មិនចង់អង្គុយកើតទុក្ខ! ប្ដីប្រពន្ធមិនគួរខ្ចីលុយគេមកទិញរបស់ ៤ យ៉ាងនេះឡើយ

2018-06-16 00:41:00
ចំនួនមតិ 0 | ចំនួនចែករំលែក 0

ដើម្បីកុំឱ្យជំពាក់បំណុលគេនាំពិបាក ប្ដីប្រពន្ធថ្មីថ្មោងឬគូស្នេហ៍គួរតែដឹងពីវិធីប្រើប្រាស់លុយឱ្យបានត្រឹមត្រូវ។ ការខ្ចីលុយគេមកប្រើក្នុងកាលៈទេសៈបន្ទាន់ ឬចាំបាច់បំផុតណាមួយអាចជារឿងដែលមិនអាចចៀសវាងបាន ប៉ុន្តែចំពោះរបស់ខ្លះ បើមិនចាំបាច់ ឬបន្ទាន់ខ្លាំងទេ មិនគួរសុខចិត្តទៅបុលគេមកប្រើឡើយ ព្រោះវាអាចនាំឱ្យអ្នកត្រូវបែងចែកប្រាក់ចំណាយច្រើនផ្នែក ហើយបើពេលត្រូវទិញរបស់ចាំបាច់ទៀត នោះអ្នកនឹងរឹតតែពិបាក។

១. ទិញឡាន

មានឡានជិះគឺជារឿងដែលអាចនាំឱ្យសប្បាយរីករាយ និងស្រួលដល់គ្រួសារ ជាពិសេសសម្រាប់ពេលមានកូនតូច។ ប៉ុន្តែបើអ្នកត្រូវខ្ចីលុយគេ ឬខ្ចីបុលពីធនាគារមកទិញ វាអាចនឹងធ្វើឱ្យចិត្តមិនសូវបានស្រលះ ឬសប្បាយជាមួយឡានមួយនេះឡើយ។ ណាត្រូវចំណាយលើថ្លៃសាំង ណាថ្លៃបង់សងគេដោយមានការប្រាក់ផង ណាប្រាក់សម្រាប់ពេលជួសជុលផង។

យ៉ាងណាក៏ដោយ បើអ្នកចាំបាច់ត្រូវតែទិញឡាន ព្រោះមានកូនតូច ឬត្រូវទៅឆ្ងាយញឹកញាប់ អ្នកគួរតែពិចារណាខ្ចីពីឪពុកម្ដាយ ឬសាច់ញាតិដែលអាចមិនគិតការប្រាក់ច្រើនដូចអ្នកដទៃ ឬធនាគារ។ សម្រាប់តម្លៃ បើជ្រុលជាខ្ចីលុយគេទិញ ក៏គួរពិចារណាលើតម្លៃសមរម្យដែលខ្លួនអាចមានលទ្ធភាពបង់ប្រចាំខែដែរ និងអាចបង្ការខ្លះសម្រាប់ពេលចាំបាច់ណាមួយផង។

២. រៀបការឱ្យបានធំដុំនឹងគេ

ពិតណាស់ថា រៀបការមួយជីវិតម្ដងគួរតែធ្វើឱ្យបានធំដុំ អធិកអធម មានភ្ញៀវចូលរួមច្រើនកុះករ និងសរសើរ ប៉ុន្តែអ្នកក៏ត្រូវមើលលើសមត្ថភាពនិងលទ្ធភាពរបស់ខ្លួនផង។ បើមានប្រាក់ច្រើនសម្រាប់ចំណាយតែម្ដង វាមិនជាបញ្ហាទេ ប៉ុន្តែបើប្រាក់មានកំណត់ ហើយចង់ធ្វើឱ្យធំដុំដូចគេ ដោយត្រូវរត់ទៅខ្ចីបុលគេមកធ្វើ នោះពេលចប់ពិធី អ្នកអាចនឹងញញឹមលែងសម លែងមានក្ដីសុខក៏ថាបាន។ រៀបការហើយត្រូវរកលុយសងគេ ធ្វើម៉េចអាចមានក្ដីសុខទៅនោះ?

៣. ទិញចិញ្ចៀនភ្ជាប់ពាក្យ/រៀបការ

មិនខុសពីចំណុចទី២ខាងលើទេ អ្នកណាមិនចង់ល្អ មិនចង់ស្អាតក្នុងថ្ងៃពិសេសរបស់ខ្លួននោះ។ ប៉ុន្តែឃើញដំរីជុះ មិនត្រូវប្រឹងជុះតាមដំរីទេ ត្រូវមើលពីលទ្ធភាពខ្លួនជាមុនសិន។ អ្នកខ្លះសុខចិត្តខ្ចីលុយគេទិញចិញ្ចៀនភ្ជាប់ពាក្យដល់មនុស្សដែលខ្លួនស្រលាញ់ តែពេលរៀបការហើយត្រូវមានបញ្ហាជាមួយគ្នាដោយសារតែការរកលុយសងគេនេះឯង។

ចុចអាន៖ មើលត្រៀម! សំណួររសើបៗដែលកូនកំលោះកូនក្រមុំគេចមិនសូវផុតក្នុងថ្ងៃរៀបការ

៤. ទៅវិស្សមកាល

វិស្សមកាល ជាពិសេសនៅរដូវក្ដៅ គ្រប់គ្នាត្រូវចំណាយប្រាក់និងពេលវេលាដើរកម្សាន្តឱ្យបានសប្បាយរីករាយ។ ដូច្នេះបើអ្នកចង់ទៅដើរលេងនឹងគេ តែខ្លួនគ្មានលុយ ហើយសុខចិត្តខ្ចីលុយនោះ អ្នកអាចនឹងសប្បាយនៅពេលកំពុងស្ថិតក្នុងដំណើរកម្សាន្តនេះ ប៉ុន្តែពេលត្រលប់មកវិញ អាចនឹងអស់អារម្មណ៍ ព្រោះត្រូវធ្វើការរកលុយសងគេវិញ៕

ប្រភព៖ Businessinsider ប្រែសម្រួល៖ សរ សុគន្ធី