កំពុងលង់ខ្លួនក្នុងការគិតច្រើនមែនទេ? វិធីសាស្ត្រ ៣ យ៉ាង ជួយអ្នកបញ្ឈប់បានភ្លាមៗ

2018-03-25 07:00:00
ចំនួនមតិ 0 | ចំនួនចែករំលែក 0

ជាការពិត ខួរក្បាលរបស់មនុស្សពិតជាចូលចិត្តការគិតច្រើនខ្លាំងណាស់។ សូម្បីតែពេលខ្លះ អ្នកដែលជាម្ចាស់ខួរក្បាលក៏គ្មានលទ្ធភាពគ្រប់គ្រាន់ក្នុងការបញ្ឈប់ការគិតរបស់ខ្លួនឯងដែរ។ ទោះជាយ៉ាងណា ប្រសិនអ្នកបណ្ដោយខ្លួនទៅតាមចំណង់ដែលគ្មានព្រំដែនមួយនោះ អ្នកអាចនឹងក្លាយជាមនុស្សមានវិបត្តិផ្លូវចិត្តនៅថ្ងៃណាមួយជាក់ជាមិនខាន។ ចាប់ផ្ដើមអនុវត្តវិធីសាស្ត្រទាំង ៣ ខាងក្រោម នោះអ្នកប្រាកដជាអាចដកខ្លួនចេញពីទម្លាប់ដ៏មានគ្រោះថ្នាក់មួយនោះបាន៖

១.ភ្ជាប់ខ្លួនជាមួយធម្មជាតិ

ប្រសិនអ្នកកំពុងរស់នៅ ឬធ្វើការនៅកន្លែងដែលខ្វះសម្រស់ធម្មជាតិ អ្នកត្រូវការចំណុចនេះខ្លាំងបំផុត។ អ្នកគួរចេញទៅញ៉ាំអាហារថ្ងៃត្រង់នៅសួនកម្សាន្តជិតៗ ឬធ្វើដំណើរវិស្សមកាលទៅកន្លែងឆ្ងាយៗជាដើម។ ការផ្ដោតអារម្មណ៍ គយគន់ សម្រស់ដើមឈើ ទឹកធ្លាក់ ផ្ទៃមេឃ ភ្នំ សមុទ្រ បឹងបួ ជួយឲ្យអារម្មណ៍របស់អ្នកប្រែជាស្រស់ស្រាយ ខួរក្បាលដែលកំពុងគិតស្មុគស្មាញនឹងឈប់គិតភ្លាមៗតែម្ដង។

២.ទន្ទេញពាក្យសន្តិភាពមួយចំនួន ដើម្បីរំងាប់ចិត្ត

រៀនសង្កេតខ្លួនឯងថា តើអ្នកគិតច្រើនទៅលើរឿងអ្វីខ្លះ? ប្រសិនអ្នកដឹងច្បាស់ថា ការគិតដ៏ច្រើនស្មុគស្មាញនោះ ទាក់ទងភាគច្រើនជាមួយទំនួលខុសត្រូវចំពោះរឿងការងារ គ្រួសារ ព្រមទាំងសម្ដីបំបាក់ទឹកចិត្តរបស់មនុស្សជុំវិញដែលតែងធ្វើឲ្យអ្នកខឹង មួម៉ៅ អ្នកត្រូវប្រើវិធីទី ២ នេះ ដើម្បីស្រោចស្រង់ខ្លួនឯងចេញពីរណ្ដៅទុក្ខ។ ជារៀងរាល់ថ្ងៃ ទន្ទេញពាក្យ ឬឃ្លាលើកទឹកចិត្តខ្លួនឯងមួយចំនួនដូចជា៖ “ខ្ញុំស្រឡាញ់សន្តិភាព” “ខ្ញុំមិនអីទេ ” “ខ្ញុំធ្វើបានល្អគ្រប់គ្រាន់ហើយ” “អគុណចំពោះក្ដីស្រឡាញ់ ” ជាដើម។

៣.សមាធិ

ការធ្វើសមាធិជួយបញ្ឈប់ការគិតច្រើន ព្រមទាំងបំផ្លាញគំនិតអវិជ្ជមានដែលកំពុងយាយីអ្នករាល់ថ្ងៃ។ ភាពស្ងប់ស្ងាត់ ជួយឲ្យអ្នករកឃើញសន្តិភាពផ្លូវចិត្តបានយ៉ាងជោគជ័យ។ ត្បិតថាអ្នកមិនអាចបិទខួរក្បាលមិនឲ្យដំណើរការទាំងស្រុង ប៉ុន្តែមនុស្សជាច្រើនទទួលស្គាល់ថាបរិមាណនៃគំនិតស្មុគស្មាញនៅក្នុងខួរក្បាលពិតជាថយចុះ បន្ទាប់ពីពួកគេអនុវត្តវិធីនេះជាប្រចាំ។ វិធីស្រដៀងគ្នាមួយទៀតដែលអ្នកអាចជ្រើសរើសបាន គឺការហាត់យូហ្គា។ ក្រៅពីជំរុញភាពស្ងប់ដល់ផ្លូវចិត្ត វាក៏ផ្ដល់អត្ថប្រយោជន៍ដល់សុខភាពផ្លូវកាយអ្នកយ៉ាងច្រើនសន្ធឹកសន្ធាប់ទៀតផង។

ប្រសិនអ្នកចង់បញ្ឈប់ការគិតច្រើន និងរៀនរស់នៅបែបសន្តិភាព ទម្លាប់ ៣ យ៉ាងខាងលើជាអ្វីដែលអ្នកគួរប្រកាន់ខ្ជាប់។ មួយថ្ងៃអ្នកមានពេល ១៤៤០ នាទី ដូច្នេះដើម្បីភាពស្ងប់នៃផ្លូវចិត្ត ទទួលបានលទ្ធផលល្អក្នុងការងារត្រឹមតែ១០ នាទីក្នុងមួយថ្ងៃ វាមិនមែនជារឿងលំបាកខ្លាំង ដែលអ្នកត្រូវរារែកឡើយ៕

ចុចអាន៖

ប្រភព៖ powerofpositivity អត្ថបទ៖ អូន បញ្ញា