នារីឲ្យតែមានប៉ុន្មានចំណុចនេះ ដឹងតែបុរសដណ្ដើមគ្នាចង់បានជាប្រពន្ធហើយ

2018-05-23 06:40:01
ចំនួនមតិ 0 | ចំនួនចែករំលែក 0

មនុស្សប្រុសណាដែលថាមិនចង់បានប្រពន្ធល្អទៅ ដូច្នេះហើយទើបបានជាយើងតែងតែឮចាស់ៗនិយាយថា «ធ្វើខ្លួនឲ្យតែល្អទៅ មិនខ្វះទេប្ដី»។ ពាក្យនេះពិតជាត្រូវណាស់ព្រោះរឿងរៀបការយកគ្នាជាប្ដីប្រពន្ធមិនមែនយកតាមតែចិត្តចង់នោះទេព្រោះវាជាអនាគតគ្រួសារមួយទាំងមូល។ សម្រាប់នារីដែលចង់ឲ្យខ្លួនក្លាយជាមនុស្សដែលបុរសដណ្ដើមគ្នាចង់បានជាប្រពន្ធនោះគួរតែទម្លាប់ខ្លួនឲ្យមានចំណុចទាំងនេះ ៖

១. ឆ្លាត ហើយចេះលេងសើច

ជាប្រភេទមនុស្សស្រីម្នាក់ដែលតែងផ្ដល់ភាពរីករាយឲ្យមនុស្សប្រុសជានិច្ច។ ទោះមកពីក្រៅហត់ប៉ុណ្ណា មិនសប្បាយចិត្តប៉ុណ្ណាក៏ដោយឲ្យតែជួបមុខនាង នៅក្បែរនាងគឺគេបាត់អស់ភាពសោកសៅនោះ។ នេះមកពីនាងដឹងថាអ្វីគួរធ្វើ អ្វីមិនគួរធ្វើ និងចរិតបែបគួរឲ្យស្រឡាញ់ដែលនាងមានមកជាមួយស្រាប់។ មនុស្សស្រីដែលឆ្លាតទោះមនុស្សប្រុសនៅជាមួយយូរយ៉ាងណាក៏ដោយក៏មិនចេះធុញដែរ។

រូបតំណាង

**២. ចេះរក្សាអាថ៌កំបាំង**

នាងមិនចូលចិត្តបើកចំហរឿងខ្លួនឯងច្រើនពេកនោះទេ នាងតែងរក្សានូវអាថ៌កំបាំងដែលធ្វើឲ្យមនុស្សប្រុសជាច្រើនកាន់តែចង់ដឹងពីនាង។

នាងមិនចូលចិត្តបង្ហាញអារម្មណ៍ដើម្បីទាក់ទាញចំណាប់អារម្មណ៍ពីអ្នកណាទេ តែនាងបានទាញអារម្មណ៍របស់មនុស្សប្រុសនៅពេលនាងកាន់តែស្ងប់ស្ងាត់។ ម្យ៉ាងទៀតមនុស្សប្រុសគឺស្រឡាញ់បំផុតនារីដែលមិនបើកចំហពេកព្រោះគេជឿថានារីបែបនេះទៅថ្ងៃក្រោយទោះមានបញ្ហាអីក៏មិនចេះរំអួយ និងរអ៊ូច្រើនដែរ។

៣. ចេះការងារផ្ទះមួយចប់

ប្រហែលនារីសម័យទំនើបមិនសូវជាខ្វល់រឿងការងារផ្ទះប៉ុន្មានទេព្រោះគេគិតថាវាមិនមែនជារឿងចាំបាច់ទៀតឡើយ។ យ៉ាងណាក៏ដោយមនុស្សប្រុសក៏តែមើលលើរឿងនេះព្រោះគេគិតថានារីដែលចេះការងារផ្ទះនឹងធ្វើឲ្យគ្រួសារគេមានក្ដីសុខ។ នៅពេលផ្ទះស្អាត ម្ហូបឆ្ងាញ់ គ្រប់យ៉ាងមានរបៀបរៀបរយ អារម្មណ៍ និងផ្លូវចិត្តរបស់អ្នកនៅក្នុងផ្ទះក៏ល្អទៅតាមហ្នឹងដែរ។

៤. រស់នៅក្នុងជីវិតពិត

មានមនុស្សស្រីខ្លះចូលចិត្តយកជីវិតខ្លួនឯងទៅរស់នៅក្នុងរឿងនិទាន ឬសម្ដែងឲ្យគេឃើញថានាងអស្ចារ្យ។ ដោយឡែកនារីដែលរស់នៅក្នុងភាពពិតប្រាកដនោះ គឺនារីដែលអាចរ៉ាប់រងរាល់បញ្ហាដែលកើតមានឡើង។ នាងមិនចូលចិត្តបង្អួតអ្នកណា ឬធ្វើអ្វីដែលមិនមែនជាការពិតឡើយ។ នាងសុខចិត្តធ្វើម្ហូបដ៏ឆ្ងាញ់មួយចានជូនប្ដីញ៉ាំ មិនមែនសុំឲ្យប្ដីកាន់វែកកាន់ចានហើយថតបង្ហោះឲ្យគេច្រណែនទេ។

៥. រឹងមាំ និងឯករាជ្យ

មនុស្សប្រុសមើលណាស់ថានារីបែបណាដែលអាចក្លាយជាប្រពន្ធគេបានព្រោះទៅថ្ងៃក្រោយនាងត្រូវរឹងមាំធ្វើជាជំហរគ្រួសារ និងកូនៗគេដូចគ្នា។ នារីដែលមិនទន់ជ្រាយចាំតែពឹងគេ គឺអាចពិបាកទៅថ្ងៃក្រោយពេលដែលរៀបការរួចព្រោះគេជឿថាគេនឹងកាន់តែមានបន្ទុកច្រើន ហើយមិនអាចមើលថែនាងបានគ្រប់គ្រាន់ទេ ដូច្នេះនាងត្រូវចេះថែរក្សាខ្លួន និងគ្រួសារជំនួសគេ។

៦. អាចផ្គត់ផ្គង់ខ្លួនឯងបាន

នាងមានការងារ មានប្រាក់ខែនោះពិតជាចំណុចខ្លាំងមួយដែលមនុស្សប្រុសពិបាកនឹងប្រកែកថាមិនចង់បានណាស់។ គេជឿថានារីដែលមានឯករាជ្យនាងលុយកាក់គឺជានារីដែលខ្លាំងម្នាក់ព្រោះនាងមិនមែនចាំតែលាដៃសុំលុយប្ដីចាយ ហើយក៏អាចនាំគ្រួសារទៅកាន់ភាពមានបានបានដែរ៕