បើកំពុងស្រឡាញ់មនុស្ស២នាក់ក្នុងពេលតែមួយ គួរសម្រេចចិត្តតាមវិធីនេះ

2018-03-27 07:09:00
ចំនួនមតិ 0 | ចំនួនចែករំលែក 0

ពេលខ្លះពិបាកនឹងបន្ទោសម្នាក់ៗណាស់ ព្រោះស្នេហាទាក់ទងនឹងអារម្មណ៍។ កំពុងមានម្នាក់ក្នុងចិត្តហើយ ក៏ជ្រុលចិត្តទៅស្រឡាញ់ម្នាក់ទៀត ដោយមិនបានតាំងចិត្ត ហើយក៏ធ្វើឲ្យខ្លួនឯងពិបាកចិត្តមិនដឹងថាគួរជ្រើសរើសអ្នកណា មិនដឹងថាអារម្មណ៍ខ្លួនឯងពេលនេះបែបណា? បើអ្នកកំពុងតែជួបបញ្ហានេះ អាចសាកល្បងរបៀបសម្រេចចិត្តខាងក្រោមនេះបាន ៖

១. កុំប្រៀបធៀប

កុំយកពួកគេមកប្រៀបធៀបគ្នា ព្រោះនោះមិនហៅថាស្នេហាឡើយ វាមានន័យថាអ្នកស្រឡាញ់មនុស្សម្នាក់ទៀតដោយសារឃើញអ្វីដែលគេមានល្អជាងម្នាក់ទៀត។ អ្នកត្រូវបែងចែកអារម្មណ៍អ្នកឲ្យច្បាស់តាមការស្រឡាញ់មិនមែនប្រៀបធៀបអ្នកណាល្អជាងអ្នកណាទេ។

រូបតំណាង

**២. គិតពីមូលហេតុដែលអ្នកលង់ស្រឡាញ់ម្នាក់ទៀត**

គួរចំណាយពេលអង្គុយគិតពីហេតុផលដែលអ្នកលង់ស្រឡាញ់ម្នាក់ទៀតពេលកំពុងមានសង្សារហើយ ព្រោះវាអាចឲ្យអ្នកយល់ពីខ្លួនឯងកាន់តែច្បាស់។ តើអ្នកស្រឡាញ់គេដោយសារតែម្នាក់ទៀតទុកអ្នកចោលមែនទេ? អ្នកស្រឡាញ់ម្នាក់ទៀតដោយសារគេស្អាត? ឬដោយសារគេល្អ គេយកចិត្តទុកដាក់លើអ្នក?

៣. ស្គាល់បេះដូងខ្លួនឯងឲ្យបានច្បាស់

បន្ទាប់ពីអ្នកសួរខ្លួនឯងហើយ ត្រូវធ្វើការបែងចែក កំណត់ពីបេះដូងខ្លួនឯងឲ្យច្បាស់។ បើសិនជាអ្នកមុនត្រឡប់មកល្អដាក់អ្នកជាងនេះ អ្នកអាចឈប់ស្រឡាញ់ម្នាក់ទៀតទេ? តើអារម្មណ៍ដែលលង់ស្រឡាញ់ម្នាក់ទៀតនោះ ជាការលេងឬមែន? មួយឆាវ ឬរយៈពេលយូរ? តើអ្នកឈប់ទាក់ទងគេ ហើយត្រឡប់មកស្មោះត្រង់នឹងអ្នកមុនបានទេ? នេះជាអ្វីដែលអ្នកត្រូវដឹងពីខ្លួនឯង ព្រោះដើម្បីឲ្យអ្នកយល់ថាម្នាក់ណាជាមនុស្សពិតប្រាកដសម្រាប់អ្នក។

រូបតំណាង

៤. ដកពិសោធន៍ខ្លួនឯង

បើមកដល់ចំណុចទី៣ហើយអ្នកនៅតែមិនអាចបែងចែកបាន អ្នកគួរតែពិសោធន៍លើការស្រឡាញ់ខ្លួនឯងជាមួយចំណុចទី៤នេះ។ ឈប់ទាក់ទងទាំង ២នាក់នោះមួយរយៈ បន្ទាប់មកចាំមើលថាខ្លួនឯងនឹកអ្នកណា? ចង់ជួបអ្នកណា? ត្រូវការអ្នកណាជាង? បើម្នាក់ណាដែលបង្ហាញខ្លួនក្នុងបេះដូងអ្នកនោះ គួរតែជ្រើសរើសម្នាក់នោះ ព្រោះបេះដូងអ្នកចង់បានគេខ្លាំង។

៥. កុំលេងល្បែងស្នេហាត្រីកោណ

កុំចាប់ម្ដងពីរនាក់អី ត្រូវដោះលែងម្នាក់បន្ទាប់ពីអ្នកដឹងថាខ្លួនឯងស្រឡាញ់ម្នាក់ណា។ ត្រូវឲ្យស្នេហានោះជារបៀបចាស់ទុំ និយាយគ្នាត្រង់ៗថាអារម្មណ៍អ្នកពេលនេះស្រឡាញ់អ្នកណា ចៀសវាងការលាក់លៀមគ្នារហូតដល់ម្នាក់ទៀតដឹងហើយឈឺចាប់ស្ទើរស្លាប់នោះ។

៦. មើលឲ្យបានវែង

បើអ្នកសម្រេចចិត្តថាជ្រើសរើសអ្នកណាហើយ ត្រូវដាច់ស្រេចជាមួយម្នាក់ទៀត។ ត្រូវប្រាកដ និងជឿជាក់ថាអ្នកដែលអ្នកជ្រើសរើសអាចកាន់ដៃអ្នកទៅថ្ងៃមុខបាន ព្រោះពេលខ្លះវាអាចមានសង្ឃឹមត្រឹមតែពេលខ្លីប៉ុណ្ណោះ។

រូបតំណាង

កុំចេះតែទុកវារហូតដល់ម្នាក់ៗឈឺចាប់ ព្រោះពេលនោះអ្នកនឹងបាត់បង់ទាំងអស់។ ធ្វើខ្លួនឲ្យធំដឹងក្ដី បើអស់ស្រឡាញ់ប្រាប់ថាអស់ បើនៅត្រូវបន្តឲ្យបានល្អ មិនមែនលេងឲ្យតែអស់ខ្យល់នោះទេ៕

ចុចអាន៖ជួយជ្រោមជ្រែងដៃគូអ្នកឲ្យក្លាយជាមនុស្សជោគជ័យ មនុស្សស្រីគួរមានចំណុចនេះ