កែ​ប្រែ​ទម្លាប់​នៃ​ការ​​គិត ដែល​ជា​មេរោគ​​​ដ៏​សាហាវ​នៅ​ក្នុង​ខួរ​ក្បាល

  • 2018-06-21 07:24:15
  • ចំនួនមតិ 0 | ចំនួនចែករំលែក 0

ជីវិត​មនុស្ស​​លោក​​ មាន​ទាំង​សុភមង្គល​មាន​ទាំង​ការ​ឈឺ​ចាប់ គឺ​អាស្រ័យ​ទៅ​លើ​បុគ្គល​និមួយៗ។ ពេល​​កើត​ទុក្ខ​ មាន​បញ្ហា អ្នក​បាន​នាំ​មេរោគ​​​ទៅ​កាន់​​ខួរ​ក្បាល ធ្វើ​ឲ្យ​ខួរ​​ក្បាល​រវើរវាយ​គិត​ច្រើន ​ប៉ុន្តែ​គ្មាន​ដំណោះ​ស្រាយ ដូច្នេះ​​បើ​​ចង់​កម្ចាត់​មេរោគ​ទាំង​នោះ​ចេញ ​អ្នក​ត្រូវ​​ផ្លាស់​ប្តូរ​​ចិត្ត​គំនិត​​​​ជាមុន​សិន ​នោះ​ជីវិត​អ្នក​នឹង​ស្រស់​ស្រាយ​មិន​គួរ​ឲ្យ​ជឿ។

អត់ឱន​រឿង​ដែល​កន្លង​​ហួស

មាន​រឿង​រ៉ាវ​​ជា​ច្រើន​ដែល ធ្វើ​ឲ្យ​អ្នក​ខឹង មួម៉ៅ​ក្តៅ​ក្រហាយ​ពិបាក​បំភ្លេច ប៉ុន្តែ​បើ​អ្នក​នៅ​តែ​​ទុក​​វា​គុំកួន​នៅ​ក្នុង​ចិត្ត ​អ្នក​គ្មាន​ថ្ងៃ​រក​ក្តី​​សុខ​ឲ្យ​ខ្លួន​ឯង​បាន​ឡើយ។ ចាត់​ទុក​ថា​វា​គ្រាន់​តែ​ជា​អតីតកាល​ដែល​​ហួស​ហើយ ទោះ​ចង​គុំនុំ​ក៏​អត់​បាន​​អី​មក​វិញ​ដែរ ​ត្រូវ​​ងើប​ឈរ​ឡើង បន្ត​ដំណើរ​ទៅ​មុខ គិតគូរ​ពី​អនាគត​ ប្រសើរ​ជា​ការ​គិត​​តែ​ពី​ស្ងប់​អ្នក​នេះ ស្ងប់​អ្នក​នោះ។

បារម្ភ​​ភ័យ​ខ្លាច​​​ចំពោះ​រឿង​ដែល​មិន​ទាន់​កើត​ឡើង

​ហេតុ​អី​​អ្នក​​ត្រូវ​បារម្ភ​ភ័យ​ខ្លាច ដេក​កើត​ទុក្ខ​ចំពោះ​រឿង​ណា​ដែល​មិន​ទាន់​​កើត​ឡើង​នៅ​ឡើយ? អ្នក​កំពុង​​តែ​រស់​នៅ​ក្នុង​បច្ចុប្បន្ន​កាល មិន​​អតីតកាល​ឬ​អនាគតកាល​​ទេ។ បើ​អ្នក​ចង់​​គិត​ពី​​អនាគត ត្រូវ​គិត​ដោយ​ភាព​ជឿជាក់​​និង​សប្បាយ​រីករាយ មិន​មែន​គិត​ដោយ​ភាព​ភ័យ​ខ្លាច។

ប្រៀប​ធៀប​​ខ្លួន​ឯង​ជាមួយ​អ្នក​ដទៃ

​បើ​អ្នក​ចូល​ចិត្ត​តែ​ប្រៀប​ធៀប​ខ្លួន​ឯង​ ជាមួយ​នឹង​មនុស្ស​ដែល​ខ្ពស់​ឬ​ល្អ​ជាង​ អ្នក​នឹង​​តូច​ចិត្ត​និង​មាន​អារម្មណ៍​ថា​​​ខ្លួន​ឯង​អន់។ មនុស្ស​ម្នាក់ៗ​សុទ្ធ​តែ​មាន​​ចំណុច​ល្អ​រៀងៗ​ខ្លួន ដូច្នេះ​​គូរ​ឈប់​ធ្វើ​ការ​ប្រៀប​ធៀប​បែប​នេះ​ទៀត​ទៅ។

រិះ​គន់​អ្នក​ដទៃ

កុំ​រិះ​គន់​វាយ​តម្លៃ​គេ ទាំង​ដែល​អ្នក​មិន​ទាន់​បាន​​ស្គាល់​គេ​​ច្បាស់​ផង។ កុំ​ទើស​គេ​គ្រប់​រឿង ដោយ​គ្មាន​ហេតុ​ផល ឬ​គ្រាន់​តែ​ឭ​តៗ​គ្នា​ក៏​ជឿ​ស្លុង។

​ច្រណែន​ឈ្នានីស​អ្នក​ដទៃ

នេះ​ជា​ទម្លាប់​អាក្រក់​ដែល​មនុស្ស​ភាគច្រើន​តែង​តែ​មាន។ បើ​អ្នក​ជា​មនុស្ស​ឲ្យ​តម្លៃ​​​លើ​ខ្លួន​ឯង ចូរ​កុំ​មាន​ចិត្ត​ច្រណែន​ឈ្នានីស​អ្នក​​​ដទៃ។ បើ​​ឃើញ​​គេ​​ជោគជ័យ​​ ឬ​ល្អ​ជាង​ខ្លួន​ ត្រូវ​ចេះ​សរសើរ​ អបអរ​​​សាទរ​នូវ​អ្វី​ដែល​គេ​ទទួល​បាន ហើយ​ខិតខំ​​ព្យាយាម​ធ្វើ​​ឲ្យ​ល្អ​ដែរ​ទៅ នោះ​អ្នក​នឹង​ឃើញ​លទ្ធផល​ដោយ​ឯង​​​ឯង។

​ត្អូញត្អែរ​ច្រើន

មនុស្ស​​ចូល​ចិត្ត​​​ត្អូញត្អែរ​ច្រើន មិន​ដែល​ពេញ​ចិត្ត​នូវ​អ្វី​ដែល​គេ​កំពុង​ធ្វើ​​​នោះ​ទេ ហើយ​បើ​ធ្វើ​អ្វី​មួយ​ដោយ​ការ​មិន​ពេញ​ចិត្ត ​កិច្ចការ​​ទាំង​ឡាយ​ក៏​មិន​​បាន​សម្រេច​​ទៅ​ដោយ​រលូន​ដែរ មាន​តែ​នាំ​ការ​ស្មុគស្មាញ​ដល់​ខ្លួន​ឯង​និង​មនុស្ស​ដែល​នៅ​ជិត។

គិត​អវិជ្ជមាន

​​មិន​​ត្រូវ​មាន​គំនិត​អវិជ្ជមាន​ចំពោះ​ខ្លួន​ឯង​ទេ ត្រូវ​គិត​ថា​​ខ្លួន​មាន​សមត្ថភាព​​អាច​​ទៅ​រួច ព្រោះ​បើ​មិន​ទាន់​សាក​ផង ធ្វើ​​ម៉េច​ដឹង​ថា​​ខ្លួន​ធ្វើ​បាន​ឬ​មិន​បាន​នោះ។

មិន​ខ្វល់​ពី​អ្វី​ទាំង​អស់

​កើត​ជា​មនុស្ស​​ បើ​​មិន​​បាន​ខ្វាយ​ខ្វល់​ពី​អ្វី​ទាំង​​អស់​​​សូម្បី​តែ​ គោលដៅ​ឬ​ផែន​ការ​នៅ​​ក្នុង​ជីវិត​​របស់​ខ្លួន អ្នក​​ហាក់​បី​​ដូច​ជា​ខ្ជះខ្ជាយ​និង​លេង​សើច​​​ចំពោះ​ជីវិត​ខ្លួន​ឯង​​ពេក​ហើយ​​​ក្នុង​​ជាតិ​នេះ។ យ៉ាងហោច​ណាស់​ក៏​ត្រូវ​ដឹង​ថា​ផ្លូវ​ណា​ដែល​ត្រូវ​ដើរ អ្វី​​​ដែល​​ខ្លួន​ចង់​ធ្វើ​​​ពិត​ប្រាកដ​ដែរ។

​​គេចវេះ​ពី​ទំនួល​ខុស​ត្រូវ

បើ​​​អ្នក​ធ្វើ​ខុស ត្រូវ​ហ៊ាន​ទទួល​ស្គាល់​និង​កែប្រែ​​​កំហុស ​​ព្រោះ​វា​​ជា​​​​ការ​គោរព​​ចំពោះ​ខ្លួន​ឯង​និង​អ្នក​​ដទៃ។ ម្យ៉ាង​វិញ​ទៀត​​​ ហ៊ាន​និយាយ​ហ៊ាន​ធ្វើ កុំ​បាន​តែ​សម្តី​គ្មាន​ទំនួល​ខុស​ត្រូវ។

​ខិត​ខំ​ប្រឹង​ប្រែង​ធ្វើ​ការ​ដើម្បី​​​តែ​សម្ភារ​និយម

អ្នក​ចិត្ត​វិទ្យា​បាន​អះអាង​ថា ​សម្ភារ​និយម​​មិន​មែន​ជា​​​សុភមង្គល​ពិត​របស់​មនុស្ស​ទេ។ ពេល​ខ្លះ​អ្នក​​ដែល​មិន​សូវ​​សប្បាយ​ចិត្ត ខិត​ខំ​​​​ចំណាយ​លុយ​ជា​ច្រើន​​ទៅ​លើ​​​សម្ភារ​ផ្សេងៗ ​ដើម្បី​ធ្វើ​ឲ្យ​ខ្លួន​ឯង​​ប្រសើរ​ឡើង​វិញ ទាំង​ដែល​​ភ្លេច​​​គិត​ថា​​​​វា​ជា​ទម្លាប់​មួយ​​ដ៏​អាក្រក់​បំផុត ហើយ​លុយ​​​ក៏​ពិបាក​រក​បំផុត​ដែរ ដូច្នេះ​មិន​គួរ​​​​ខ្ជះខ្ជាយ​​ទៅ​លើ​សម្ភារ​​និយម​អស់​ទាំង​នោះ​ពេក​ទេ។​​​

ចុចអានបន្ត៖

ប្រភព៖ bestie ប្រែ​សម្រួល៖ ដេត ឈុនអ៉ី

អត្ថបទពេញនិយម