អ្នកមានបន្ទប់គេងតូច តុបតែងបែបនេះស្អាតឥតខ្ចោះ ហើយមើលទៅទូលាយទៀត

2018-05-11 11:00:00
ចំនួនមតិ 0 | ចំនួនចែករំលែក 0

មិនចាំបាច់តែមានផ្ទះធំស្កឹមស្កៃ ទើបគិតថាអាចតុបតែងបាននោះទេ ទោះបីជាអ្នកមានបន្ទប់គេងតូចក៏ដោយ ឲ្យតែចេះច្នៃ និងដឹងពីរបៀបតុបតែងឲ្យបានត្រឹមត្រូវ បន្ទប់គេងអ្នកនឹងមើលទៅ ទូលាយស្អាតជាង អ្នកដែលមានបន្ទប់ធំតែមិនចេះរៀបចំ។

១. ជ្រើសរើសពណ៌ភ្លឺ

ពណ៌សគឺស័ក្ដិសមបំផុត សម្រាប់បន្ទប់តូចឲ្យមើលទៅឃើញធំស្រឡះ ជាងពណ៌ក្រមៅ។ សូម្បីតែស្រោមពូកនិងភួយ អ្នកគួរជ្រើសរើសពណ៌សដូចគ្នា ដើម្បីឲ្យកាន់តែចែងចាំង ប៉ុន្តែត្រូវមានពណ៌ដែលស្រដៀងឬខុសគ្នា ដាក់លាយឡំខ្លះ ទើបឆ្លុះ។

២. ដាក់គ្រែឲ្យជាប់នឹងជញ្ជាំង

ចំពោះអ្នកមានបន្ទប់ធំ ភាគច្រើនគេដាក់គ្រែចំកណ្តាល ប៉ុន្តែបន្ទប់តូចវិញ ត្រូវរុញឲ្យជាប់ជញ្ជាំង និងជ្រុងនៃបន្ទប់ ដើម្បីកុំឲ្យចង្អៀត ហើយអ្នកអាចលម្អដោយស៊ុមរូបថត។

៣. ក្បាលគ្រែ

កុំជ្រើសរើសគ្រែណាដែលមានក្បាលគ្រែខ្ពស់ពេក ព្រោះក្បាលគ្រែទាប មានលក្ខណៈសាមញ្ញ មិនស្កេះស្កះ ឃើញធំជាមុន ហើយអ្នកក៏អាច ធ្វើការតុបតែងបន្តិចបន្តួចពីលើក្បាលគ្រែផងដែរ។

៤. មិនដាក់តាំងរបស់ច្រើនពេក

អ្នកគូរមានរបស់តូចៗល្មម សម្រាប់ដាក់តាំងក្នុងបន្ទប់ ដើម្បីកុំឲ្យរញ៉េរញ៉ៃ ហើយយល់ល្អគូរមានប្រអប់ឬកេះ សម្រាប់ដាក់របស់មិនសូវប្រើ ឬឥវ៉ាន់ផ្សេងៗ នៅមួយឡែក ឬនៅខាងក្រោមគ្រែ។

៥. ដាក់ផ្ទាំងកញ្ចក់

កញ្ចក់មិនត្រឹមតែអាចធ្វើឲ្យបន្ទប់ឃើញធំទេ ប៉ុន្តែបើអ្នកដាក់ឲ្យចំកន្លែងដែល មានចំណាំងព្រះអាទិត្យ ពន្លឺនឹងចាំងចូលមកបន្ទប់អ្នកយ៉ាងស្រស់បំព្រង។ អ្នកមិនចាំបាច់ស្វាន ជាប់ជញ្ជាំងនាំពិបាកទេ អាចប្រើជាមួយស្គត់បិទជញ្ជាំងក៏មានសុវត្ថិភាពដែរ។

៦. ជ្រើសរើសគ្រែដែលអាចដាក់ឥវ៉ាន់ខាងក្រោមបាន

បើមិនចង់ទិញគ្រែខុស គួរទិញគ្រែដែលអាចផ្ទកឥវ៉ាន់ផ្សេងៗនៅខាងក្រោមបាន ប៉ុន្តែបើមានគ្រែស្រាប់ហើយ អ្នកក៏មិនចាំបាច់ខ្ជះខ្ជាយលុយអីទៀតដែរ ព្រោះអ្នកអាចធ្វើការកែច្នៃខ្លួនឯង ដោយគ្រាន់តែយកបន្ទះឈើមកធ្វើជាហិបហើយអាចទាញចេញចូលបាន។