សញ្ញាច្បាស់ៗបញ្ជាក់ថាអ្នក និងគេមិនអាចកាន់ដៃគ្នាដើរទៅមុខទៀតបាន
- 2018-06-07 10:00:00
- ចំនួនមតិ 0 | ចំនួនចែករំលែក 0
សញ្ញាច្បាស់ៗបញ្ជាក់ថាអ្នក និងគេមិនអាចកាន់ដៃគ្នាដើរទៅមុខទៀតបាន
ទំនាក់ទំនងមួយអាចទៅមុខ ឬអាចបញ្ចប់នោះយើងក៏អាចមើលតាមសញ្ញាដែលម្នាក់ៗសម្ដែងចេញមកដែរ។ បើសញ្ញាល្អៗចេះតែមាននោះក្ដីសង្ឃឹមក៏កើនឡើងដែរ ប៉ុន្តែបើពេលនេះអ្នកទាំងពីកំពុងមានសញ្ញាច្បាស់ៗដូចខាងក្រោមនេះ នោះបញ្ជាក់ថាអ្នកប្រហែលមិនអាចកាន់ដៃគ្នាទៅមុខទៀតឡើយ ៖
១. អ្នកមានអារម្មណ៍ថាអ្នក និងគេចាប់ផ្ដើមមានគម្លាត
រវាងអ្នក និងគេចាប់ផ្ដើមលែងស្និទ្ធស្នាលដូចមុន ហើយមានអារម្មណ៍ថាទោះនៅក្បែរគ្នាក៏គ្មានអារម្មណ៍ពិសេសអីទាំងអស់។ គ្រប់យ៉ាងចាប់ផ្ដើមស្ងប់ស្ងាត់ខ្លាំង រហូតពេលខ្លះជួបមុខគ្នាក៏មិនដឹងត្រូវនិយាយអីជាមួយគ្នា។
២. អ្នកមានអារម្មណ៍ថាហត់នឿយ ហើយលែងចង់ព្យាយាមទៀត
ការតាំងចិត្តដែលធ្លាប់តែមានពីមុនមកក៏ចាប់ផ្ដើមរលាយបន្តិចម្ដងៗ រហូតពេលខ្លះមានអារម្មណ៍ថាហត់នឿយខ្លាំង ហើយមិនចង់ធ្វើអីទាំងអស់ក្រៅពីនៅម្ខាងម្នាក់។ អ្នក និងគេបាត់បង់អារម្មណ៍ពុះពារជាមួយគ្នា បាត់បង់ទឹកចិត្តដែលចង់ព្យាយាមកាន់ដៃគ្នាមិនលែង ជំនួសមកវិញនូវភាពហត់នឿយ ភាពស្ងប់ស្ងាត់ ហើយលែងចង់ខ្វល់ខ្វាយអីទាំងអស់ ក្រៅពីចង់សម្ងំនៅម្នាក់ឯង។
៣. គម្រោងទៅអនាគតដែលធ្លាប់គិតក៏ចាប់ផ្ដើមផ្លាស់ប្ដូរ
ពីមុនធ្លាប់គិតថារៀនចប់ មានការងារ សន្សំលុយឲ្យបានច្រើនរួចនឹងរៀបការជាមួយគ្នា តែមកដល់ពេលនេះគំនិតទាំងអស់នោះក៏ចាប់ផ្ដើមប្រែប្រួលទៅវិញ។ អ្នកចាប់ផ្ដើមមានអារម្មណ៍ថាគ្រប់យ៉ាងមិនមែនងាយស្រួលដូចអ្នកគិតឡើយ កុំថាឡើយរៀបការជាមួយគ្នា សូម្បីតែការកាន់ដៃគ្នារាល់ថ្ងៃពិបាកទៅហើយ។
៤. អ្នកលែងមានអារម្មណ៍ច្បាស់លាស់ជាមួយគ្នា
អ្នកចាប់ផ្ដើមមានអារម្មណ៍ថាគេលែងច្បាស់លាស់ជាមួយអ្នក ហើយអ្នកក៏លែងច្បាស់លាស់ជាមួយគេ។ រឿងជាច្រើនបានរត់ពេញខួរក្បាលអ្នក នៅពេលដែលគេមិនដែលបង្ហាញភាពច្បាស់លាស់មួយមកឲ្យអ្នក។ អ្នកគិតថាគេ និងអ្នកគ្រាន់តែទាក់ទងគ្នាបែបធម្មតាតែប៉ុណ្ណោះ ដោយគ្មានសកម្មភាពណាបញ្ជាក់ថាគេពិតប្រាកដជាមួយអ្នកឡើយ។
៥. អ្នក និងគេលែងបង្ហាញពីអារម្មណ៍ផ្ទាល់ខ្លួនទៀត
អ្នកលែងគិតថាគេជាមនុស្សដែលអ្នកអាចចែករំលែករឿងគ្រប់យ៉ាងដូចពីមុនទៀតហើយ។ អ្នកទាំងពីចាប់ផ្ដើមមានអារម្មណ៍ទើសទាល់គ្នា ហើយលែងចង់ប្រាប់គ្នាពីរឿងក្នុងចិត្តទៀតហើយ។
មិនថារយៈពេលដែលអ្នកស្រឡាញ់គ្នាយូរប៉ុណ្ណានោះទេ ឲ្យតែមានសញ្ញាចំៗបែបនេះកើតឡើង នោះអ្នកទាំងពីរនឹងមិនអាចកាន់ដៃគ្នាជាប់ទៀតឡើយ៕
ចុចអាន៖មិនចង់គ្រាំចិត្ត ដេកយំដោយសារគេ គួរដកខ្លួនចេញពីមនុស្សប្រុសបែបនេះទៅ