ឪពុក​សាវា​​​​ក្បត់​ចិត្ត​ម្តាយ​ កូន​ស្រី​នឹង​ទទួល​រង​ផល​ប៉ះពាល់​ទាំង​នេះ

  • 2018-05-25 10:06:02
  • ចំនួនមតិ 0 | ចំនួនចែករំលែក 0

មិន​ថា​នៅ​​ប្រទេស​ខ្មែរ​​​ឬ​មួយ​​បរទេស​នោះ​ទេ គឺ​តែង​មាន​មនុស្ស​ប្រុស​ពីរ​ប្រភេទ​គឺ ទី១​ មនុស្ស​ប្រុស​​ល្អ​ស្មោះស្ម័គ្រ​​​នឹង​ស្នេហា គិត​គូរ​ពី​ក្រុម​គ្រួសារ ទី២​ មនុស្ស​ប្រុស​សាវា​​ក្បត់​ចិត្ត​ប្រពន្ធ​កូន។ ពិតណាស់​​ស្រ្តី​គ្រប់​រូប​​​ខំ​ធ្វើ​បុណ្យ ប៉ង​ប្រាថ្នា​​សុំ​ឲ្យ​ជួប​​តែ​បុរស​​ប្រភេទ​ទី១។ យ៉ាង​ណា​មិញ យើង​មិន​អាច​​​​កំណត់​នូវ ភ័ព្វ​សំណាង​របស់​ខ្លួន​​បាន​ឡើយ ប៉ុន្តែ​យើង​អាច​​ចែក​រំលែក​ ទៅ​ឲ្យ​អ្នក​ដទៃ​បាន​ដឹង និង​អាច​មាន​អារម្មណ៍​​ធូរ​ស្រាល ព្រោះ​គិត​ថា​មិន​មែន​​មាន​តែ​ខ្លួន​​ទេ ដែល​ជួប​ប្រទះ​រឿង​បែប​​នេះ។ ដូច្នេះ​ហើយ​បាន​ជា​ ក្មេង​ស្រី​វ័យ​១៨​ឆ្នាំ​​ម្នាក់ ​សុំ​មិន​បញ្ចេញ​ឈ្មោះ សម្រេច​ចិត្ត​រ៉ាយរ៉ាប់​ពី​រឿង​ពិត​​​ ថា​តើ​មាន​ឪពុក​ជា​មនុស្ស​​ក្បត់​ចិត្ត​ម្តាយ មាន​ផល​ប៉ះ​ពាល់​យ៉ាង​ណា​ខ្លះ​ ចំពោះ​រូប​នាង?

១. ខ្លោច​ចិត្ត​អាណិត​ម្តាយ

ម្តាយ​និង​កូន​ប្រៀប​បាន​មាន​បេះដូងតែ​មួយ នាង​មិន​អាច​​​ទប់​អារម្មណ៍​​​បាន​ទេ ពេល​ឃើញ​ម្តាយ​ស្រក់​​ទឹក​ភ្នែក ព្រោះ​​គាត់​ធ្លាប់​តែ​រឹងមាំ ខំ​រក​ស៊ី​ទាំង​ឈឺ​ទាំង​ជា ដើម្បី​កូនៗ​តែ​បែរ​ជា​មក​ជួប​រឿង ដែល​​គិត​ថា​មិន​អាច​នឹង​កើត​ឡើង។

២. ​អស់​ជំនឿ​ចិត្ត​លើ​ប្រុសៗ

នាង​ដឹង​ថា​​លើ​លោក​នេះ​នៅ​តែ​មាន​មនុស្ស​ប្រុស​ល្អ ប៉ុន្តែ​នាង​ខ្លាច​បំផុត​គឺ​មនុស្ស​ប្រុស ខ្លាច​ស្រលាញ់​បាន​តែ​ដំបូង ស្មោះ​បាន​ត្រឹម​តែ​មាត់ មិន​អាច​​ទុក​ចិត្ត​នរណា​ម្នាក់ ព្រោះ​ខ្លាច​ដូច​ជា​ប៉ា​នាង។​​

៣. ច្រណែន​តូច​ចិត្ត​ពេល​​ឃើញ​គ្រួសារ​គេ​មាន​ក្តី​សុខ

ភ្នែក​សម្លឹង ចិត្ត​​នឹក​គិត​ស្រមៃ ពេល​ឃើញ​គ្រួសារ​គេ​​ជួប​ជុំ​គ្នា​មាន​សុភមង្គល មាន​ស្នាម​ញញឹម​ពិត​ប្រាកដ មិន​មែន​ស្នាម​ញញឹម​ក្លែង​ក្លាយ ដូច​នាង​សព្វ​ថ្ងៃ។ ​

៤. ប៉ះពាល់​ដល់​ការសិក្សា

នេះ​ជា​ឆ្នាំ​ដែល​នាង​ប្រលង​បាក់ឌុប នាង​​តែង​តែ​លើក​ទឹក​ចិត្ត​ខ្លួន​ឯង​ ថា​ត្រូវ​តែ​តស៊ូ​ ទោះ​ជា​មាន​​បញ្ហា​ប៉ុន​ភ្នំ​ ​ត្រូវ​ទុក​មួយ​ឡែក​​សិន ទី​បំផុត​នាង​បាន​ជាប់​ជា​សិស្ស​ពូកែ​​ផ្នែក​រូប​វិទ្យា​ប្រចាំ​សាលា ដូច​បំណង ប៉ុន្តែ​ពេល​​​ភាព​ស្មុគស្មាញ​​​រើ​ឡើង​ម្តងៗ គឺ​ពិបាក​ទ្រាំ​ណាស់ ​​ហើយ​​ក៏​​បាត់​បង់​ការ​ផ្តោត​អារម្មណ៍​ ក្នុង​​ការ​ធ្វើ​កិច្ចការ​ផ្សេងៗ​ដែរ។

៥. មិន​ទទួល​បាន​ភាព​កក់​ក្តៅ

គ្មាន​ភាព​ស្និទ្ធស្នាល​រវាង​ឪពុក​និង​កូន ចង់​ពិភាក្សា​អី​ក៏​មិន​បាន មាន​រឿង​សប្បាយ​ចិត្ត ដំណឹង​ល្អ​ចង់​ចែក​រំលែក​ក៏​មិន​បាន ពេល​វេលា​ដែល​អាច​នៅ​ជិត​គាត់ មាន​តិច​តួច​បំផុត។

៧. លែង​ឲ្យ​តម្លៃ​ទៅ​លើ​ទ្រព្យ​សម្បត្តិ​ជា​ធំ

នាង​និយាយ​ថា "ផ្ទះ​ធំ​ ឡាន​ទំនើប សម្ភារៈ​និយម ​មាន​​អស់​ហើយ សល់​​តែ​ក្តី​សុខ មួយ​មុខ​គត់​ដែល​មិន​ទាន់​រក​បាន" ដូច្នេះ​ហើយ​បាន​​​នាង​គិត​ថា មាន​ទ្រព្យ​ច្រើន​​ក៏​មិន​មែន​ប្រាកដ​ថា​មាន​សុភមង្គល​ដែរ។

ជា​ចុង​​ក្រោយ​នាង​​សូម​ ផ្តាំ​ផ្ញើ​ទៅ​​មនុស្ស​ប្រុស​​ទាំង​អស់ ឲ្យ​មាន​ចិត្ត​​ស្មោះ​មួយ​និង​មួយ កុំ​​សម្លាប់​ទឹក​ចិត្ត​ប្រពន្ធ​និង​កូន​ដែល​មិន​ដឹង​អី ​ហើយ​​ក៏​សូម​ផ្តែផ្តាំ ដល់​​​អ្នក​ដែល​បាន​ជួប​​រឿង​ដូច​នាង ​​ឲ្យ​​​មាន​ភាព​រឹង​ប៉ឹង​ឡើង ត្រូវ​លើក​ទឹក​ចិត្ត​​ចំណាយ​ពេល​​នៅ​ជាមួយម្តាយ​ឲ្យ​បាន​ច្រើន​ និង​រស់នៅ​​​ឲ្យ​មាន​តម្លៃ។​​

ចុចអានបន្ត៖

អត្ថបទ៖ ដេត ឈុនអ៉ី

អត្ថបទពេញនិយម