អាយុជាង២០ បើនៅបន្តធ្វើរឿងទាំងនេះ ១០ឆ្នាំទៀត អ្នកអាចនឹងដេកស្ដាយក្រោយ

2018-06-16 05:38:00
ចំនួនមតិ 0 | ចំនួនចែករំលែក 0

ជីវិតមនុស្សតើអាចមាន១០ឆ្នាំប៉ុន្មានដង? ដូច្នេះយើងគួរតែធ្វើអ្វីដែលមានខ្លឹមសារ និងមានប្រយោជន៍សម្រាប់ខ្លួនឯង មុនឈានដល់វេលាបាត់បង់ឱកាស។ ខាងក្រោមនេះគឺជារឿងដែលមិនគួរបន្តធ្វើសម្រាប់អ្នកនៅជាយុវវ័យ បើមិនចង់ឱ្យស្ដាយក្រោយ ពិបាកកែកុននៅ១០ឆ្នាំបន្ទាប់ទៀត។

១. មិនសូវចំណាយពេលជាមួយមនុស្សជាទីស្រលាញ់ឱ្យបានច្រើន

ពាក្យថាមនុស្សជាទីស្រលាញ់មិនមែនសំដៅតែលើសង្សារ ឬប្ដីប្រពន្ធនោះទេ។ តែវាសំដៅលើមនុស្សដែលផ្ដល់ក្ដីស្រលាញ់ទៅឱ្យអ្នកដូចជា ប៉ាម៉ាក់ បងប្អូន សាច់ញាតិ និងមិត្តភ័ក្ដិ ឬអ្នករួមការងារដែលយើងគិតថាគេជាចំណែកមួយក្នុងជីវិតនេះ។ ប៉ុន្តែពេលខ្លះ យើងបែរជាភ្លេចផ្ដល់ពេលវេលាសម្រាប់ពួកគេ ដោយសារតែលេសរវល់ការងារ ឬបញ្ហាផ្ទាល់ខ្លួនជាដើម។

ហេតុនេះហើយ ទាន់នៅមានពេលវេលា គួរតែឆ្លៀតពេលនៅក្បែរអ្នកទាំងនោះដើម្បីបង្កើតអនុស្សាវរីយ៍ និងអ្វីដែលល្អៗនិងគ្នាឱ្យបានកាន់តែច្រើន ព្រោះជីវិតមនុស្សមើលមិនឃើញទេ លេងជាមួយគ្នាថ្ងៃនេះ ថ្ងៃស្អែកអាចទៅចោលយើងក៏ថាបាន។

២. ពាក់របាំងមុខខ្លួនឯងដើម្បីផ្គាប់ចិត្តអ្នកដទៃ

ធ្លាប់ទេ? ពេលខ្លះយើងត្រូវលាក់ទុកអារម្មណ៍ខ្លួនឯង ហើយប្រើអារម្មណ៍ក្លែងក្លាយដើម្បីទៅប្រាស្រ័យទាក់ទងជាមួយអ្នកដទៃ ដើម្បីចង់បានអ្វីមួយត្រលប់មកវិញ។ ប៉ុន្តែការធ្វើបែបនេះជាញឹកញាប់ វាអាចនឹងបណ្ដាលឱ្យទៅជាការបាក់ទឹកចិត្ត ឬបាត់បង់អារម្មណ៍ពិតសម្រាប់ខ្លួនឯង លែងមានគោលដៅសម្រាប់ខ្លួនឯង។ អ្នកត្រូវចំណាយពេលវេលាជាច្រើនគិតបារម្ភពីអ្វីដែលអ្នកដទៃមើលមកអ្នក អ្នកខ្លាចថាគេវាយតម្លៃអ្នកក្នុងផ្លូវបែបនេះបែបនោះជាដើម។

ដូច្នេះគួរប្រាប់ខ្លួនឯងថា គ្មានអ្នកណាកើតមកគ្មានកំហុស ល្អឥតខ្ចោះនោះទេ ហើយក៏យើងកើតមកមិនមែនដើម្បីផ្គាប់ផ្គុនអ្នកណាម្នាក់ដែរ។ ចង់គេគិតអ្វីក៏គិតទៅ សំខាន់យើងអាចធ្វើឱ្យខ្លួនឯងសប្បាយចិត្តដោយមានសេរីភាព ហើយមិនប៉ះពាល់សិទ្ធិរបស់អ្នកណាម្នាក់គឺគ្រប់គ្រាន់ទៅហើយ។

៣. មិនគិតពីបញ្ហាសុខភាពទាន់ខ្លួននៅក្មេង

ពេលឈឺ ទើបដឹងថាសុខភាពសំខាន់យ៉ាងណា។ ប៉ុន្តែពេលនៅជា មនុស្សភាគច្រើនមិនសូវបានចាប់អារម្មណ៍លើការផ្ដល់រង្វាន់ ឬផ្ដល់របស់មានតម្លៃដល់ខ្លួនឯងឡើយ។ របស់មានតម្លៃទាំងនោះ គឺសំដៅលើអាហារដែលមានសុវត្ថិភាព ការលំហែឱ្យអារម្មណ៍ស្រស់ថ្លា ខួរក្បាលមិនស្មុគស្មាញជាដើម។ បើអ្នកមិនធ្លាប់បានគិតពីរឿងបែបនេះឱ្យបានខ្លាំងក្លាពីមុនមកទេ ពេលនេះគួរចាប់ផ្ដើមគិតវាឱ្យហើយ ព្រោះបើពេលចាស់ទៅហើយឈឺ គឺមិនងាយព្យាបាលដូចពេលនៅក្មេងមានកម្លាំងឡើយ។

៤. ឱ្យអ្នកដទៃមកកំណត់បំណងប្រាថ្នារបស់ខ្លួន

រឿងដ៏លំបាកទីមួយក្នុងជីវិតមនុស្សគឺការដឹងថាខ្លួនឯងជានរណា ហើយរឿងលំបាកទី២គឺការធ្វើឱ្យខ្លួនឯងពេញចិត្តនឹងអ្វីដែលខ្លួនកំពុងមាន។ ដូច្នេះដើម្បីដឹងថាខ្លួនជានរណា ហើយអាចពេញចិត្តនឹងរបស់ខ្លួនឯង គឺកំណត់គោលដៅច្បាស់លាស់សិន សួរខ្លួនឯងឱ្យបានច្បាស់សិន កុំឃើញគេធ្វើបានជោគជ័យ ឬមានគេធ្វើច្រើន យើងក៏ចង់ធ្វើតាមគេ ទាំងដែលការពិតវាមិនមែនជាបំណងប្រាថ្នាពិតប្រាកដ ហើយគ្មានទេពកោសល្យលើរឿងទាំងអស់នោះសោះ។

៥. រៀបការឆាប់ពេក

ពេលនៅខ្លួនមួយ អ្នកអាចមានសេរីភាពពេញលេញដើម្បីសម្រេចក្ដីស្រមៃដែលខ្លួនមាន និងធ្វើអ្វីដែលខ្លួនពេញចិត្ត។ ប៉ុន្តែនៅពេលអ្នកក្លាយជាអ្នកដឹកនាំគ្រួសារ អ្នកត្រូវចងភ្ជាប់ដោយចំណងច្រើនប្រការណាស់ ព្រោះបន្ទុកគ្រួសារមិនមែនជារឿងលេងសើចឡើយ។ ដូច្នេះទាន់នៅមានឱកាស មានសមត្ថភាព អ្នកគួរប្រើជីវិតនៅលីវនេះឱ្យបានសប្បាយសិន ហើយធ្វើអ្វីដែលខ្លួនចង់បានសិន មុននឹងសម្រេចចិត្តរៀបការទាំងនៅក្មេង។

៦. មិនហ៊ានដើរចេញពីស្នេហាដែលគ្មានក្ដីសុខ

មានមនុស្សច្រើននាក់ដែលព្យាយាមកុហកខ្លួនឯងឱ្យជាប់ឃុំក្នុងស្នេហាដែលគ្មានអនាគត ស្នេហាដែលមានតែការក្បត់ចិត្តម្ដងហើយម្ដងទៀត ស្នេហាដែលមិនដែលផ្ដល់ក្ដីសុខដល់ខ្លួនអ្នកសូម្បីតែបន្តិច ស្នេហាដែលចេះតែធ្វើឱ្យអ្នកយំ ឬខូចចិត្តឥតឈប់ឈរ។ ប៉ុន្តែនេះវាគ្រាន់តែជាការបោកប្រាស់ខ្លួនឯង ឬភ័យខ្លាចភាពឯកោប៉ុណ្ណោះ។

អ្វីដែលជាបញ្ហាពិតប្រាកដគឺ កុំភ្លេចថា បើបន្តរស់នៅក្នុងទំនាក់ទំនងស្នេហាបែបនេះ អ្នកអាចនឹងឈឺចាប់អស់មួយជីវិត ហើយនៅតែស្ថិតក្នុងការបោកប្រាស់បែបនេះមិនអាចចេញផុតឡើយ។ ផ្ទុយទៅវិញ បើអ្នកក្លាហានដើរចេញពីវា អ្នកអាចនឹងឈឺចាប់ក្នុងរយៈពេលមួយ តែមិនមែនអស់មួយជីវិតឡើយ។ ពេលវេលានឹងធ្វើជាអ្នកព្យាបាលរបួសបេះដូងមួយនេះយ៉ាងមានប្រសិទ្ធភាព។

៧. មិនហ៊ានប្រាប់គេតាមត្រង់ថា "យើងស្រលាញ់គេ”

ភាគច្រើននារីដែលនៅវ័យក្មេងចេះតែអៀន ឬខ្លាចថាបើសារភាពប្រាប់ភាគីខាងប្រុសមុនគឺជារឿងមិនល្អ ឬគេគិតថាចិត្តងាយ។ ប៉ុន្តែពេលអាយុច្រើនទៅ អ្នកនឹងដឹងថា បើកាលនោះបានសារភាពអារម្មណ៍ពិតប្រាប់គេ ប្រហែលពេលនេះអាចមានក្ដីសុខជាមួយគ្នា មិនមែនមកអង្គុយស្ដាយក្រោយ ឃើញគេត្រូវបានទៅអ្នកផ្សេងឡើយ។

៨. មិនបន្តការរៀន

មិនមែនបានន័យថា មានសញ្ញាប័ត្រមួយកាន់នៅនឹងដៃគឺគ្រប់គ្រាន់នោះទេ។ ជីវិតមនុស្សយើងត្រូវការរៀនសូត្រច្រើនជាងអ្វីដែលយើងបានរៀននៅសាលា។ ការរៀនពីអ្វីថ្មីនៅកន្លែងធ្វើការ ពីអ្នកនៅជុំវិញខ្លួន ការស្វែងរកឱកាសដែលមាន និងស្រាវជ្រាវអ្វីថ្មីនឹងបង្កើតឱ្យអ្នកនូវទំនុកចិត្ត និងក្លាយជាមនុស្សថ្មី ដើរទាន់សម័យ។ ផ្ទុយទៅវិញ បើអ្នកចេះតែបង្ខាំងខ្លួនឯង មិនឱ្យប្រឡូកក្នុងស្ថានភាពថ្មីៗដែលកំពុងកើតមាន ថ្ងៃក្រោយអ្នកនឹងស្ដាយក្រោយជាមិនខាន។

៩. មិនដើរកម្សាន្តខ្លះ

អ្នកណាក៏ចូលចិត្តដើរកម្សាន្តដែរ ប៉ុន្តែមនុស្សភាគច្រើនបែរជារង់ចាំ និងប្រាប់ខ្លួនឯងថា ចាំមានលុយច្រើនសិន សឹមដើរលេង។ ការគិតបែបនេះ អាចថាមិនខុស តែក៏មិនត្រូវ១០០%ដែរ។ ការដែលចាំថា មានលុយច្រើន គឺជាពាក្យដែលពិបាកវាស់បំផុតសម្រាប់តណ្ហារបស់មនុស្ស។ គ្មានទេ ពាក្យថាគ្រប់សម្រាប់មនុស្ស។

ដូច្នេះបើអ្នកធ្វើការហត់នឿយ អ្នកប្រឹងដើម្បីបានលុយ ហេតុអីក៏មិនចំណាយខ្លះដើម្បីឱ្យខ្លួនឯងបានលំហែ និងសប្បាយចិត្ត? មិនមែនត្រូវប្រើខួរក្បាល និងកម្លាំងគិតតែរឿងរកលុយមួយមុខនោះទេ ព្រោះពេលចាស់ទៅ អ្នកនឹងគ្មានកម្លាំងដើរលេងបានឆ្ងាយដូចពេលនេះឡើយ៕

ប្រភព៖ tapoos ប្រែសម្រួល៖ សរ សុគន្ធី