេល ដោយសារមានអ្នកធ្វើដំណើរស្លៀកពាក់រលុងៗពេក ធ្វើឲ្យអ្នកត្រួតពិនិត្រគិតថា ពួកគេលាក់អ្វីមួយនៅក្នុងនោះ៕