សញ្ញា​បង្ហាញ​ថា​អ្នក​ធុញថប់​នឹង​ជីវិត​ខ្លួន​ឯង​ខ្លាំង និង​វិធី​ដោះស្រាយ​ឲ្យ​​ទាន់​ពេល

  • 2018-04-20 07:37:00
  • ចំនួនមតិ

ចន្លោះមិនឃើញ

នៅ​ពេល​យើង​មាន​អារម្មណ៍​ធុញ​នឹង​អ្វី​ផ្សេង​ៗ ដំណោះស្រាយ​គឺ​ងាយ​ស្រួល ដោយ​គ្រាន់​តែ​ដើរ​គេច​ចេញ​ពី​វា មិន​យូរ​មិន​ឆាប់​នឹង​បាន​ជួប​អ្វី​ដែល​គួរ​ឲ្យ​ចាប់​អារម្មណ៍។ ប៉ុន្តែ​ភាព​ធុញទ្រាន់​មិន​មែន​ចប់​ត្រឹមហ្នឹង​នោះ​ទេ ពេល​ខ្លះ​យើង​បែរ​ជា​មាន​អារម្មណ៍​ធុញទ្រាន់​នឹង​ខ្លួន​ឯង ដែល​នេះ​ជា​បញ្ហា​ធំ​ណាស់​ព្រោះ​យើង​មិន​អាច​គេច​ពី​ខ្លួន​ឯង​នោះ​ឡើយ។ សាក​មក​ពិនិត្យ​ខ្លួន​ឯង​មើល​សិន​ថា ពេល​នេះ​អ្នក​កំពុង​មាន​អារម្មណ៍​ធុញ​ទ្រាន់​នឹង​ជីវិត​ខ្លួន​ឯង​ដែរ​ឬ​អត់ តាម​រយៈ​រោគ​សញ្ញា​ខាង​ក្រោម​៖

១. អ្នក​ឧស្សាហ៍​គេង​មិន​លក់ ឬ​ឧស្សាហ៍​ភ្ញាក់​កណ្ដាល​យប់​ហើយ​​គេង​វិញ​មិន​លក់ ញ៉ាំ​បាយ​មិន​សូវ​ឆ្ងាញ់ ទម្ងន់​ចុះ​ឡើង​យ៉ាង​រហ័ស មាន​អារម្មណ៍​អស់​កម្លាំង​ទាំង​មិន​បាន​បញ្ចេញ​កម្លាំង​ ឬ​ធ្វើ​ការ​ធ្ងន់។

២. គ្រប់​ពេល​​ដែល​បាន​ទទួល​ការងារ​សំខាន់ អ្នក​នឹង​មាន​អារម្មណ៍​ភ័យ​ៗ ព្រម​ទាំង​គិត​ថា​ការងារ​ទាំង​នោះ​ហួស​ពី​សមត្ថភាព​ខ្លួន ឬ​គិត​ថា​ការងារ​នោះ​នឹង​ចេញ​លទ្ធផល​មិន​ល្អ​ជា​មិន​ខាន។

៣. អ្នក​គ្មាន​មោទនភាព​នឹង​ការងារ​ខ្លួន​ឯង ហើយ​នឹក​ច្រណែន​អ្នក​ដទៃ​ដែល​បាន​ធ្វើ​ការងារ​ល្អ​ជាង។

៤. អ្នក​មាន​អារម្មណ៍​ថា​មិន​ថា​ព្យាយាម​យ៉ាង​ណា អ្នក​នៅ​ជុំវិញ​ខ្លួន​ក៏​មិន​ផ្ដល់​តម្លៃ មិន​ទទួល​ស្គាល់​លទ្ធផល​ការងារ​អ្នក ឬ​អំពើ​ល្អ​របស់​អ្នក។

៥. នៅ​ពេល​ត្រូវ​ចូល​សង្គម អ្នក​មាន​អារម្មណ៍​ខ្វះ​ការ​ជឿជាក់ មាន​អារម្មណ៍​ដាច់​ឆ្ងាយ​ពី​អ្នក​ដទៃ មិន​ហ៊ាន​និយាយ​ចូល​គេ។

៦. អ្នក​មាន​អារម្មណ៍​ឯកោ មិន​ដឹង​ថា​ត្រូវ​និយាយ​ជាមួយ​អ្នក​ណា ទាំង​ការ​ពិត​អ្នក​មាន​មិត្តភ័ក្ដិ​ជា​ច្រើន។

៧. អ្នក​គិត​ជានិច្ច​ថា ខ្លួន​ឯង​មិន​ល្អ​ឥត​ខ្ចោះ ហើយ​គិត​ថា​​ភាព​មិន​ល្អ​ឥតខ្ចោះ​នេះ​គឺ​ជា​ចំណុច​ខ្សោយ​របស់​អ្នក។

៨. មិន​ថា​ងាក​ទៅ​ខាង​ណា អ្នក​ក៏​ជួប​តែ​ភាព​គួរ​ឲ្យ​សាំ គួរ​ឲ្យ​ធុញ ហត់​នឿយ ទាំង​ជីវិត ស្នេហា ការ​សិក្សា និង​ការងារ។

៩. អ្នក​គ្មាន​កម្លាំង​ជំរុញ​​ចិត្ត​ក្នុង​ការ​បន្ត​ដំណើរ​ជីវិត មាន​អារម្មណ៍​ថា​ខ្លួន​ឯង​វង្វេង​ផ្លូវ វិលវល់ រក​គោលដៅ​ក្នុង​ជីវិត​មិន​ឃើញ និង​យល់​ថា​ខ្លួន​គ្មាន​តម្លៃ។

១០. អ្នក​​គ្មាន​កម្លាំង​ចិត្ត​ក្នុង​ការ​ធ្វើ​ការ មិន​ចង់​ជួប​មនុស្ស​ម្នា និង​អាច​ឈាន​ដល់​ការ​គិត​ខ្លី។

បើ​អ្នក​មាន​សញ្ញា​ខាង​លើ​នេះ​ចាប់​ពី ២ឡើង​ទៅ នោះ​អាច​រាប់​បាន​ថា​ អ្នក​កំពុង​ឈាន​ចូល​ទៅ​កៀក​នឹង​ជំងឺ​បាក់​ទឹក​ចិត្ត​។ ដូច្នេះ​ប្រសិន​បើ​មិន​ចង់​ឲ្យ​អាការៈ​រាលដាល​កាន់​តែ​ធ្ងន់ធ្ងរ អ្នក​គួរ​សាកល្បង​រក​វិធី​ដោះស្រាយ​បញ្ហា​ធុញទ្រាន់​នឹង​ជីវិត​ខ្លួន​ឯង ដោយ​គ្រាន់​តែ​​ធ្វើ​តាម ៦​​ជំហាន​ខាង​ក្រោម​នេះ៖

១. បើ​ធុញ​ខ្លាំង​គួរ​តែ​ប្ដូរ​ចេញ​ខ្លះ

ចាប់​ផ្ដើម​​ពី​ទង្វើ​ងាយ​ៗ​ដូច​ជា ក្រោក​ឈរ​ផ្លាស់​ប្ដូរ​ខ្លួន​ឯង​ឲ្យ​ក្លាយ​ជា​​មនុស្ស​ថ្មី អាច​ដោយ​​ការ​ផ្លាស់​ប្ដូរ​ម៉ូដ​សក់ និង​ស្ទីល​ក្នុង​ការ​តែង​ខ្លួន។ ប៉ុន្តែ​ត្រូវ​ចាំ​ថា កុំ​ព្យាយាម​ផ្លាស់​ប្ដូរ​ខ្លួន​ឲ្យ​ដូច​អ្នក​ដទៃ ប៉ុន្តែ​ត្រូវ​ធ្វើ​ជា​ខ្លួន​ឯង ក្នុង​​រូប​បែប​ដែល​ខ្លួន​ជឿជាក់។ ក្រៅ​ពី​ការ​ផ្លាស់​ប្ដូរ​ខ្លួន​ឯង​ហើយ គួរ​ផ្លាស់​ប្ដូរ​បរិយាកាស​ជុំវិញ​ខ្លួន​ខ្លះ ដូច​ជា​រៀប​ចំ​បន្ទប់​បែប​ថ្មី រៀប​ចំ​កន្លែង​ធ្វើ​ការ ក៏​ដូច​ជា​ផ្លាស់​ប្ដូរ​ទម្លាប់​ផ្សេង​ៗ​ដែល​​គិត​ថា​ដដែល​ៗ​ពេក។

២. ​សរសេរ​កំណត់ហេតុ​អំពី​រឿង​ល្អ​ៗ

ការ​សរសេរ​កំណត់​ហេតុ​ ត្បិត​តែ​ជា​វិធី​បញ្ចេញ​អារម្មណ៍​ល្អ​មួយ​ ប៉ុន្តែ​បើ​សិន​ជា​យើង​សរសេរ​កត់ត្រា​តែ​បញ្ហា ឬ​មិន​សប្បាយ​ចូល​រាល់​ថ្ងៃ វា​នឹង​អាច​ឲ្យ​យើង​កាន់​តែ​មាន​ទុក្ខ។ ដូច្នេះ​ហើយ​គួរ​ជ្រើសរើស​កត់​ត្រា​តែ​អ្វី​ល្អ​ៗ​ដែល​កើត​ឡើង​ប្រចាំ​ថ្ងៃ​បាន​ហើយ ដើម្បី​ឲ្យ​អ្នក​នឹក​ឃើញ​រឿង​ល្អ​ៗ​ច្រើន​ជាង។

៣. ឈប់​ញៀន​បណ្ដាញ​សង្គម

បើ​ទោះ​ជា​ការ​លេង​បណ្ដាញ​សង្គម លេង​ឆាត​ជាមួយ​មិត្តភ័ក្ដិ​ជួយ​ឲ្យ​យើង​បាត់​ធុញ​បាន​ ប៉ុន្តែ​ក៏​កុំ​ឲ្យ​ដល់​ថ្នាក់​ញៀន​នឹង​វា​ឲ្យ​សោះ ព្រោះ​ការ​ពិត​ មាន​ការ​សិក្សា​​បង្ហាញ​ថា ការ​ញៀន​នឹង​បណ្ដាញ​សង្គម​នឹង​បន្ថែម​ឱកាស​ក្នុង​ការ​កើត​ជំងឺ​បាក់​ទឹកចិត្ត​កាន់​តែ​ច្រើន ព្រោះ​មនុស្ស​យើង​ច្រើន​តែ​បង្ហោះ​តែ​រឿង​ល្អ​ៗ​នៃ​ជីវិត​លើ​បណ្ដាញ​នេះ ដូច្នេះ​បើ​យើង​ញៀន និង​ចូលចិត្ត​ប្រៀបធៀប​ខ្លួន​​ជាមួយ​សង្គម​អនឡាញ នោះ​យើង​នឹង​លែង​មាន​ជំនឿចិត្ត និង​មោទនភាព​លើ​ខ្លួន​ឯង​នៅ​ថ្ងៃ​ណា​មួយ។

៤. ធ្វើ​រឿង​សប្បាយ​ៗ

ការ​រក​អ្វី​សប្បាយ​ៗ​ធ្វើ គឺ​ជា​វិធី​ដែល​នឹង​ធ្វើ​ឲ្យ​យើង​បាត់​ស្ត្រេស​បាន​យ៉ាង​ល្អ ប៉ុន្តែ​សប្បាយ​ៗ​ទាំង​នេះ គឺ​ត្រូវ​ Say No ចំពោះ​អំពើ​អបាយមុខ​ផង។ អាច​រក​វិធី​ដែល​ធ្វើ​ឲ្យ​ខ្លួន​ឯង​អស់​សំណើច ដូច​ជា​ទៅ​​ទិញ​អីវ៉ាន់​ដោយ​កាន់​លុយ​តែ ៥ដុល្លារ ទៅ​ដើរ​លេង​ជាមួយ​គ្រួសារ ឬ​បង្កើត​គណនីហ្វេសប៊ុក​ថ្មី​ហើយ​បង្ហោះ​តែ​អ្វី​សប្បាយ​ៗ។ ប៉ុន្តែ​ត្រូវ​ប្រាកដ​ថា មិន​ធ្វើ​​ខុស ប៉ះពាល់​ដល់​អ្នក​ដទៃ ឬ​គ្រោះថ្នាក់​ដល់​ខ្លួន។

៥. បន្ថែម​គុណ​តម្លៃ​ឲ្យ​ជីវិត

អាការៈ​ធុញ​ទ្រាន់​នឹង​ខ្លួន​ឯង​កើត​ចេញ​ពី​ការ “ទំនេរ” រហូត​កើត​អារម្មណ៍​តប់ប្រមល់ ដូច្នេះ​គួរ​ស្វែង​រក​អ្វី​ដែល​មាន​ប្រយោជន៍​ចំពោះ​ខ្លួន​ឯង និង​សង្គម​ដើម្បី​ធ្វើ ដូច​ជា​ចុះ​ឈ្មោះ​ចូល​រៀន​វគ្គ​ខ្លី​ដែល​ខ្លួន​ចាប់​អារម្មណ៍ រៀន​ភាសា រៀន​ធ្វើ​នំ បង្អែម រៀន​ច្រៀង ហាត់​យូហ្កា ឬ​ទៅ​មណ្ឌល​កុមារ​កំព្រា និង​មណ្ឌល​ចាស់ជរា​ដើម្បី​ធ្វើ​ការងារ​ស្ម័គ្រចិត្ត​ណា​មួយ។ បន្ទាប់​ពី​ធ្វើ​រឿង​ទាំង​អស់​នេះ អ្នក​នឹង​មាន​អារម្មណ៍​ថា​ខ្លួន​មាន​តម្លៃ​ឡើង​វិញ។

៦. កំណត់​គោលដៅ​ងាយ​ៗ​ឲ្យ​ជីវិត

ព្យាយាម​កំណត់​គោលដៅ​បែប​ងាយ​ៗ​សម្រាប់​ខ្លួន​ឯង ហើយ​ប្ដេជ្ញា​ខ្លួន​ឯង​ថា​ធ្វើ​​ឲ្យ​បាន​សម្រេច ដូច​ជា​​​ហាត់​ប្រាណ​សម្រក​ទម្ងន់​ ដោយ​ដាក់​គោលដៅ​ថា​ត្រូវ​ស្រក​ឲ្យ​បាន​ពីរ​គីឡូ​ក្រាម ក្នុង​មួយ​ខែ​ជា​ដើម។ នៅ​ពេល​ធ្វើ​បាន​សម្រេច​តាម​គោលដៅ​ហើយ កុំ​ភ្លេច​ឲ្យ​រង្វាន់​ខ្លួន​​ឯង​ផង​ណា ៕

ចុចអាន៖


ប្រភព៖ rugyim ប្រែ​សម្រួល៖ ស្វាយ វ៉ាន់ថន