ធ្វើបុណ្យរាប់បាត្រ ផ្សងជៀសឲ្យឆ្ងាយពីមនុស្ស ៨ ប្រភេទនេះក្នុងជីវិត

2018-06-17 09:00:00
ចំនួនមតិ 0 | ចំនួនចែករំលែក 0

រាល់ថ្ងៃមនុស្សម្នាក់ៗតែងប្រយ័ត្នខ្លួនជាមួយអ្នកជុំវិញ ព្រោះពិបាកនឹងទុកចិត្តណាស់។ ដូចនេះហើយបានជាអ្នកត្រូវជៀសឲ្យបាននូវជំពូកមនុស្ស ៨ ប្រភេទដូចខាងក្រោម ព្រោះអ្នកទាំងនោះ នឹងនាំជីវិតអ្នកជួបតែការលំបាកប៉ុណ្ណោះ៖

១.គ្មានអ្វីដើរតែនិយាយដើមគេ

ចូរប្រយ័ត្នចំពោះប្រភេទមនុស្សបែបនេះ ព្រោះគេមានចេតនាបំផ្លាញអ្នកដទៃ តាមរយៈពាក្យសម្ដីមិនពិតនេះឯង ហើយថ្ងៃណាមួយបើខឹងនឹងអ្នក គេក៏និយាយដើមអ្នកទៅប្រាប់មនុស្សផ្សេងដែរ។ មនុស្សដែលចង់ដឹងពីរឿងរ៉ាវជីវិតរបស់អ្នក និងជីវិតអ្នកដទៃ គឺមិនអាចយកជាគ្នាបានឡើយ។

២.ចូលចិត្តវិនិច្ឆ័យអ្នកដទៃ

មនុស្សដែលវិនិច្ឆ័យ អ្នកដទៃ គឺដើម្បីតែរិះគន់ និងចង់បង្ហាញថាខ្លួនល្អជាងប៉ុណ្ណោះ។ មនុស្សបែបនេះចូលចិត្តសន្និដ្ឋាន ទាំងមិនដឹងពីការពិត ឬស្ដាប់សម្ដីភាគីតែម្ខាងទៀត។

៣.មនុស្សពូកែច្រណែន

ពេលឃើញអ្នកជោគជ័យ គេពិតជានៅមិនសុខឡើយ មិនត្រឹមតែមិនអបអរចំពោះសមិទ្ធផលអ្នកប៉ុណ្ណោះទេ ថែមទាំងដើរនិយាយថា ជោគជ័យនោះបានដោយសារមានអ្នកដទៃជួយ ឬមកពីការងារស្រួលៗ។

៤.មនុស្សចូលចិត្តតែបញ្ជា តែមិនអាចធ្វើអ្វីបាន

សេពគប់មនុស្សប្រភេទនេះ ជីវិតអ្នកនឹងជួបតែរឿងអំពល់ទុក្ខមិនចេះចប់។ គេបានត្រឹមតែហាមាត់ប្រាប់ឲ្យធ្វើនេះធ្វើនោះ តែមិនមានសមត្ថភាពមកធ្វើវាដោយខ្លួនឯងឡើយ។

៥.មនុស្សមានអំនួត

គេមិនមែនជាមនុស្សជឿជាក់លើសមត្ថភាពខ្លួនឯងឡើយ តែគេមានអំនួតទៅវិញទេ។ គេតែងតែនិយាយថា ការងារណាក៏មានភាពងាយស្រួលដែរ ហើយអាចធ្វើបានទាំងអស់ មិនដូចអ្នកដទៃឡើយ។ នេះហើយជាមនុស្សអួតអាង។

៦.ផ្អែមមុខរលួយក្រោយ

នៅនឹងមុខអ្នកពោលពាក្យផ្អែមល្ហែមណាស់ ប៉ុន្តែពីក្រោយខ្នងវិញ សម្ដីសែនគ្រោតគ្រាត។ មនុស្សល្អតែមុខបែបនេះ មិនអាចសេពគប់បានឡើយ ព្រោះចុងក្រោយគេអាចនឹងក្បត់អ្នក។

៧.មនុស្សពូកែញុះញង់

បើដឹងថាអ្នកមិនត្រូវគ្នាជាមួយនរណាវិញ គេតែងតែប្រើពាក្យសម្ដីញុះញង់ឲ្យអ្នកទាំងពីរស្អប់គ្នាលើសឡើយ ទាំងដែលភាគីម្ខាងទៀតមិនដឹងរឿងសោះ។ ស្គាល់គ្នាជាមួយមនុស្សបែបនេះ ជីវិតនឹងគ្មានភាពស្ងប់ស្ងាត់ឡើយ ហើយតែងមានបញ្ហាមិនចេះចប់។

៨.ល្បិចច្រើន

មនុស្សប្រភេទនេះ ច្រើនតែមានចរិតវាងវៃ ប៉ុន្តែប្រកបដោយភាពពិសពុល។ ប្រសិនបើគេស្អប់អ្នកណា គេតែងតែប្រើស្នៀតខ្ចីកាំបិតសម្លាប់មនុស្ស ហើយចុងក្រោយគេធ្វើមនុស្សល្អជួយសង្គ្រោះទៅវិញ៕

ចុចអាន៖ផ្លាស់ប្ដូរខ្លួនឯងនូវរឿងតូចៗទាំងប៉ុន្មាននេះ ធ្វើឲ្យអ្នកក្លាយជានារីមានឥទ្ធិពល

ប្រភព៖ Entrepreneur ប្រែសម្រួល៖ ទ្រី រ៉ាវី