សម្រកក្បាលពោះក្រោយសម្រាលកូនដោយក្បាច់ហាត់ប្រាណងាយៗនិងសុវត្ថិភាព

2018-06-24 09:34:52
ចំនួនមតិ 0 | ចំនួនចែករំលែក 0

ស្ត្រីជាច្រើនមានការពិបាកក្នុងការរក្សារាងរៅរបស់ខ្លួនឲ្យនៅតែស្គមស្អាតក្រោយពេលសម្រាលកូន។ ជាពិសេសក្បាលពោះគឺជាកន្លែងដែលត្រូវការការថែរក្សាជាពិសេស ហើយការសម្រកវាគឺមិនគួរឲ្យប៉ះពាល់ដល់សុខភាពឡើយ។ ហេតុដូច្នេះហើយថ្ងៃនេះ កញ្ញា សូមដកស្រង់ក្បាច់ហាត់ប្រាណខ្លះៗពីគេហទំព័រ Bright Side មកបង្ហាញ សម្រាប់អ្នកចង់សម្រកក្បាលពោះក្រោយសម្រាលកូនដោយសុវត្ថិភាព៖

១. ក្បាច់លើកជើង

គេងដាក់ដៃក៏ដូចជាដងខ្លួនឲ្យត្រង់ស្មើ រួចលើកជើងទាំងពីរប្រមាណ ១២អ៊ីញពីដី។ ធ្វើបែបនេះចំនួន ១០ទៅ១៥ដង ហើយអាចបន្ថែម២ទៅ៥ដងទៀតនៅថ្ងៃបន្តបន្ទាប់។

២. ក្បាច់ធាក់កង់

គេងរាបស្មើដដែល រួចលើកជើងឆ្លាស់គ្នាម្ដងឆ្វេងម្ដងស្ដាំ ឲ្យដូចជាអ្នកកំពុងធាក់កង់។

៣. ក្បាច់លើកជើងត្រង់

គេងរាបស្មើដដែល ហើយលើកជើងឡើងលើត្រង់ (៩០ដឺក្រេ) ដោយប្រឹងបង្ហើបស្មានិងដើមទ្រូងក្នុងពេលតែមួយ។ ដំបូង វាអាចនឹងពិបាកបន្តិច ដូច្នេះអ្នកអាចចាប់ផ្ដើមដោយបត់ជង្គង់សិនក៏បាន។ ធ្វើបែបនេះប្រមាណ ១០ដង រាល់ពេលហាត់ប្រាណម្ដងៗ។

៤. Reverse Crunch

គេងដោយលើកដៃទាំងពីរដាក់ដូចក្នុងរូប រួចលើកជើងទាំងពីរដោយបត់ជង្គង់ចុះឡើងព្រមគ្នាយឺតៗ និងហើបស្មាតិចៗ។ ធ្វើបែបនេះ ១០ទៅ១៥ដងក្នុងពេលហាត់ប្រាណម្ដងៗ។

៥. Bicycle Brunch

ក្បាច់នេះស្រដៀងក្បាច់ធាក់កង់ដែរ ប៉ុន្តែត្រូវដាក់ដៃទៅខាងក្រោយហើយបង្ហើបខ្លួនដូចក្នុងរូប និងព្យាយាមធ្វើឲ្យជង្គង់ខាងស្ដាំប៉ះកែងដៃឆ្វេង កែងដៃខាងឆ្វេងប៉ះជង្គង់ខាងស្ដាំ។

៦. ក្បាច់កុងហ្វូ

ឈរកន្ធែកជើងធំបន្តិច ដោយជើងខាងឆ្វេងរបស់អ្នកសន្ធឹងទៅក្រោយ ចំណែកជើងខាងស្ដាំបន្ទន់ជង្គង់លយមកខាងមុខ។ ដាក់ដៃស្ដាំរបស់អ្នកលើជង្គង់ខាងស្ដាំ ហើយលើកដៃខាងឆ្វេងឡើង និងបត់ខ្លួនមកស្ដាំម្ដងបន្តិច។ នៅបែបនេះបន្តិច រួចហើយសឹមឆ្លាស់វិញ ដោយដាក់ដៃឆ្វេងលើជើងឆ្វេង ហើយលើកដៃស្ដាំឡើងលើម្ដង។

៧. ក្បាច់យន្តហោះ

លត់ជង្គង់ដោយច្រត់ដៃទៅខាងមុខ។ ព្យាយាមលើកដៃស្ដាំ និងជើងឆ្វេងឡើងព្រមគ្នា ឈប់៣វិនាទី ហើយសឹមដាក់ចុះវិញ ហើយសឹមលើកដៃឆ្វេង និងជើងស្ដាំវិញម្ដង តែត្រូវធ្វើយ៉ាងណារក្សាខ្នងឲ្យនៅត្រង់ដដែល។ ធ្វើបែបនេះឆ្លាស់គ្នាចុះឡើង ឲ្យបានប្រមាណ ៥ជុំ ៕