ជីវិតនឹងលែងអាប់អួ បើអ្នកអាចជៀសផុតពីមនុស្ស ១០ ប្រភេទនេះបាន

2018-06-08 02:00:00
ចំនួនមតិ 0 | ចំនួនចែករំលែក 0

រាល់ថ្ងៃ អ្នកបានជួបមនុស្សប្លែកមុខជាច្រើន ហើយមនុស្សប្លែកមុខនោះ អាចនឹងក្លាយទៅជាមិត្តរបស់អ្នកនៅថ្ងៃណាមួយ ព្រោះភាពចៃដន្យអាចកើតឡើងគ្រប់ពេល ដោយគ្មានការគ្រោងទុក។ ប៉ុន្តែបើអាចអ្នកគួរនិយាយលេងធម្មតាៗសិនបានហើយកុំទាន់អាលប្រញាប់ធ្វើជាស្និទ្ធស្នាល រាប់អានជាមិត្តលឿនពេក ព្រោះខ្លាចប៉ះចំមនុស្ស ដែលធ្វើឲ្យជីវិតអាប់អួគ្មានរស្មី។

១. មនុស្សចូលចិត្តបញ្ជា

មនុស្សបែបនេះ បើមើលពីសំបកក្រៅ ចេះនិយាយលេងសើចច្រើន ចេះយកចិត្តគេឯង ប៉ុន្តែក្នុងចិត្តលាក់កំនួច ពេលធ្វើអ្វីមួយចង់យកឈ្នះចាញ់ ខ្លាចតែអ្នកផ្សេងបានលើសខ្លួន ព្រោះបើអន់ជាងគេ ខ្លាចពេលនិយាយអីទៅ គ្មានឥទ្ធិពល គេលេងស្តាប់ បញ្ជាលែងបានទៀត។

២. មនុស្សចូលចិត្តរិះគន់

បើរិះគន់កែលម្អឲ្យប្រសើរឡើងគ្មានបញ្ហានោះទេ យ៉ាប់តែអ្នកខ្លះមកដល់បង្អាប់ ឲ្យបាក់ទឹកចិត្តខ្ទេចខ្ទីអស់តែម្តង។ ពេលខ្លះធ្វើត្រូវហើយ ក៏នៅតែទើសខុសរឿង។

៣. មនុស្សចូលចិត្តនិយាយដើម

ជាតិជាមនុស្ស គ្មាននរណាម្នាក់ដែលថាមិនធ្លាប់និយាយដើមគេនោះទេ ប៉ុន្តែបើនិយាយដើមពីអ្នកដទៃលើសលប់នៅចំពោះមុខអ្នក នោះថ្ងៃណាមួយមាត់របស់គេច្បាស់ជារអិល និយាយដើមអ្នកអីចឹងដូចគ្នា។

៤. មនុស្សអាត្មានិយម

គេយល់តែអារម្មណ៍ និងព្យាយាមបំពេញតម្រូវការផ្ទាល់ខ្លួន ដោយមិនខ្វាយពីអ្នកដទៃបន្តិចសោះឡើយ ចង់អ្នកណាកើតអីក៏កើតទៅ។

៥. មនុស្សពូកែច្រណែន

មនុស្សបែបនេះ គ្មានមកចូលរួមត្រេកអរ ពេលឃើញអ្នកជោគជ័យនោះទេ មានតែដេកក្រហាយទ្រូង ច្រណែនឈ្នានីសនឹងអ្នកទៅវិញ។

៦. មនុស្សចូលចិត្តតែពឹងពាក់គេ

រស់នៅក្នុងសង្គមមួយ ការពឹងពាក់ជួយយកអសារគ្នាទៅវិញទៅមក គឺជាអ្វីដែលយើងគួរធ្វើ តែអ្នកខ្លះឆ្លៀតឱកាសយកទឹកចិត្តដ៏ល្អរបស់អ្នកដទៃមកប្រើប្រាស់ជាប្រយោជន៍ ហើយសុំពឹងឲ្យគេជួយសូម្បីតែរឿងតូចតាច ដែលអាចធ្វើខ្លួនឯងបាន។

៧. មនុស្សឆេវឆាវ

មនុស្សបែបនេះមិនចេះគ្រប់គ្រងអារម្មណ៍ខ្លួនឯងទាល់តែសោះ ពេលមានបញ្ហាអីមួយ គេនឹងច្រឡោតគំហកដាក់អ្នក ដោយគ្មានហេតុផល ថែមទាំងទម្លាក់កំហុសឲ្យអ្នកទៀតផង។

៨. មនុស្សអវិជ្ជមាន

មនុស្សប្រភេទនេះ ទោះបីជាអ្នកឈរនៅទីកន្លែងភ្លឺស្រលះយ៉ាងណាក៏ដោយ បើគេដើរចូលមកភ្លាមអ្វីៗនឹងងងឹតអាប់អួ ព្រោះតែពួកគេតែងមានគំនិតសោះកក្រោះ មិនជ្រះថ្លា។

៩. មនុស្សពូកែកុហក

គ្មាននរណាជៀសផុតពីការនិយាយកុហកបានឡើយ ប៉ុន្តែពេលខ្លះយើងនិយាយកុហក ក្នុងបំណងដើម្បីកែប្រែស្ថានភាពឲ្យល្អប្រសើរឡើង មិនមែននិយាយកុហករហូតដល់ទុកចិត្តគ្នាលែងបាននោះទេ។

១០. មនុស្សគ្មានទំនួលខុសត្រូវ

មនុស្សបែបនេះបានតែសម្តី បើធ្វើវិញមិនសូវជាពូកែប៉ុន្មានទេ ព្រោះចូលចិត្តនិយាយអីឲ្យតែរួចពីមាត់ ហើយក៏មិនអាចពឹងពាក់ ឬទុកចិត្តអីបានឡើយ ដូច្នេះគួរតែជៀសឲ្យឆ្ងាយ៕

ចុចអានបន្ត៖