បញ្ចប់បញ្ហាពាក្យចចាមអារ៉ាម Mark Prin សុខចិត្តទទួលកំហុសមុខ Kimberly

2018-03-19 03:58:00
ចំនួនមតិ 0 | ចំនួនចែករំលែក 0

កំពុងទទួលបានការចាប់អារម្មណ៍ខ្លាំងដែរក្នុងចំណោមក្រុមអ្នកគាំទ្រ សម្រាប់ទំនាក់ទំនងស្នេហារវាងតារាសម្ដែងថៃ Mark Prin និង Kimberly ដោយមុននេះមានពាក្យចចាមអារ៉ាមនិយាយថាអ្នកទាំងពីរមានបញ្ហាបែកបាក់គ្នា ហើយអ្នកទាំងពីរក៏បានចេញមុខបកស្រាយរៀងៗខ្លួន។ ប៉ុន្តែលើកនេះ គូស្នេហ៍ MK ក៏បានធ្វើឲ្យគ្រប់គ្នាអស់មន្ទិលសង្ស័យមែនទែន ដោយបានដឹកដៃគ្នាចូលរួមកម្មវិធីមួយជាមួយគ្នា។

កាលពីល្ងាចថ្ងៃអាទិត្យកន្លងទៅនេះ គូស្នេហ៍តារាសម្ដែង Mark Prin និង Kimberly បានមានឱកាសរួមការងារជាមួយគ្នាឡើងវិញ នៅក្នុងកម្មវិធី Grand Opening The Sis Clinic ហើយឆ្លៀតក្នុងឱកាសនោះ អ្នកទាំងពីរក៏បានបកស្រាយពីបញ្ហាមួយចំនួនទាក់ទងនឹងទំនាក់ទំនងរបស់ខ្លួន។ ក្នុងនោះ Mark បានបង្ហើបថា “ដូចដែលឃើញស្រាប់ ពួកយើងក៏មិនដឹងថាគួរនិយាយអ្វីទៀត ព្រោះវាបែបនេះរហូតទៅហើយ។ ទំនាក់ទំនងមនុស្សពីរនាក់វាក៏ប្រៀបដូចអណ្ដាតនិងធ្មេញ មានប៉ះទង្គិចគ្នាខ្លះគឺជារឿងធម្មតា។ ហើយដូចដែលធ្លាប់និយាយអីចឹងថា មិនថាមានព័ត៌មានលេចឮបែបណា ខ្ញុំនៅតែជឿជាក់ថាពួកយើងនៅតែនៅជាមួយគ្នា”។

តារាឯកស្រី Kimberly ក៏បានបន្ថែមថា “ការពិតទៅវាមិនមែនជារឿងធំដុំអ្វីទេ គ្រាន់តែជារឿងតូចតាច ប៉ុន្តែមនុស្សចូលចិត្តយកទៅបន្ថែមបន្ថយហើយគិតដោយខ្លួនឯង”។ នៅពេលអ្នកកាសែតសួរថា បាត់ខឹងឬនៅ Mark ក៏ឆ្លើយជំនួសមិត្តស្រីថា “ខ្ញុំគឺជាអ្នកខុសខ្លួនឯង ប៉ុន្តែមិនបាច់និយាយទេថាជារឿងអ្វី។ ចំពោះវិធីលួងគឺអាស្រ័យលើស្ថានការណ៍ តែការពិតទៅគ្មានអីច្រើនទេ គឺយើងព្យាយាមនិយាយដោះស្រាយគ្នាគ្រប់យ៉ាងតាមដែលអាចធ្វើបាន” ៕