មិនមាត់ៗ តែបើសង្សារចេញឫកពាទាំង ៥ នេះហើយ មានន័យថាកំពុងប្រច័ណ្ឌខ្លាំង

2018-05-31 03:00:00
ចំនួនមតិ 0 | ចំនួនចែករំលែក 0

បើឃើញគូស្នេហ៍ខ្លួនស្និទ្ធស្នាលជាមួយអ្នកដទៃ មិត្តប្រុសពិតជាជៀសមិនផុតពីការប្រច័ណ្ឌឡើយ។ គ្រាន់តែមនុស្សប្រុសមិននិយាយស្ដីអ្វីទាំងអស់ ហើយថែមទាំង ធ្វើឫកតោះតើយដាក់អ្នកថែមទៀតផង។ ឥរិយាបថទាំង ៥ នេះ បញ្ជាក់ថា សង្សារកំពុងប្រច័ណ្ឌខ្លាំង៖

១.មិននិយាយរក

ប្រុសៗច្រើនតែបែបនេះ ខឹងអីមួយគឺមិនខ្ចីនិយាយរក ហើយបើទោះជានិយាយមែន ក៏ចុងមាត់ចុងកដែរ។ ទោះជាអ្នកខិតខំព្យាយាមធ្វើល្អយ៉ាងណា ក៏គាត់មិនយកភ្នែកមើលដែរ នោះក៏ព្រោះតែកំហឹងក្នុងចិត្តដែលឃើញប្រុសដទៃជិតស្និទ្ធនឹងអ្នក។

២.ស្អប់អ្នកនៅពេលនិយាយពីបុរសម្នាក់នោះ

គាត់អាចស្រែក ឬឆ្លើយតបកំបុតៗ ពេលអ្នកនិយាយពីគេម្នាក់នោះ ព្រោះបុរសអាចគិតថា មិត្តស្រីខ្លួនកំពុងចាប់អារម្មណ៍លើប្រុសដទៃ។ វាជាសញ្ញាច្បាស់លាស់ថា សង្សារច្រណែននឹងអ្នកខ្លាំង។ ដូចនេះត្រូវពន្យល់គាត់ឲ្យបាននឹងថាទំនាក់ទំនងអ្នក និងបុរសម្នាក់នោះត្រឹមជាមិត្តធម្មតាៗប៉ុណ្ណោះ គ្មានអ្វីលើសពីនោះទៀតឡើយ។

៣.តាមដានសកម្មភាពអ្នក

គាត់ចាប់ផ្ដើមសង្ស័យ និងមិនទុកចិត្តដោយចាប់ផ្ដើមចង់ដឹងចង់ឮពីសកម្មភាពអ្នក ពេលមិននៅក្បែរគាត់។ ដូចនេះហើយដៃគូ រកវិធីស៊ើបពីនរណាដែលនៅកន្លែងការងារអ្នក ព្រោះចង់ដឹងការពិត។

៤.មិនចង់ឲ្យអ្នកទៅណាឆ្ងាយ

បើអ្នកត្រូវមានបេសកកម្មទៅខេត្ត ឬក្រៅប្រទេស គាត់ប្រាកដជាសួរដេញដោលច្រើន ព្រោះខ្លាចបុរសម្នាក់ទៀតដែលគាត់សង្ស័យមានទំនាក់ទំនងជាមួយអ្នកនោះ រួមដំណើរទៅដែរ ហើយបើទៅមាន គាត់នឹងរកគ្រប់វិធីមិនឲ្យអ្នកទៅជាដាច់ខាត។

៥.ចេះងរង៉ក់

ពីមុនមិនចេះធ្វើឫកងរង៉ក់ឲ្យអ្នកពិបាកលួងឡើយ តែក្រោយមានបញ្ហាមិនសូវទុកចិត្ត ចាប់ផ្ដើមចេញឫកនេះមក ដើម្បីទាមទារការចាប់អារម្មណ៍ និងយកឲ្យអ្នកតាមលួង។ គាត់ធ្វើវិធីនេះឡើងមក ព្រោះចង់ឲ្យសម្ពន្ធភាពផ្អែមល្ហែមឡើងវិញ៕

ចុចអាន៖ស្រីៗបើចង់ឲ្យបុរស crush លើអ្នកគ្រប់គ្នា វិធីសាមញ្ញៗទាំងនេះអាចជួយបាន

ប្រភព៖ Likelovequotes ប្រែសម្រួល៖ ទ្រី រ៉ាវី