មាន៥ចំណុចនេះ អ្នកនឹងបង្កើតមិត្តច្រើនជាងសត្រូវទោះនៅទីណាក៏ដោយ

2018-05-03 00:33:00
ចំនួនមតិ 0 | ចំនួនចែករំលែក 0

ទោះជានៅទីណាក៏ដោយ បើអ្នកធ្វើខ្លួនជាមនុស្សដែលគួរឲ្យចូលចិត្តរាប់អាន នោះទំនុកចិត្ត ភាពរីករាយ និងស្នាមញញឹម តែងកើតមានឡើងចំពោះអ្នក និងមនុស្សដែលនៅជុំវិញខ្លួនអ្នក។ ជាការពិតណាស់ មនុស្សយើងមានញាតិមិត្ត ចូលចិត្តរាប់អានច្រើន ប្រសើរជាងមានសត្រូវ ដែលអាចនាំឲ្យជីវិតជួប នូវវិនាសអន្តរាយ មួម៉ៅក្តៅក្រហាយច្រើន។ ដូច្នេះហើយបានជាអ្នកត្រូវប្រកាន់ខ្ជាប់ នូវចរិយាសម្បត្តិ ៦ចំណុចសំខាន់ៗដូចខាងក្រោមនេះ ៖

១. ធ្វើល្អដាក់អ្នកដទៃដោយមិនរំពឹងទុកអ្វីមកវិញ

បើដាក់ចិត្តដាក់កាយថាជួយហើយ គឺត្រូវជួយឲ្យអស់ពីចិត្ត ដោយមិនគិតទាមទារសំណង ប៉ងចង់បានអ្វីមួយមកវិញ ឬរំលើកគុណទៅថ្ងៃក្រោយនោះឡើយ។

២. ស្ដាប់និងរក្សាអាថ៌កំបាំងពេលមានអ្នកចែករំលែកក្ដីទុក្ខជាមួយ

ទោះបីគេជាមនុស្ស ដែលអ្នកមិនសូវ ជិតស្និទ្ធជាមួយក៏ដោយ បើគេនិយាយប្រាប់ពីរឿងកើតទុក្ខ នៅក្នុងជីវិត អ្នកគួរតែស្តាប់ដោយយកចិត្តទុកដាក់ ព្យាយាមយល់ពីស្ថានការណ៍ និងរក្សាកុំឲ្យបែកធ្លាយចេញទៅខាងក្រៅ។ ធ្វើបែបនេះ មនុស្សដែលនៅជុំវិញខ្លូនអ្នក ប្រាកដជាចាត់ទុកអ្នកដូចជា ថ្នាំព្យាបាលមួយគ្រាប់ ដែលអាចជួយសម្រាលទុក្ខ ពេលមិនសប្បាយចិត្ត។

៣. មិនវាយឫករើសអើង

កុំវាយតម្លៃចរិតមនុស្សពេលទើបតែបានជួបដំបូង កុំវាយតម្លៃតែសំបកក្រៅ សម្លឹងមើលលើមើលក្រោម ទើបសម្រេចចិត្តនិយាយទៅកាន់គេមុន ព្រោះមនុស្សម្នាក់ៗ កើតមកក្នុងបទដ្ឋានខុសគ្នា ត្រូវចេះទទួលយកអ្វីដែលជាចំណុចល្អពីខាងក្នុង មិនមែនរបស់ក្រៅខ្លួនទេ។ ត្រូវគិតថាអ្នកជាមនុស្ស ដែលកើតមកមានជីវិតមួយដូចគ្នា។

៤. និយាយត្រង់ៗ

ឃើញល្អថាល្អ ឃើញអាក្រក់និយាយកែតម្រូវ ប៉ុន្តែត្រូវចេះរៀបពាក្យឲ្យបានត្រឹមត្រូវមុនហាស្តី ទើបមិនប៉ះពាល់ដល់អារម្មណ៍អ្នកដទៃ ហើយក៏មិនមែនផ្អែមតែនៅនឹងមុខ ប៉ុន្តែវាយប្រហារនៅពីក្រោយខ្នងនោះដែរ។

៥. មិនប្រកាន់ច្រើន

មនុស្សបែបនេះទៅណាមកណា ក៏ចុះក្នុងសង្គមដែរ ព្រោះគេមិនចេះប្រកាន់ ឬអៀនប្រៀនច្រើន។ គេចូលចិត្តលេងសើច បូករួមជាមួយកាយវិការរស់រវើក បើនរណាបាននៅជិត មានអារម្មណ៍កក់ក្តៅ ហាក់បីដូចជាមិត្តភក្តិដែលស្គាល់គ្នាជាយូរមកហើយ។

ចំណុចទាំង៥នេះ ខ្ញុំគិតថាវាមិនពិបាកអនុវត្តនោះទេ អ្នកត្រូវព្យាយាមធ្វើវាឲ្យបាន ព្រោះវាជាសេចក្តីសុខរបស់អ្នក។

ចុចអានបន្ត៖