ជួយជ្រោមជ្រែងដៃគូអ្នកឲ្យក្លាយជាមនុស្សជោគជ័យ មនុស្សស្រីគួរមានចំណុចនេះ
- 2018-03-26 09:51:04
- ចំនួនមតិ 0 | ចំនួនចែករំលែក 0
ជួយជ្រោមជ្រែងដៃគូអ្នកឲ្យក្លាយជាមនុស្សជោគជ័យ មនុស្សស្រីគួរមានចំណុចនេះ
អ្នកណាក៏ចង់ឃើញគូស្នេហ៍ខ្លួនឯងជោគជ័យលើអ្វីដែលគាត់ចង់បានដែរ ដូច្នេះហើយអ្នកក៏គួរតែចេះប្រើឥទ្ធិពលស្នេហាអ្នកជួយជ្រោមជ្រែងគាត់ឲ្យជោគជ័យដូចគ្នា។ ខាងក្រោមនេះជាចំណុចដែលអ្នកគួរតែមានសម្រាប់ធ្វើជាផ្នែកមួយនៃជោគជ័យរបស់គាត់ ៖
១. គាំទ្រ និងលើកទឹកចិត្ត
មនុស្សប្រុសទោះរឹងមាំប៉ុណ្ណាក៏តែងត្រូវការការគាំទ្រ និងលើកទឹកចិត្តពីមនុស្សដែលខ្លួនឯងស្រឡាញ់ដែរ។ ការធ្វើបែបនេះគឺមានឥទ្ធិពលណាស់ ព្រោះពេលដែលគាត់បាក់ទឹកចិត្តបំផុត អ្នកក៏ជាមនុស្សដែលគាត់ចង់ក្បែរបំផុតដែរ។
**២. ជួយបំពេញបន្ថែមគាត់ឲ្យក្លាយជាមនុស្សមានសមត្ថភាព**
អ្នកត្រូវជួយបង្ហាញជួយប្រាប់គាត់ តែមិនមែនជួយគាត់ទាំងអស់នោះទេ អ្នកត្រូវប្រាប់គាត់ឲ្យហ្វឹកហាត់ខ្លួនឯង ឲ្យគាត់ប្រលូកនឹងរឿងដែលគាត់ត្រូវជួបនៅថ្ងៃក្រោយ ហើយត្រូវជួយបង្កើនសមត្ថភាពគាត់ឲ្យល្អជាងមុន។
៣. ជំរុញគាត់ឲ្យអនុវត្តផែនការរបស់គាត់
ផែនការខ្លះពិបាកនឹងធ្វើតែម្នាក់ឯងណាស់ ដូច្នេះបើមានអ្នកចូលរួមគឺកាន់តែល្អ។ ពេលខ្លះគាត់មានផែនការហើយតែបែរជាជួបបញ្ហា ឬរឿងមិនល្អរាំងស្ទះ ដូច្នេះអ្នកត្រូវតែជួយជំរុញគាត់ ប្រាប់គាត់ ហើយរួមគ្នាអនុវត្តវាជាមួយគាត់ពេលដែលគាត់ត្រូវការអ្នក។
៤.ប្រាប់គាត់ពីរឿងណាដែលល្អ រឿងណាដែលមិនគួរធ្វើ
ជាគូស្នេហ៍ មិនមែនឪពុកម្ដាយទេ ប៉ុន្តែអ្នកត្រូវហ៊ាននិយាយ ហ៊ានប្រាប់ គាត់ពីអ្វីដែលគាត់កំពុងធ្វើ ថាតើវាល្អឬអាក្រក់ហើយវាអាចប៉ះពាល់ដល់គោលដៅរបស់គាត់ឬអត់? ព្រោះអ្នកតែងតែចង់ឃើញគាត់ជោគជ័យ។
៥. កុំព្យាយាមចង់គ្រប់គ្រងគាត់
អ្នកមិនត្រូវគ្រប់គ្រងគាត់ ឬ ឲ្យ គាត់ធ្វើតាមអ្នកនោះទេ ព្រោះមនុស្សប្រុសមិនចូលចិត្តអ្នកណាគ្រប់គ្រង ឬបញ្ជានោះទេ។ អ្នកត្រូវគោរពតាមការសម្រេចចិត្តគាត់ ហើយមិនត្រូវដាក់សម្ពាធឲ្យគាត់ឡើយ អ្នកគ្រាន់តែធ្វើជាទីប្រឹក្សាគាត់ទៅបានហើយ។
៦. កុំជ្រៀតជ្រែកលើការងារផ្ទាល់ខ្លួនរបស់គាត់
ពេលខ្លះគាត់ក៏មិនចង់ឲ្យអ្នកជ្រៀតជ្រែកលើការងាររបស់គាត់ដែរ ក៏ព្រោះតែគាត់មិនចង់ឲ្យអ្នកស្មុគស្មាញជាមួយគាត់ ឬក៏ពេលខ្លះទៀតដោយសារតែអ្នកមិនទាន់យល់ពីដំណើរការច្បាស់លាស់ វាអាចរឹតតែធ្វើឲ្យគាត់ពិបាកថែមទៀត។ ដូច្នេះបើមិនចាំបាច់ទេ អ្នកកុំលូកលាន់អី។
៧. ជួយគាត់ដោយប្រយោល
ពេលខ្លះគាត់មិនចង់បានការជួយពីអ្នកនោះទេព្រោះគាត់មានអារម្មណ៍ថាខ្លួនគាត់អន់ មិនបានការ គ្រាន់តែរឿងប៉ុណ្ណឹងក៏ធ្វើខ្លួនឯងមិនកើត ដូច្នេះ បើអ្នកដឹងពីស្ថានភាពគាត់ហើយ អ្នកគួរតែជួយគាត់កុំឲ្យគាត់ដឹង ដើម្បីកុំឲ្យគាត់មានសម្ពាធ។
៨. យល់ពីគាត់ឲ្យបានច្រើន
អ្វីដែលសំខាន់គឺអ្នកត្រូវតែយល់ពីគាត់ឲ្យបានច្រើន ព្រោះពេលខ្លះគាត់អាចម៉ួរម៉ៅ អាចអារម្មណ៍មិនល្អ ដែល អាចធ្វើឲ្យអ្នកទាស់ចិត្តក៏ថាបាន។ បើបែបនេះហើយអញនកបែរជាធ្វើឲ្យគាត់ខ្វល់ចិត្តមួយទៀតនោះ គាត់អាចមានសម្ពាធច្រើន ហើយពិបាកចិត្តក៏កាន់តែច្រើន។
ការដែលមានអ្នកគាំទ្រ អ្នកលើកទឹកចិត្ត និងអ្នកជំរុញគឺសំខាន់ណាស់សម្រាប់មនុស្សម្នាក់ៗ ជាពិសេសបើម្នាក់នោះជាមនុស្សដែលខ្លួនស្រឡាញ់ទៀតផង៕
ចុចអាន៖នៅពេលជួបមនុស្សក្នុងសុបិន អ្នកនឹងលែងមានអារម្មណ៍ថាឯកាទៀតហើយ
Sabay ត្រូវការរើស Accounting Manager ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/AsCd4N